Yosua Uram 21

Sun Lewi yala nang ati ebmai mutuk deyok

21:1-42

1Uki tentok tum aryi Er Imtamnyi ai wa irmilin nang Lewi yala nang sal yoka akwe anaboka, Imtamnyi biti dama deiboka wa inanyi imam si Eleazar ab, Nun mi si Yosua ab, sun Israel nang yala yuk-yuk weik nang ab, 2Kanaan mutuk Silo dam yandoka ato ebmai. “Er Iya Erebdobnyi biryi Musa deici aryi, nun Lewi yala nang ababyi, nun kunkwamoubwe atei ab, nun bisam yabwe winironkwamoubwe mutuk ab minob ebdeiansou. Ati, a ebdeiansou to kuboka mutuk ton ebsindarur,” eboka molobmai. 3Ba, sun Israel nang ton nang aryi sun minob bokdamnyi mutuk asi Lewi yala nang ati, sun kunkwamnyi atei ab, sun bisam winironkwamnyi mutuk tukwe ab Iya Erebdobnyi biryi ebdeibmou to kuboka mutuk ebmai.

4Ba, Lewi deibdoba sun Kehat yala ninyi asi minob dobmai. Ba, Imtamnyi biti dama deirinanyi imam si Harun bira Kehat deibdoba kuramwe. Imam Harun deibdoba ati, Yehuda yala nang mutuk ton, Simeon yala nang mutuk ton, Benyamin yala nang mutuk ton kuboka weik atei 13 baryi ebmai. 5Kehat yala nang akwe bok, ton nang ara weik atei takubaryi me Yordan kouboka kitingbantam asi ebmai. Ara, Efraim yala nang mutuk ton ebmai, Dan yala nang mutuk ton ebmai. Tonda, Manasye yala nang meici kukoka dinatam nang mutuk ton ebmai. 6Ba, Lewi mi Gerson deibdoba nang ara weik atei 13 baryi ebmai. Ara, Isakhar yala nang aryi ton ebmai. Tonda, Asyer yala nang aryi ton ebmai, tonda Naftali yala nang aryi ton ebmai. Tonda Manasye yala nang meici kukoka dinatam yala nang aryi mutuk si Basan mutuk ton ebmai. 7Ba, Lewi mi Merari deibdoba asi weik atei amolbaryi ebmai. A bokeibmai mutuk ara Ruben yala nang mutuk atei asi ton ebmai. Gad yala nang mutuk atei asi ton ebmai. Ura, tonda Zebulon yala nang mutuk dam atei asi ton ebmai. 8Ato kuboka Er Iya Erebdobnyi biryi Musa deici asi minob ebdeiamwe to kuboka, sun Israel nang aryi Lewi yala nang asi weik-weik atei ab, sun bisam winironkwamnyi mutuk ab ati, yamin deiboka bokeibmai.

9Ba, Yehuda yala nang aryi ton, Simeon yala nang aryi ton bokeibmai mutuk si ara ato: 10Yuma kobdob aryi yamin deiboka Kehat deibdoba Harun mabwe ati mutuk bokeibmai. Sun yala nang ara Lewi yala nang kuramnyi. 11A yala nang ati bokeibmai mutuk ara Kiryat-Arba mutuk ebmai. A mutuk ara Hebron enung. Ba, Arba bira Enak yala nang sun nai kuramwe. Ani, tonda sun ninyi obnaryi tindorban mutuk noutam aryi, sun Lewi deibdoba Kehat yala nang sun bisam winiron mutuk ati karebmou. 12Bok, a weik atei dam mutuk tukwe ab mitik-mitik atei ab ara Yefune mi Kaleb biti ebmai ba, er mutuk kibdobmou. 13Ba, imam Harun deibdoba ati ton tabakdongoboka karebmou atei ara sun ninyi obnaryi inirorban atei si Hebron ab, sun bisam winiron mutuk ab, Libna atei ab sun bisam winiron mutuk ab karebmou. 14Tonda, Yatir atei ab, sun bisam winin mutuk ab, Estemoa atei ab sun bisam winin mutuk ab 15Holon atei ab sun bisam winin mutuk ab, Debir atei ab sun bisam winin mutuk ab 16Ain atei ab sun bisam winin mutuk ab, Yuta ab sun bisam winin mutuk ab, Bet-Semes ab sun bisam winin mutuk ab ebmai. Ara, Harun deibdoba ati sun Yehuda yala nang ab, Simeon ab yala nang kankan asi weik atei toubnibaryi ebmai. 17Ba, sun imam Harun deibdoba Lewi yala nang asi sunda Benyamin yala nang kankan dam, “Tonkwa kunkwandum,” eboka atei ton karebmou. Ara, Gibeon atei ab sun bisam winin mutuk ab, Geba atei ab sun bisam winin mutuk ab, 18Anatot atei ab sun bisam winin mutuk ab, Almon atei ab sun bisam winin mutuk ab, ukuboka weik atei dumbaryi bokeibmai. 19Ba, Er Imtamnyi biti dama deirin ai wa in yala nang, imam Harun yala nang ati, weik atei 13 baryi ab, sun bisam winin mutuk ab ebmai.

20Lewi yala nang asi Kehat deibdoba nang tukwe ton dona kum kubmai nang ara Efraim yala nang aryi yamin deiboka ebmai. 21Sunti ebmai weik atei ara Efraim mutuk konkon aryi Sikhem atei ninyi obnaryi inirorban atei ab, sun bisam winiron mutuk ab karebmai. Tonda Gezer atei ab sun bisam winiron mutuk ab karebmai. 22Ani, Kibzaim ab, Bet-Horon ab asi sun bisam winiron mutuk ab weik atei dumbaryi sunti ebmai 23Ani, Dan yala nang kuramnyi mutuk ara sun Kehat deibdoba dinatam nang sun mutuk kum dobmai nang ati atei ton karebmou. Ara, Elteke atei ab sun bisam yabwe winin mutuk ab, Gibeton atei ab sun bisam winin mutuk ab, 24Ayalon atei ab sun bisam winiron mutuk ab, Gat yala nang mutuk Rimon atei ab sun bisam winiron mutuk ab, ukuboka weik atei dumbaryi ebmai. 25Ani, Manasye yala nang meici kukoka dinatam nang mutuk weik atei bitinyi ebmai. Ara, Taanakh ab, Gat-Rimon ab, sun bisam winiron mutuk ab ebmai. 26A bokeibmai weik atei nirya nungna ara atei takubaryi bokeibmai. Ba, sun bisam winin mutuk ababyi Kehat yala tukwe suktaleamnyi nang ati bokeibmai.

27Ba, Lewi yala Gerson deibdoba ati, Manasye yala nang aryi mutuk ton tabakeibmai. Akatei si ara Golan atei ab sun bisam winin mutuk ab ebmai. Basan mutuk bok, Golan atei ara ninyi obnaryi bai bukoka baron atei ati ebmai. Ba, Beestera ab ara sun bisam winin mutuk ebmai. Ura, weik atei ara atei bitinyi ebmai. 28-29Ba, Isakhar yala nang aryi ebmai atei ara: Kisyon ab sun bisam winin mutuk ab, Dobrat ab sun bisam winin mutuk ab, Yarmut ab sun bisam winin mutuk ab, En-Ganim ab sun bisam winin mutuk ab, weik atei dumbaryi ebmai. 30Asyer yala nang aryi ebmai mutuk ara Misal ab sun bisam winin mutuk ab, Abdon ab sun bisam winin mutuk ab, 31Helkat ab sun bisam winin mutuk ab, Rehob ab sun bisam winin mutuk ab, weik atei dumbaryi ab ebmai. 32Naftali yala nang aryi ebmai mutuk ara: Galilea mutuk dam Kedesh atei ara ninyi obnaryi inirorban atei ab sun bisam winiron mutuk ab, Hamot-Dor sun bisam winin mutuk ab, Kartan ab sun bisam winin mutuk ab, weik atei winiryi ab kuboka ebmai. 33A ebmai weik atei nirya ara Gerson yala nang weik atei 13 baryi ab sun bisam winin mutuk ab ebmai.

34Ba, Lewi yala nang akwe Merari deibdoba nang suktalebmai nang ara Zebulon yala nang aryi mutuk ebmai ara ato: Yokneam atei ab sun bisam winin mutuk ab, Karta ab sun bisam winin mutuk ab, 35Dimna ab sun bisam winin mutuk ab, Nahalal ab sun bisam winin mutuk ab, weik atei dumbaryi ebmai. 36Ba, Ruben yala nang aryi ebmai ara: Bezer atei ab sun bisam winin mutuk ab, Yahas atei ab sun bisam winin mutuk ab, 37Kedemot atei ab sun bisam winin mutuk ab, Mefaat atei ab sun bisam winin mutuk ab, weik atei dumbaryi ab kuboka ebmai. 38Ani, Gad yala nang aryi ebmai atei ab mutuk ab ara: Gilead mutuk asi Ramot atei ninyi obnaryi inirorban atei ati ab, sun bisam winiron mutuk ab, Mahanaim atei ab sun bisam winin mutuk ab, 39Hesybon ab sun bisam winin mutuk ab, Yaezer atei ab sun bisam winin mutuk ab, ukuboka weik atei dumbaryi ebmai. 40A weik atei nirya ara Merari deibdoba ati bokeibmai. Ara, Lewi yala nang asi bokde banmai ani, suklobmai nang ati bisam winin mutuk ab weik atei amolbaryi ab bokeibmai.

41Sun Israel ninyi yala kankan aryi Lewi yala ninyi ati, weik atei yubwa 48 baryi ab, sun bisam winin mutuk ab kuboka ebmai. 42A ebmai mutuk nirya ara weik atei-weik atei ab, sun bisam winin mutuk ab yuk-yuk ebmai.

Er Iya Erebdobnyi biryi Israel nang sun abwe yabwe ati, “Mangkau asa aminda kubkwandum mutuk ebkwansin,” eboka minob ebdeiamwe mutuk deyok

21:43-45

43Kanaan mutuk dam nirya ara sun Israel nang ati, sun abwe yabwe deici minob, Er Iya Erebdobnyi biryi ebdeiamwe to kuboka, Kanaan ara sun mutuk kiboka kunung. 44Ba, Israel nang kunung mutuk, eitam babyi, outam babyi, otam babyi, atam babyi nirya, Er Iya Erebdobnyi biryi kalingdur. Erci sun abwe yabwe deici asi, “Niryi sunsi tuba kalingkwansin,” eamwe to kuboka tuba kalingdur. Yuk nang aryi Israel nang asi “Obkub,” tenen kungnyi asi Iya Erebdobnyi biryi a nang asi Israel nang ati doboka karerur ba, sunci onung. 45Er Iya Erebdobnyi biryi sun Israel yala ninyi nirya asi teleb dinyi-teleb dinyi, “Ukubkwansin,” eamwe dinyi ton dangbisina kum uca nirya kunurur.

Currently Selected:

Yosua Uram 21: MTG

Highlight

Copy

Compare