Yosua Uram 10
10
Yosua biryi Kanaan mutuk me youkwetam nang asi mar bobmou talak aryi kiting imtam toblobmou deyok
10:1-15
1Yerusalem atei weik sienyi si Adoni-Zedek biryi Yosua biryi ukurur ena kekeramwe. Ara, ato eramnyi, “Yosua biryi Yerikho atei ab, akatei sienyi ab oboka arabdobwe to, Ai atei ab akatei sienyi ab ababyi oboka arabdobmar,” ena ab, “Gibeon nang ab antanibdobiryi sun ab tonkwa kuronung,” ena ab kekebmou. 2A deyok aryi sun Yerusalem atei nang sunsi ilil weik kubmou. Gibeon atei ara Ai atei mitik atei kuramnyi ato atei kuma, eda weik sien atei ato asi kuramnyi. Ani, Gibeon atei nang nirya mar ordana bingna nang akwe kuramnyi. A deyok aryi Yerusalem atei nang ilil mitik kum kubmou. 3Ura, Yerusalem atei sienyi Adoni-Zedek biryi Hebron atei sienyi si Hoham ab, Yarmut atei sienyi si Piream ab, Lakhis atei sienyi si Yafia ab, Eglon atei sienyi si Debir ab asi ato ebmou. 4“Yosua ab, Israel yala ninyi ab ara Gibeon mutuk ninyi ab antanibdobyi ati, nisi yamunci, milibnumunyi ba, nunci tonkwa Gibeon nang asi mar tonkwa bobkwayeb,” ebmou. 5Ebmou ba, a Amori mutuk amubaryi sien nang nirya anaboka marlongobmai. Ura, Yerusalem atei sienyi ab, Hebron sienyi ab, Yarmut sienyi ab, Lakhis sienyi ab, Eglon sienyi ab ani, sun atei yin doun nang sien nang ab tonkwa anaboka bisik noutam dam keis ol ai doboka mabmai ani, Gibeon nang asi ibinmai. 6Ba, Gibeon atei ninyi aryi ninyi ton Yosua Gilgal mutuk dam kunmoua dam asi sunci ato eboka bokeibmai, “Amori nang mutuk kon kunung sien nang nirya anabmangci, oryanganmasing ati, nai nun kan wa irmilin nang taksiminyei nunsi milibdobsiminci, lebdeibsurum,” ebmai.
7Ura, Yosua ab Israel mutuk yin doun nang mar ordana iya co biriamwe mikib weik nang ab Gilgal atei aryi anaboka Gibeon nang asi milibkwamai ati sunsi binmai. 8Ura, Er Iya Erebdobnyi biryi Yosua bisi ato ebmou, “Kan ilil kukina mem. A nang nirya asi Niryi kan taruk dam karebkwamakin. Niryi sunsi milinkwamasin ati ninyi tentok ababyi ton taba kum kwanikwamasurur,” ebmou. 9Ebmou ura, Yosua ab er yin doun nang ab Gilgal atei aryi lukunda noutam aryi nirya anaboka ibanmai. Ani, sun Amori mutuk yin doun nang Gibeon atei dam marbinmai nang ara kum bikmai asi bindoka iyanabmai. 10Ura, Er Iya Erebdobnyi biryi Amori nang asi kanya walwalabminikeiboka sunsi Israel nang taruk dam karebmou ba, Gibeon atei dam aryi muna kibdongobmai. Ba, Amori nang ara sun ilil aryi mutuk kon Bet-Horon kon diniboka otam mutuk taram cungdorbanmai asi dombinmai. Dobkirikde binmai ani, Azeka mutuk dam ab, Makeda mutuk dam ab binmai. 11Israel nang aryi Bet-Horon yim dobde bai ura, Er Iya Erebdobnyi biryi Azeka mutuk o baronmai nang asi, lumtaia keil du aryi yongobninto kuboka obsekmou ba, dibsekmai. Ani, Israel nang ninyi on ya aryi obmai ara mitikanun bok, imtam aryi keil du yongobninto kuboka obmou ninyi ara mitik kum obmou.
12Ura, Er Iya Erebdobnyi biryi Amori nang asi Israel nang taruk dam karebmou tum aryi Yosua biryi Er Iya Erebdobnyi bisi molobmou. Israel nang a kekenmai bok, ato eboka molobmou, “Kiting Gibeon atei dub iya toblobmamimba, wala ababyi mutuk bakan si Ayalon dikum iya toblobmarum!” eboka molobmou. 13Ato ebmou ba, Er Imtamnyi biryi kekeboka kunubmou ura, kiting ab wala ab o kisirongna kum uca iya a yandoka toblobmarei. Ba, Israel nang aryi sun Amori nang mar ordan nang nirya kisok dakmaici, obkiribmai ura, kiting babyi wala babyi wekdobmarei. Ara, ninyi si Jashar bibabyi ato eboka kerek sekamwe, “Kiting imtam yandoka iya toblobmou ba, uki cang weik kunmai, kiting ola kum wengbinmou,” eboka kerek sekamwe. 14Er Iya Erebdobnyi biryi sun Israel nang deyok ati mar dobmiliamwe. A mar dobmilibmou tum kiting wala kubmou to dinyi ara minob kuramnyi talak babyi ton kum kunuramwe ani, aminda talak babyi ton kum kunubkwande dinyi asi kunubmou. Ara, ninyi sirik aryi Er Iya Erebdobnyi bisi arukni ba, a tum kunubmou ato dinyi ton kum kunurdeiramwe. 15Ato kubmou ba, Amori nang asi nirya obkiribmai ura, Yosua ab Israel nang er milibmai nang ab sun atei keis ol ai mabmai mutuk Gilgal atei dam bindobmai.
Yosua biryi Amori atei weik sien nang amubaryi asi obmou deyok
10:16-28
16Amori mutuk sien nang sun amubaryi nang ara Makeda mutuk dam bindoka keil siling umbura wekoka inibdobmai. 17Ura, Yosua bisi uram boyanmaici, ato ebmai, “Amori mutuk sien nang sun ninyi amubaryi ara Makeda mutuk keil siling umbura wekmang asi, asing eiboka yanmab,” ebmai. 18Ebmai ura, Yosua biryi sunsi ato ebmou, “Ilila keil aryi bongobdongobokabmunci, siling um bisik asi tirikdongoboka kalikdarur,” ebmou. 19“Bok, sunci sunsi taklobmunyei, eda sunsi dombindoka sun dongtam kuboka obdarur. Ani, sunci taklobmunyi asi sun atei bindobingnyei. Ara, Er Iya Erebdobnyi biryi sunda, sun taruk dam karebkwamasir ati ebman,” ebmou. 20Ura, Yosua ab, Israel nang ab aryi sun Amori nang asi nirya obkiribmaici, mitikanun kablobmai nang ara cukoka lika dobdanamnyi atei dam wengdorbinsekmai. 21Ura, sun Israel nang nirya ara Yosua bisi tamuboka sun atei dobmai atei Makeda dam yandobmai. Ninyi tentok aryi Israel nang asi uram bit ababyi mitika ton erdena kum kubmai. 22Ura, Yosua biryi ato ebmou, “Keil siling um bublan kukokabmunci, a amubaryi sien nang asi ni dam boyandarur,” ebmou. 23Ura, a sien nang amubaryi nirya ara Yerusalem sienyi ab, Hebron sienyi ab, Yarmut sienyi ab, Lakhis sienyi ab, Eglon sienyi ab asi kunuboka boyanmai. 24A amubaryi sien nang nirya kunuboka Yosua dam boyanmai ura, Israel nang nirya bulubmai. Ura, yin doun nang sien nang ara er ab mar ibinmai nang asi, “A Amori sien nang ngang yanisitabdarur. 25Sun kanya ilil kuboka mambul kusina mem. Sun kanya mikib asa aryi kanya wisibdobdarur! Er Iya Erebdobnyi biryi ato kuboka sun mar bobmunyi atei nirya ara ato muna kibdongobkwande,” ebmou. 26Sirya ebmou ura, Yosua biryi a amubaryi sien nang nirya asi obmou. Ura, co amubaryi ikokaburyi, biriboka dolobkwetebmou asi kiting sirya wekmou. 27Kiting sirya wekmou ura, Yosua biryi ato ebmou, “Co dub aryi dobkweteboka sun wekmongwe keil siling umbura tubto bodongorbindarur. Dongobmunyi ura, ilila keil aryi a umbura asi bongoboka tirikdongobkwandarur,” ebmou to kunubmai. A tirikdongobmai keil ara ukubabyi tuba kubwe.
28A tum aryi Yosua biryi Makeda atei kuramnyi nang ab, Makeda sienyi ab, akatei kuramwe kamyoa nirya ab asi ninyi on ya aryi obukmou. Ninyi tentok ababyi ton kum taklobmou. Ara, Yerikho atei sienyi ukuamwe to akwe Makeda atei sienyi bibabyi ukubmou.
Israel nang aryi Amori mutuk atei amubaryi arabdobmai deyok
10:29-43
29Ani, Yosua ab Israel nang ab Makeda aryi anaboka Libna atei mar ibinmai. 30Er Iya Erebdobnyi biryi Libna atei kuramnyi nang ab, sun sienyi ab Israel nang taruk dam karebmou. Yosua biryi Libna atei ab, akatei umbura kamyoa nirya obkiribokmou ba, tentoknyi ababyi ton kum bindobmou. Ara, Yerikho atei ukuamwe to akwe Libna atei ababyi ukubmou.
31Ura, Yosua ab Israel nang ab Libna atei aryi banmai ani, Lakhis atei bindoka keis ol ai doboka mabmai ani, akatei yibinkirikoka obdanmai. 32Ba, Er Iya Erebdobnyi biryi Lakhis atei ara sun Israel nang taruk dam karebmou. Uki bitinyi tum akatei umbura kamyoa nirya ninyi on ya aryi obkiribmai. Libna atei kubmou to akwe Lakhis atei ababyi ukubmou. 33Ba, Gezer atei sienyi si Horam ab, er atei nang ab aryi Lakhis nang asi mar bobmai. Bok, Yosua biryi a Gezer sienyi ab, er atei nang ab nirya obkiribokmou ba, tentok ababyi ton kum bindobmai.
34Ura, Yosua ab Israel nang ab nirya Lakhis aryi banmai ani, Eglon mutuk bindoka keis ol ai doboka mabmai ani, Eglon atei mar ibinmai. 35Akatei ibinmai ara neik tum aryok, akatei dam kuramnyi ninyi ab kamyoa ab kuramnyi tok nirya ninyi on ya aryi obkiribmai. Nirya Lakhis atei ukuamnyi to akwe Eglon atei ababyi ukubmai.
36Ani, Yosua ab Israel nang nirya ab Eglon atei aryi anaboka Hebron atei mar ibinmai. 37Hebron ibanmaici, ninyi on ya aryi akatei ninyi ab, sun sienyi ab, kamyoa ab kuramnyi tok nirya obkiribmai. Ninyi tentok ababyi ton kum bindobmou. Eglon atei ukubmai to akwe Hebron atei ababyi ukubmai. Akatei kuramwe dinyi nirya kum dandeibmai.
38Ura, Yosua ab, sun Israel nang ab nirya tamuboka Debir mutuk nang asi oryanmai. 39A mutuk ab, a mutuk sien nang nirya ab, a mutuk weik atei doramnyi tok nirya arabdobmai. Akatei dam kuramnyi dinyi nirya ninyi on ya aryi obsekmaici, arabdobmai. Ninyi tentok ababyi ton kum bindobmai. Ara, Hebron atei ababyi, Libna atei ababyi ukuamnyi to Debir atei ababyi sien nang oboka arabdoro yibinmai.
40Ato kuboka Yosua biryi a mutuk nirya babyi, mutuk kon atei babyi, Negeb mutuk babyi, kon mutuk babyi, as mutuk babyi ani, sien nang ababyi obkiribmouci, atei nirya arabsekmou. Ninyi tentok ababyi ton kum bindobmai. Ani, lulungnanda nirya Er Iya Erebdobnyi, sun Israel moloraminyi biryi eamwe to kunuboka obkiribmai. 41Yosua biryi Kadesh-Barnea mutuk kuramnyi nang asi obukde binmou ani, Gaza mutuk kuramnyi nang asi sirya bindoka obmou. Ani, tonda Gosyen mutuk kuramnyi nang nirya asi obukde binmou ani, Gibeon mutuk wiliba sirya bindoka a mutuk kuramnyi nang nirya obukmou. 42Yosua biryi sun atei ab, sun sien nang ab, akatei nang neik a uki tum akiryok nirya oboka arabdobmou. Er Iya Erebdobnyi biryi sun Israel nang asi mar doamwe ba, ukuboka obsekmai. 43Yosua ab Israel nang nirya ab aryi ato kuboka nirya obsekmai. Ura, tamuboka sun atei Gilgal dam minob dobde kuramnyi atei bindobmai.
Currently Selected:
Yosua Uram 10: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
