Amos Uram 1
1
Amos Uram Deyok
1:1
1Er Imtamnyi biryi sun Israel nang deyok ati ninyi si Amos dam uram ebdeibmou. Amos bira Yehuda mutuk atei si Tekoa mutuk dam bisam domba kalingnanyi kuramwe asi uram ebdeibmou. A uram ebdeibmou talak ara Yehuda mutuk taleamwe weik sienyi si ara Uzia. Ba, Israel mutuk ara ninyi si Yoas mi si Yerobeam biryi taleamwe talak aryi uram ebdeibmou. Ani, weik mutuk eimna dona ara kabul talak aryi a uram ebdeibmoua uram asi minob ebdeibmou ba, kwalina bitinyi bisibmou bok mutuk eimna dobmou.
Er Imtamnyi biryi yuk mutuk nang-yuk mutuk nang wenebmou uram deyok
1:2–2:3
2Er Imtamnyi uram ermurunanyi si nabi Amos biryi ato ebmou,
“Er Iya Erebdobnyi bira, ‘Ninyi wenebkwan,’ tenen mutuk Sion dub ai aryi yu kam si singa kuna kamurur.
Ani, Yerusalem dam aryi Erci uram weik erkarerur.
Uca, bisam domba kambing mol kwan mutuk ai ara kelkel ermururur.
Ba, Karmel mutuk kon ai tingdarur co sungsunga ara yalangdorur,” ebmou.
3Ato ebmou cok, ton ato ebmou, “Er Iya Erebdobnyi biryi ato ebmar,” ebmou.
“Sun Damsyik nang aryi yu dinyi liki winiryi ukubiryok,
tubto bisibkaboka dumbaryi yu dinyi tabakdongobmai.
Ara, sunci Gilead nang asi malyi limdon obukoka gandum du yalyi kwena besi aryi kikniramingnyi dinyi aryi darabdarab eboka kweraming to kuboka obkiribyi.
Ati, Niryi, ‘Sunbabyi wenebkwan,’ eboka uram dobdeibse ara kum takwan diba ati, Niryi sunsi wenebkwan.
4Niryi weik sienyi Hazael kun atei dam asi uk dinibdongobkwan.
Ba, Benhadad don atei ara nirya uk kolom bukwande.
5Niryi Damsyik atei wengyangan bisik lika bublan darardongon co balang ara bulakdonokwan.
Ba, Bikeat-Awen atei kunung nang ara kum daneibkwan.
Ani, Bet-Eden atei dam aryi weik sienyi mikib ara kum daneibkwan.
Ba, Aram mutuk kuramingnyi nang yuk mutuk boboka deirlorban atei nang kikniboka mutuk si Kir dam kubkwaming,”
eboka Er Iya Erebdobnyi biryi ebmou.
6Ura, Er Iya Erebdobnyi biryi ton ato ebmou,
“Sun Gaza nang aryi yu dinyi liki winiryi ukubiryok,
tubto bisibkaboka dumbaryi yu dinyi tabangdongordanung.
Ara, sunci yu asa aryi, ‘Edom nang aryi sun mambul wa irmilin nang kibdobkwanung,’ tenen ati, atei tentok doramnyi tok nirya boboka Edom nang ati dobkarebyi.
A deyok aryi Niryi, ‘Sunsi wenebkwan,’ eboka uram dobdeibse ara kum takwan.
Diba ati, Niryi sunsi wenebkwan.
7Niryi Gaza atei lika umbura dam asi uk dinibdongobkwan.
Ba, akatei donunga nirya uk kolom bukwande.
8Niryi Asdod atei kunung nang nirya kum daneibkwan.
Ani, Askelon atei dam aryi weik sien nang mikib ara kum daneibkwan.
Niryi Ni taruk donokoka Ekron nang asi mar bobkwan ba,
Filistin nang takdongoamingnyi nang nirya kum daneibkwan,”
eboka Er Iya Erebdobnyi, Imtamnyi biryi ato ebmou.
9Ura, Er Iya Erebdobnyi biryi ato ton ebmou,
“Sun Tirus nang aryi yu dinyi liki winiryi ukubiryok,
bisiboka dumbaryi malyi kun dinyi kurtabangdongordanung.
Ara, sunci atei tentok doramnyi tok nirya boboka Edom nang ati dobkarebyi ba, Edom nang aryi sun ikin wa irmilin nang kibdobyi.
Ara, sunci minob ura, ‘Nunda tonkwa milirdaronkwayeb,’ eboka kunubdeibdanamnyi dinyi kanya teneirdena kum kubyi tenen deyok aryi,
‘Niryi, sunsi wenebkwan,’ eboka uram eboka dobdeibse.
Ara, kum takwan diba ati Niryi sunsi wenebkwan.
10Niryi Tirus atei lika umbura asi uk dinibdongobkwan.
Ba, atei donunga ara nirya uk kolom bukwande.”
11Ura, Er Iya Erebdobnyi biryi ato ton ebmou,
“Ba, sun Edom nang aryi yu dinyi liki winiryi ukubyi ani, bisiboka dumbaryi dinyi tabangdongordanung.
Ara, sunci Edom er weit Yakub yaldangna nang asi ton boukwe kanya bordena kum uca, ya iboka domkiringnung.
Ani, iya yu bobmuruboka iya mar in deyok aryi Niryi, ‘Sunsi wenebkwan,’ eboka uram dobdeibse ara kum takwan.
Diba ati, Niryi sunsi wenebkwan.
12Niryi Teman atei dam asi uk dinibdongobkwan.
Ba, Bozra kurur atei ara nirya uk kolom bukwande.”
13Ura, Er Iya Erebdobnyi biryi ato ton ebmou,
“Ba, sun Amon yaldangna nang aryi yu dinyi liki winiryi ukubyi ani, bisiboka dumbaryi dinyi tabangdongordanung.
Ara, sunci, ‘Nun talen mutuk wiliba ara temda weik kibkwansir.
Ati, Gilead mutuk ababyi arabkwayeb,’ tenen akatei nerabwe mundu ya botonung deyok aryi
Niryi, ‘Sunsi wenebkwan,’ eboka uram dobdeibse ara kum takwan.
Diba ati, Niryi sunsi wenebkwan.
14Niryi Raba atei lika umbura asi uk dinibdongobkwan.
Ba, atei donunga ara nirya uk kolom bukwande.
Ura, mar bordaramingnyi talak ara mot seboka luna mumubkwaming.
Ba, yeinya doboka kumwe lilim uu ebkwande.
15Ba, sun mutuk talen weik sienyi bira er amwetam kun sien nang ab yuk atei bobindoka deirlorbinsekwaming.
Ba, erda tingyangananyi bitonyi bindoka kubkwandur,”
eboka Er Iya Erebdobnyi biryi Amos bisi ebdeibmou.
Currently Selected:
Amos Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
