2Korintus Uram 2
2
1Ati, Ni kwit yabwe. Niryi sunsi minob diryanmasise ba, sunda dib tenen nang kankan asi tonyi biryi iya malyi kun dinyi kunubde baramwe uca, ni kanya mambul weik kibdeibnou. Ati, niryi, “Mambul kanya tubto bobnyei,” tenen, “Niryi kerena uram tamuboka ebkarebnyei,” tenebmase ura, niryi, “Korintus atei tamuboka kum dirbinkwan,” tenebmase. 2Niryi sunsi boukwe weik kusunun deyok aryi, niryi sunti, “Mambul kubdeibnyei,” tenesunun. Ati, niryi sunsi wenebsitinyi uca, sunbabyi nibabyi mambul kanya borantibyi. Sunbabyi mambul kanya bobdate deyok aryi, ninyi tentok ababyi ni kanya teleb kum kubdeibnute ati ebman. 3Ura, niryi, “Korintus atei minola kum binkwan,” tenebmasiryok, niryi sunsi kerek sengna ton kerek sekeibmasise. Ara, niryi sunti, “Mambul kibdeibkwan,” tenen a kerek sengna kum kerek sekeibmasise. Eda, niryi, “Korintus atei tamuboka binmanyi ura, ni kanya mambul tubto kibdeibningnyei,” tenen kerek sekeibmasise. Sunda ni boukwe weik kusunun nang kurandum deyok aryi, sunci ni kanya asi teleb kubdeibsindate ati ato ebmasin. Ati, niryi, “Ni kanya kilkil kurdeirinin dinyi ara sun kanya ababyi kilkil kurdeirirur,” teneransisiryi, kerek sengna kerek sekeibmasise. 4Ati, niryi sunsi kerek sekeibmasise ara ni kanya mambul weik kubnou ba, engen weik kanya bobmasiryok, kerek sekeibmasise. Ara, niryi, “Sun kanya lukeibkwan,” tenen kum kerek sekeibmasise. Eda, sunci ni Paulus biti, “ ‘Erci nunsi langdeiboka boukwe weik kusurur,’ tenen bikniting,” tenen kerek sekeibmasise.
“Iya malyi kuramunyi er malyi kun dinyi taklobmou deyok aryi, sunci, ‘Nun kwit,’ eboka er ab antanibdeibdandarur,” eboka eterebmou uram
2:5-11
5Ba, sun kankan aryi kurandanyi bira iya malyi kun dinyi dobmou uca, nun nirya asi mambul weik kibdeibmasou ati ebman. Anyi bira nibabyi malyi kibdeibmanou cok, erci sunda Korintus nang ilinto asi bikdob malyi kibdeibmasou. Anyi bira iya malyi dinyi dobmou bok, sun kankan asi kurandum nang ton nang ara, “Malyi dinyi ton kum dobmou,” tenerandum. A deyok aryi, niryi, “Sun nirya asi malyi kibdeibmasou,” tenen kum ebkwan. Ato ebmatinyi ura, niryi bisibkaboka uram aryi ou nebdeibmatinyi. 6Sun kankan asi ninyi ilinto aryi anyi biti, “Iya malyi kun dinyi kubmou asi wenebkwayeb,” eboka wenebmandau. A kunum sirya wenebmandau deyok aryi, sunci anyi bisi tabakoka wenebmunyei. 7Eda, sunci anyi biryi malyi kubmou dinyi asi tuba kum teneibmunci, er ab antanibdeibdandarur. Tonda, sunci, “Nun kwit ara bisibkaboka iya mambul kanya bobcei,” tenen er kanya asi teleb kubdeibdarur. 8Ati, sunci anyi bisi bindoka, “Nunci kansi boukwe weik tuba kukunub,” ebdarur. “Sunci ato kubdarur,” tenen ebkatabdeiboka ebdeibmasin. 9Niryi minob ura “Malyi kunanyi bisi wenebdarur,” eboka kerek sekeibmasise ara, “Ni ebdeibtinyi uram nirya asi diboka kekebting do kum do tenen biktinyi,” tenen kerek sekeibmasise. Ura, sunci a malyi kunanyi bisi sirya wenebmarum deyok aryi, niryi sunti, “Niryi ebdeibmase uram sirya kunubmai,” tenen bingsunun. 10Ura, sunci anyi bisi, “Kan malyi kubmoumwe to tuba kum teneibkwayeb,” ebkwandum ati, nibabyi anyi malyi kubmou to tuba kum teneibkwan. Ura, niryi, “A malyi kun dinyi tuba kum teneibkwan,” tenenun ara sunda Korintus atei nang aryi anyi biti tulum kanya tuba kum bobkwandum ati ato tenenun. Tola kuma. “Nun Du Kristus biryi ni tenen kanya diboka bingnurur,” tenen niryi diboka ebmasin. 11Niryi anyi biryi malyi dobmou dinyi asi tuba kum teneibkwan ara, “Isa sienyi si Iblis biryi nunsi muna obdongobsicei,” tenenun deyok aryi a malyi kun dinyi tuba kum teneibkwan. Isa sienyi bira, “Sakeibtinyi,” tenen, “Tulum kanya iya bobting,” tenen nunda dib tenen nang asi diburuboka mar moun yisurur. Nunci a dinyi diboka bingnub.
“Er Imtamnyi biryi nun Du Yesus biriman aryi ukuryok antanirdeirisin dinyi karebsou asi sunci dobdobdarur,” eboka eterebmou uram
2:12-17
12Ura, niryi, “Troas atei bindoka nun Du Yesus Kristus uram Teleb Uram eterebkwan,” tenen binmase ura, nun Du Yesus biryi nisi bublan kukeibnou uca, ninyi ilinto aryi, “Teleb Uram kekebkwayeb,” tenebmai. 13Ninyi ilinto dib tenebmai bok, ni kanya ara teleb kum kuranou. Ara, ni kwit Titus bisi Troas dam kum eibmase deyok aryi, ni kanya mambul kuranou. Ati, niryi sun Troas atei kuboka dib tenen nang ab bokdanmoubwe ura, niryi anaboka Makedonia mutuk binmase. 14Ura, nira mambul kanya boranse bok, niryi Er Imtamnyi bisi, “Ei, ni Nai,” enun. Nun Nai Imtamnyi bira nunda nun Du Yesus Kristus dam kun nang asi tuba-tuba boboka menekde basururci, nunsi muna kimdongon dinyi karebde basurur. Nun Nai biryi karebmasou uca, nunci dantam-dantam bindoka nun Du Yesus uram Teleb Uram lak eterebde banub. Ura, nun dantam-dantam baramibiryi, nun Du Yesus biti bingna dinyi lak kimnub. Nun Du biti eterenub dinyi ara tong teleb dinyi ato kururcok, ninyi kanya teleb kurdeirisurur ati ebman. 15Nunda nun Du Yesus uram Teleb Uram eterebde ban nang ara nun Nai Imtamnyi urasintam aryi tong teleb dinyi ato kunub. Ati, nunci Er Imtamnyi biryi lebdeibde basurur nang dam bindoka sun damnyi waningminingdaramingnyi nang ababyi dam bindoka nun Du Yesus uram Teleb Uram eterebde banub. A deyok aryi, Er Imtamnyi biryi nun Er wa irmilin nang ati, “Ni mabwe,” tenesurur. 16Nunci nun Du Yesus uram Teleb Uram eterebde banub bok, ton nang ara, “Teleb Uram nun li se,” tenen, “Iya malyi tong tenen dinyi ato,” teneraming uca, iya din dinyi dobdobkwaming. Ba, yuk nang ara Teleb Uram kekebingiryok, “A uram ara iya teleb tong tenen dinyi ato kurur,” tenen dororaming uca, iya kam kun dinyi dobdobkwaming. Tukwetam nang kankan bindoka nun Du Yesus uram Teleb Uram eterermuruna ara iya ikin wa kurur ati ebman. Ninyi tentok ababyi ara ato wa in dinyi asi sunglona kum uca kunubte. 17Er Imtamnyi Uram eteren nang ilinto ara co bok ati tula kiringnamingiryok, Er Imtamnyi Uram etereraming. Ara, “Co bok ilinto karebsiting,” tenen etereraming. Ba, nunda, “Co bok karebsiting,” eboka kum molonub. Nunci uram ulubyang kum dakde banub. Eda, nunci, “Er Imtamnyi biryi nunsi bokdonoksou,” tenen bingdanub ati, dib en uram akwe enub. Ara, nunci nun Du Yesus dam kun nang kuramibiryi, Er Imtamnyi urasintam aryi dib en uram akwe lak eterenub.
Currently Selected:
2Korintus Uram 2: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
