2Korintus Uram 12
12
Paulus biryi, “Er Imtamnyi biryi karebnou uca, tek deib aryi imtam ai iya erebdob ai asing eibmase,” lak ebmou uram
12:1-10
1Ni kwit yabwe, nunda tukwetam nang ara nun damnyi kisal dakdatibyi ara talyi dinyi akwe kunubtibyi. Ato ebman bok, niryi ni damnyi kisal dakmurubdandoka binkwan ati ebman. Sun kankan nang ton aryi sun damnyi erebdeibdandoka talyi ati kisal dangdaraming deyok aryi, niryi, “Bisik sekwan,” tenebman cok, nibabyi ni damnyi ati kisal dangdana uram ato ebmurubkwan. Kisal dangdana uram ato ebmurubkwansin cok, niryi nun Du Yesus biryi karebnou uca ni tek deib aryi minob lak kum kuamwe dinyi asi asing eibmase dinyi yuk-yuk ati nukde binkwansin. Tonda, nun Du Yesus biryi lak kibdeibmanou dib dinyi yuk-yuk asi nukde binkwansin. 2Nun Du Kristus biryi ni tonyi Er dam kunanyi bisi tek deib dinyi karebnou ati ni bikdanman. Ara, nun Du Yesus biryi nisi karebnou uca, niryi tek deib aryi imtam kurur dinyi iya erebdob dinyi asi asing eianse ati ebman. A tek deib kunumna eianse ara kwalina 14 kwaleboubwe. Tek deib aryi asing eibmase ba, nun Du Yesus biryi nisi bowelebindoka imtam ai iya erebdob ai bowengbinmanou. “Ni kanya ara ni nong umbura tuba kubnou do anaboka yuk welebinmou do?” tenen ni kum bingdanun. Ba, nun Nai Imtamnyi biryi a dinyi bingnurur. 3-4Tonda, nun Du Yesus biryi nito anyi bisi bowelebinmanou ara iya teleb mutuk ara Firdaus ato mutuk bowengbinmanou ati ni bikdanman. “Ni kanya ara ni nong umbura tuba kubnou do anaboka yuk welebinmou do?” tenen ni kum bikdanman. Ba, nun Nai Imtamnyi biryi a dinyi bingnurur. Firdaus mutuk ato bowengbinmanou ura, nira bikdob uram iya ilila uram yuk-yuk asi kekebmase. A ilila uram kekebmase ara tukwetam nang aryi bingna kum uca nukmanto kum uram kekebmase. Tonda, ato en uram kekebmase ati nun Du Yesus biryi, “Tukwetam nang urasintam aryi lak ena mem,” ebmanou. 5Niryi, “Ni damnyi kum erebdeibdankwan,” tenerdanun cok, niryi nito anyi tek deib aryi asing eibmase uca imtam ai iya erebdob wengbinmasinyi biti kisal dakdankwan. “Nira yuk nang asi bisibkaboka iya mikibnyi kunun,” eboka kisal kum dakdankwan. Eda, niryi, “Yuk nang asi bisibkaboka iya mitangnyi kunun,” eboka kisal dakdankwan. 6Ura, niryi ni damnyi ati, “Ni damnyi kisal dakdankwan,” tenen kunubtinyi ababyi, talyi ati kisal kum dakdatinyi. “Ni damnyi kisal dakdankwan,” tenebtinyi ababyi nira lub kanya bonanyi kum kurantinyi. Ara, niryi ni damnyi kisal dakdatiniryok, dib dinyi akwe lak ebtiniryi ati ato ebman. Er Imtamnyi biryi karebnou uca, tek deib aryi imtam dinyi diboka eibmase deyok aryi, niryi ni damnyi ati talyi ati kisal kum dakdatinyi. Dib dinyi deib aryi ni damnyi kisal dakdatiniryok, niryi ni damnyi kalikdandoka, “Tek deib aryi nun Du Yesus biryi nisi imtam ai bowengbinmanou,” eboka lak kum ebde banun. Ara, “Ninyi aryi nisi talyi ati erebdeibningnyei,” tenen lak kum enun. Eda, niryi, “Ni kunubde banun to ton ni lak ebde banun to asing eibting uca, ninyi aryi niti, ‘Nun Du biryi bokdonokmounyi kurur,’ tenen bikting,” tenen kunun.
7Nun Du biryi karebnou uca, niryi tek deib aryi asing eibmase uca, niryi iya ilil tenen dinyi ara yuk nang asi lak kibmanto kum dinyi asing eibmase. Ura, Er Imtamnyi biryi niti, “A tek deib aryi bisibkaboka erebdob dinyi asing eiboka kekebmou deyok aryi, erci erdamnyi bisibkaboka erebdeibdacei,” tenen mambul weik kimdeirinin dinyi ababyi tabakoka karebnou. A mambul kimdeirin dinyi karebnou ara co tiling ninyi tub dakdongobmaci ura, kwinibman kum dinyi ato kunurur. A dinyi ara tanglona kum uca nisi mambul weik kurdeirinurur. Ara, isa ton aryi nisi tuba-tuba dumdenurur ati ebman. 8Ura, niryi, “Isa aryi tubto dubdenicei,” tenen nun Du Yesus bisi molobmase. “Mambul kurdeirin dinyi aryi tubto dubdenicei,” eboka molobmase. Liki bitinyi ara ato molobmase ura, liki winiryi dinyi ababyi molobmase. 9Liki winiryi molobmase bok, nun Du Yesus biryi a molona kum kunubmanou. Eda, Erci niti ato ebmanou. “Niryi kansi kisal dakde bakunun ara kikiman kukurur. Niryi sunglona kum uca Ni mikib lak kimnun ara mitang nang biriman aryi lak kimnun.” Nun Du biryi nisi ato ebmanou deyok aryi, niryi ererdeirirdana uram kum ebdankwan. Eda, niryi kankana kanya bona kum uca, “Nira mitangnyi bica,” eboka lak ebdankwan. Ara, “Nun Du Kristus Er mikib nisi karebmurubde banute,” tenen niryi, “Nira mitangnyi bica,” eboka lak ebmurubde binkwan. 10Ara, nun Du Yesus Kristus biryi mikib karebde banurur deyok aryi, niryi kilkil kanya bonun. Ara, ni yuk ara mitang kunun ababyi ni kilkil kanya bonun. Tonda, mambul dinyi bonun ababyi ni kilkil kanya bonun. Tonda, ninyi aryi nisi ina ngilingnunung ababyi ni teleb kanya bonun. Ninyi aryi niti, “Obtibyi,” tenen domkiringnunung ababyi ni kilkil kanya bonun. Tonda, mambul kimdeirin dinyi yuk dinyi-yuk dinyi ababyi bonun cok, ni kanya teleb kunurur. Ara, ni yuk ara mitang kunun cok, nun Du Yesus Kristus biriman aryi mikib kunun ati ebman.
Paulus biryi, “Niryi sunda Korintus nang ati boukwe kusunun cok, mambul kanya bosunun,” ebmou uram
12:11-21
11Ni kwit yabwe, niryi ni damnyi bisi kisal dangdana ato uram ebmasin ara lub nang en uram ato ebmasin. Ni yuk aryi, “Ni damnyi kisal dakdankwan,” kum tenebmase. Eda, sunci niti, “Erda nun Du Yesus biryi bokdonokmounyi kurur,” eboka kisal daknindatiryok, kisal kum dakmanindau. A deyok aryi, niryi ni damnyi kisal dakdanman. Ura, sun kankan aryi kuraming nang ton ara sun damnyi erebdeibdandoka, “Er Imtamnyi biryi bokdonokmou nang kankan aryi nunda iya erebdob kunub,” erdaraming. Ato eboka erdaramingiryok, a nang ara nisi outam kibdongobmanto kum kunung ati ebman. Nira tukwetam bunanyi bitonyi kunun cok, nibabyi nun Du Yesus biryi bokdonokmou nang kankan aryi Iya Erebdobnyi kunun ati ebman. 12Nibabyi sun kankan aryi kuransiryok, niryi tanglona kum uca ilil tenen dinyi utotoa nirya kikniranse. Ilil tenen dinyi utotoa nirya kikniranse deyok aryi, sunci niti, “Er Imtamnyi biryi bokdonokmounyi diboka kurur,” tenen biknindate. 13Niryi sunda Korintus nang asi Teleb Uram etereransisiryok, niryi sunsi, “Yina karebnindarur,” eboka, “Co bok deksindarur,” eboka kum arungdeiriransise. Yuk atei aryi kuboka dib tenen nang asi nisi dibniliboka yina kareraning bok, niryi sunsi, “Yina karebsindarur, co bok karebsindarur,” eboka kum arungdeiriransise. Ati, sunci niti, “Nun yina kum moloryirur se,” tenen tatab-tatab ebnindate ura, niryi sunti, “Ni kwit yabwe, niryi manmalibmasise se,” eboka, “Ni manmalibmasise dinyi luba kibdeibdarur,” eboka molobsitinyi. Ba, yuk dinyi nirya ati niryi sunti malyi dinyi ton kum kurdongoransise. Ara, “Yuk atei aryi kuboka dib tenen nang ara iya erebdob nang kunung bok, sun Korintus nang ara tukwetam bun nang ato kunung,” tenen malyi kum kurdongoransise.
14Ura, ni kwit yabwe, ni sun dam diryankwan ara liki winiryi tum diryankwansin. Ati, ni sun dam tamuboka diryankwan ababyi, niryi sunsi, “Yina kum co bok kum karebnindarur,” kum ebkwansin. Niryi sunti ikin dinyi takubdeiboka kum arukdeibkwansin. Niryi sun bona bon dinyi ati, “Dobdobtinyi,” tenen kum diryankwansin. Eda, niryi sun kanya ati, “Katabum ebdeibtinyi,” tenen diryankwansin. Nira sun nai bitonyi kusunun cok, niryi sunda ni mabwe nermabwe ato kurandum nang ati, “Yina kareboka dibnilibnindarur,” ebsitinyi do? Ato tenen kum. Sun mitik mabwe nermabwe ara sun nai ab sun kwin ab asi dirnilina kum kuraming. Eda, sun nai ab sun kwin ab ara sun mabwe nermabwe asi dirniliraming. 15Ati, nira boukwe weik kuboka sun nai bitonyi kunun cok, kilkil kanya bonunci, niryi sunti, “Dibnilibkwan,” tenen ni dinyi nirya sunsi karebkwansin. Ni dinyi akwe kum karebkwansin. Eda, ni kanya ababyi sunti deirirdanun cok, sunti ur karebdankwan. Niryi sunsi boukwe kusunun ara tabaknin boukwe weik kusunun ati ebman. Ura, sunci niti, “Minob talak ara boukwe weik kimnamoubwe ani, ukuryok ara boukwe mitikto kimnub,” teneranurum darib? 16Ura, sunbabyi ara niti, “Ikin dinyi kum arukdeibkwansir,” tenen bingnanurum. Ba, sunci niti, “ ‘Co bok karebsiting,’ tenen kanya tangmingna uram ebmou uca, co bok karebmoubwe,” teneranurum darib? Niryi sunsi uram ulubyang kum eransise ati ebman. 17Tonda, niryi ni bokdonokmase nang asi “Uram ulubyang ebmunyi uca, sun Korintus nang aryi co bok karebsiting,” eboka arukdeibmase ati teneranurum darib? Ni bokdonokmasou nang ara, “Co bok karebting,” tenen uram ulubyang ebmasei ati tenerandum darib? Ato tenesina mem. 18Niryi nun kwit Titus bisi ebkataboka, “Korintus atei dirbirum,” eboka bokdonokmasiryok, dib tenenanyi yuknyi ton bokdonokmase uca, sun tonkwa sun dam diryanmasirei. Ura, nun kwit Titus biryi kanya tangminingni uram eboka sunsi manmalibminiksou do? Ato tenen kum. Niryi, “Co bok karebsindarur,” eboka molosina kum kuransise to, Titus bibabyi neik kanya boboka, “Co bok karebsindarur,” eboka molosina kum kuramwe. Ati, nibabyi erbabyi neik kanya boboka teleb dinyi akwe kunubde baranim.
19Niryi ato ebmasin ara, “Nun damnyi libdandobkwayeb,” tenen ato ebmasin ati teneranurum do? Ato tenen kum. Nunda Kristus wa irmilin nang kunub cok, Er Imtamnyi urasintam aryi dib en uram akwe ebmasib. Nunci sunda Korintus nang kanya ati, “Katabum ebdeibkwayeb,” tenen ato ebmasib. Ni kwit yabwe, ni boukwe weik kusunun nang. Nun wa iboka kuramibyi tok nirya ara, “Sun kanya katabum ebdeibkwayeb,” tenen kusunub. 20Ni sun dam diryasitinyi ara, “Er Imtamnyi urasintam aryi teleb dinyi kunubde baranting,” tenen diryasitinyi. Ba, niryi sunti mambul kanya bosunun ati ebmasin. Ara, niryi, “Malyi dinyi tuba kunubmurubting deyok aryi, niryi sunsi wenebnyei se,” tenen mambul kanya bosunun. Tonda, sunci niti, “Wenena uram ebsicei se,” tenebnindate bok, niryi sunsi wenebsitinyi. Ati, niryi ilil kanya bosunun cok, sunda Korintus nang ati ato tenesunun. “Sun mamun lulurdaraming darib?” tenesunun. Tonda, “Tulum kanya bordaraming darib?” tenesunun. Tonda, “Kererdaraming darib?” tenesunun. Tonda, “Yuk-yuk bongdaraming do?” tenesunun. Tonda, “Malyi uram erdaraming darib?” tenesunun. Tonda, “Yuk nang asi talak doraming darib?” tenesunun. Tonda, “Sun damnyi ererdeirirdaraming darib?” tenesunun. Tonda, “Ninyi ilinto buluboka uram lilim enung darib?” tenesunun. 21Niryi sunda Korintus nang ati, “Er Imtamnyi urasintam aryi teleb dinyi kunuraming,” eboka kisal dangnansise. Ani, sunci malyi kun dinyi kubdate ura, nira sunti alyi kanya borantinyi. Ara, nira sunsi kisal dangdansinyi bisi Er Imtamnyi biryi luknubdeibnute uca, alyi kanya borantinyi. “Er Imtamnyi biryi ni alyi kibdongobnute,” tenen ilil kanya bonun. Ara, sun kankan ninyi ilinto aryi minob ura malyi kun dinyi kurandau ani, ukuryok tuba kurmururandate deyok aryi, ni kanya ara mambul weik kubnute. Sun kankan ninyi ilinto ara kam ato kuramingiryok, “Talyi yobdatibyi,” tenen dinyi yuk-yuk tenen kubde baraming. Ato dinyi kubmurubde baramingiryok, sun malyi kun dinyi tanglona kum kuraming ati ato ebman.
Currently Selected:
2Korintus Uram 12: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
