1Korintus Uram 9
9
“Nun Du Yesus biryi ni Paulus bisi bokdonoknouci, mikib karebnou deyok aryi, niryi ni eteren uram keken nang asi, ‘Sunci nisi yina ton yuk dinyi ton karebnindarur,’ eboka ur molorantinyi,” eboka lak eterebmou uram
9:1-27
1Ni Paulus bira nun Du Yesus biryi lebdeibnou uca, Ersi milinunyi kunun deyok aryi, niryi, “Bisam tub utotoa ur yibmanuna,” tenebtinyi uca, ur yibtinyi. Tonda, “Yuk dinyi-yuk dinyi ur kunubkwan,” tenebtinyi uca, ur kunubtinyi. Nun Du biryi nisi bokdonoknou uca, nira Teleb Uram eterebde banunyi kunun. Nun Du biryi nisi bokdonoknouci, mikib karebnou deyok aryi, niryi sun ni uram keken nang asi, “Yina ton yuk dinyi ton karebnindarur,” eboka ur molorantinyi. Nun Du Kristus bira ni ab ebdandoka Erdamnyi ni urasintam aryi lak kibdandoka nisi bokdonoknou deyok aryi, nira nun Du Yesus bokdonoknounyi diboka kunun ati ebman. Nira nun Du Yesus wa irmilinanyi diboka kunun ara lak kubmar ati ebman. Niryi sun kankan asi yandoka Teleb Uram etereransise ba, nun Du Yesus nun Arungdeirisururnyi biryi karebmou uca, sunsi du mouansou. Ni wa in dinyi deici aryi sunti du mouansou deyok aryi, sunci ni Paulus biti, “Erda nun Du Yesus biryi bokdonokmounyi diboka kurur,” tenen biknindate. 2Ninyi ton nang ara ni Paulus biti, “Erda nun Du Yesus biryi bokdonokmounyi diboka kum kurur se,” tenenunung bok, sunda Korintus atei nang aryi niti, “Erda nun Du Yesus biryi bokdonokmounyi diboka kurur,” tenen biknindate. Niryi sunsi Teleb Uram etereransise uca, du mouansou deyok aryi, yuk nang ababyi asing eibsitingiryok, sunci niti, “Nun Du biryi bokdonokmounyi diboka kurur,” tenen bikniting.
3Sun Korintus atei dib tenen nang kankan asi ton nang ara ni Paulus biti ato eraning. “Nun Du biryi bokdonokmounyi diboka kum kurur.” A nang ara talyi ati ato eraning asi niryi uram ton dekeibkun ati ebman. 4Ni ab yuk nang ab ara nun Du Yesus biryi bokdonokmasou nang kunubci, mikib dobdobmoubwe deyok aryi, nunci nun eterena uram keken nang asi, “Yina ton me ton karebsindarur,” eboka ur molorantibyi. 5Tonda, nunda nun Du Yesus biryi bokdonokmasou nang yuk-yuk ara, “Ni ner dib tenen ner ni ab tonkwa baranimiryok, Teleb Uram eterebkwan,” tenebtibyi uca, nunci nun ner asi ur bobatibyi. Nun Du biryi bokdonokmou nang yuk nang ababyi sun ner bobaramingiryi, Teleb Uram eterebde banung. Nun Du Yesus Er kwin Maria deibmou mabwe yuk mabwe ara neiktoto sun ner bobaramingiryi, Teleb Uram eterebde banung. Tonda, nun kwit Petrus uruma si Kefas bibabyi neiktoto er ner bobarandiryi, Teleb Uram eterebde barur. Ati, nibabyi neiktoto, “Ato dinyi kunubtinyi,” tenebtinyi uca, ur kunubtinyi. 6Ba, sunci nun Du Yesus biryi bokdonokmou nang yuk nang ati, “Yina yin dinyi karebkwayeb,” tenerandum cok, sunci ni ab ni kwit Barnabas atikwe ati, “Nun Du biryi bokdonokmou nang diboka kum kururung,” tenen, “Sun taruk aryi wa ibdingiryi, yina yin dinyi ingkiriktiring,” teneransurum do?
7Ura, kiklina uram ton doboka eterebkwinsin. Yin doun nang ara, “Mar ordana nang bisik sekwayeb,” tenen kalingnamingiryi, sun mining yina ingkirikoka dengnung do? Ato tenen kum. Eda, yuk nang aryi dibniliboka sunsi yina kareraming. Tonda, anggur yala koubingnyi nang ara anggur du dam nang kunung bok, anggur du ur yibkwaming do kum do? Ur yiraming ati ebman. Tonda, domba sapi kalingna nang ara domba sapi moum urubdongoboka mum yung ur yiraming do kum do? Ur yiraming ati ebman. Ura, ato kuboka nunda Teleb Uram eterenub nang ababyi neiktoto sunda nun uram kekerandum nang asi, “Yina karebsindarur,” eboka ur arukdeibsitibyi uca, yibtibyi. 8Niryi tukwetam nang aryi kuraming to kiklin dinyi yuk-yuk doboka kiklibdeibmasin bok, nun Nai Imtamnyi biryi, “Ukubdarur-Ukuna mem,” en uram deib aryi nunci, “Sun wa in nang asi dekoka yin dinyi ur karebdarur,” tenen bingnub ati ebman. 9Ara, Musa Uram umbura aryi erci ato eboka arungdeirisurur.
“Sun wa in sapi ara gandum kala loksakwande ati yan aryi yanisitabci sapi ara gandum du ur yibkwandur. Ati, sunci, ‘Gandum du yibcei,’ tenen sapi si kankanya asi tabwe debmunyei.” (Ulangan 25:4)
Musa Uram aryi ato eboka arungdeirisur ati ebman. Ura, nun Nai Imtamnyi biryi bico tenen, “Sapi akwa ur yibdur,” tenen ato eboka arukdeibmasou do? Ato tenen kum. 10Eda, nun Nai biryi wa in sapi ati, “Gandum du ur yibkwande,” ebmou ara Erci nunda nun Du Yesus wa irmilin nang ati nukoka, “Yina ur yibkwaming,” tenen ato ebmou. Sun tukwetam wa in nang ababyi, “Du moun dinyi ara aminda yibkwayeb,” tenen wa iraming. Ara, gandum wa tukwe asi dalub-dalub eboka yongon kimdeirin nang wa iramingiryok, sunci, “Nunbabyi gandum du kibkwayeb,” tenen dalub-dalub eboka wa iraming. Tonda, sun gandum kala asi lokaboka kimnansing nang ara, du wimdeirin nang ara, “Nunbabyi gandum du moun dinyi yibkwayeb,” tenen gandum kala asi lokaboka wa iraming. 11Ura, nunda Teleb Uram eteren nang ara nun Du Yesus Er wa irmilin nang kunubiryi, sun kankan aryi nun Du Yesus uram Teleb Uram asi kouramoubwe. A uram ara ninyi kam burdeirin yala ato dinyi kouramoubwe. Kouramoubwe ani, sunti du langdeiboka mouriransou. Ura, nunci sunti, “Nun kwit yabwe, yina ton dinyi dekoka karebsindarur,” eboka arukdeibtinimnyi ara nun ur arukmanub to bisibkaboka ikin dinyi arukdeibtinimnyi do? Ato tenen kum. 12Yuk nang aryi sunti, “Yina karebsindarur,” eboka arukdeibmasei uca, sunci a nang asi yina karebmandau. Ba, sunci nunda deyok kouboka sunsi Teleb Uram minob etereransunoumwe nang asi yina kum karebsindate do? Sunci ato kuna mem. Eda, sunci nunti, “Ei, nun nai yabwe,” tenen tabakoka karebdendate. Ba, nun Du biryi nunsi mikib karebsou uca, nunci, “Yina karebsindarur,” eboka molorantinimiryok, nunci ato eboka kum moloransunoumwe. Ara, nunci, “Yina karebsindarur,” eboka molorantinimyi uca, ninyi aryi nun Du Yesus uram Teleb Uram ati, “ ‘Kekena nun li,’ tenebingnyei,” teneranumuryi, “Yina karebsindarur,” eboka kum moloransunoumwe. Eda, nunci, “Yina kum karebsingnyi ababyi yuk mambul dinyi kibdeibsingnyi ababyi nunci kilkil kanya boboka Teleb Uram eterebmurubkwayeb,” tenen kuranoumwe. 13Ura, sun Bait Allah ai ara Er Imtamnyi bisi ninyi dama deirin ai wa in nang aryi kuraming to sun bikmarum do kum do? A nang ara sun mining yina ingkiringna kum kuraming. Eda, sun Israel yala nang aryi dama deirin dinyi asi sengnamingiryok, dama deirin dinyi sekdoba ton doboka yiraming. Ara, sun dama deirin dam bindoka dama deirin dinyi yangaboka Er Imtamnyi urasintam aryi bobaraming nang ara dama deirin dinyi sekdoba ton yiraming ati ebman. 14Ura, nun Du Yesus Erebdobnyi bibabyi neiktoto nunda Er wa irmilin nang ati ato eboka arukdeibmasou. “Sun Teleb Uram lak eterebde ban nang ara sun kankan kuboka ni wa irmiliraming ati, sunci yina karebdarur.”
15Nun Du biryi nunda Er wa irmilin nang asi, “Yina ton yuk dinyi-yuk dinyi ton ur molobdarur,” eboka mikib karebmasou bok, niryi sun ni eteren uram keken nang asi, “Yina ton, yuk dinyi-yuk dinyi ton, karebnindarur,” eboka kum moloransise. Tonda, ukuryok ababyi niryi, “Yina kum, yuk dinyi-yuk dinyi kum, karebniting,” tenen deyok ati kum kerek sekeibmasin. Ati, niryi, “Kwaning atabnicei,” tenen ni taruk yuk aryi wa ibde banun. Ati, niryi, “Ni yuk aryi ni yibkwan yina ingkirikwan ati, niryi tabakoka wa ibde banun,” enun ara teleb kanya boboka lak enun. Niryi yuk nang asi, “Yina karebsindarur,” ebtinyi uca, ni alyi weik kubnute. Niryi ni eteren uram keken nang asi, “Yina karebsindarur,” eboka kum molobtinyi. Eda, niryi, “Molobkwan,” tenen dinyi diboka dokdonoktiniryi, ni yuk aryi ni yibkwan yina ingkiringnun. 16Ni kwit yabwe. Ni yuk aryi ni yibkwan yina ingkiringnun deyok aryi, ni kanya ara iya teleb kunurur. Tonda, niryi Teleb Uram eterebde banun deyok aryi, ni kanya ara iya teleb kunurur. Ato ebmasin bok, Teleb Uram eterebde banun deici aryi niryi ni damnyi asi kum erebdeibdatinyi ati ebman. Nun Nai Imtamnyi biryi nisi arukdeibnou uca, niryi Er Uram kunubdeiboka Teleb Uram eteresunun. A deyok aryi, niryi ni damnyi kum erebdeibdatinyi. Niryi nun Du Yesus uram Teleb Uram kum eterebtinyi uca, niryi mambul weik dinyi dobdobmatinyi ati ebman. 17Er Imtamnyi biryi, “Teleb Uram etererbirum,” eboka kum arukdeibmanute ura, ni yuk aryi ni mining kanya dam aryi, “Teleb Uram eterebde binkwan,” tenebmatinyi uca, niryi sun ni uram keken nang asi, “Niryi sunsi eterebmasin deyok aryi, sunci nisi dengna dinyi karebnindarur,” eboka molobmatinyi. Ba, Er Imtamnyi biryi nisi, “Teleb Uram eterebde birum,” eboka arukdeibnou deyok aryi, niryi dengna dinyi dorona kum uca nun Nai biryi ebdeibnou to kunubde bana akwe kunun. 18Ati, nira Teleb Uram eterebde banunyi biryi dengna dinyi utotoa kum doronun do? Diba. Ni mikib dobdobnou uca, “Dengna karebsindarur,” eboka molobmasitinyi bok, niryi dengna dinyi utotoa kum doronun ba, Teleb Uram eterebde banun. Niryi ato kuboka Teleb Uram eterebde banun ara ni kanya teleb kuranir ati ebman.
19Nira yuk tikokmunyi kunun cok, ninyi amwetam bunanyi kum kunun. Ninyi amwetam bunanyi kum kunun cok, niryi ni damnyi luknubdongobdandoka ninyi nirya asi arungnanyi kibdanmase. Ara, “Nun Du dam kun nang asi ninyi ilinto tabakdongobtinyi uca, yubwa-yubwa ilinto kibting,” tenenun cok, niryi ninyi nirya asi, “Dibnilibkwan,” tenen sun arungnanyi bitonyi kibdanmase. 20Ati, niryi, “Sun Yahudi yala nang kankan asi ninyi ilinto nun Du Yesus dam kun nang kibting,” tenenun deyok aryi niryi ni damnyi luknubdongoboka sun Yahudi yala nang kuraming to milinunyi bitonyi kibdanmase. Ati, niryi, “Sun Musa Uram kunubde ban nang kankan asi ninyi ilinto nun Du Yesus dam kun nang kibting,” tenen ni Musa Uram aryi tabwe demsinanyi kum kunun bok, niryi ni damnyi luknubdongoboka sun Musa Uram kunubde ban nang aryi kuraming to milinunyi bitonyi kibdanmase. 21Tonda, niryi, “Sun Yahudi yala kum nang kankan asi ninyi ilinto ara nun Du Yesus dam kun nang kibting,” tenen niryi sun Yahudi yala kum nang ara Musa Uram kunubde ban kum nang aryi kuraming to milinunyi bitonyi kibdanmase. Ato ebmasin bok, nira nun Nai Imtamnyi biryi, “Ukubdarur-Ukuna mem,” en uram kunubde tuba banun ati ebman. Nira nun Du Yesus Kristus amwetam bunanyi kunun deyok aryi, Er Uram kunubde banun. Ara, “Sun Yahudi yala kum nang kankan asi ninyi ilinto nun Du Yesus dam kun nang kibting,” tenen niryi nun Du Yesus biryi arukdeibnou uram kunubde banun. 22Tonda, niryi, “Sun katabum kanya bon kum nang ara nun Du Yesus bisi tanglona kum uca milibting,” tenen ni damnyi katabum kanya bon kumnyi bitonyi kibdanmase. Tonda, niryi, “Ninyi nirya asi nun Du Yesus dam kun nang diboka kibdeibtinyi,” tenen niryi ninyi nirya aryi kuramingnyi to yuk-yuk asi milinunyi kibdanmase. 23Ara, “Nun Du uram Teleb Uram diboka dobdobting,” tenen niryi ni damnyi luknubdongoboka ninyi nirya asi dibniliboka sun arungnanyi bitonyi kimdeirirdanun. Ara, “Nibabyi Teleb Uram deici aryi kisal dangsina dinyi dobdobtinyi,” tenen niryi Teleb Uram eterebde banun.
24Ura, kiklina uram ton ebkwinsin. Sun cungbaraming nang ara nirya cung baramingiryok, ninyi tentok ara iya cung bananyi bikwe muna kibdongobdinyi kisok kaluna dororande. Ati, sunbabyi neiktoto, “Er Imtamnyi biryi karebsici uca, muna kimdongon dinyi dobdobkwayeb,” tenen busul kuboka nun Du Yesus uram kunubde bindarur. Ato kubde biminyi ura, sun nirya aryi muna kimdongon dinyi dobdobkwandum.
25Sun, “Cungbana milibkwayeb,” tenen nang nirya ara, “Yuk nang asi muna kibdongobkwayeb,” tenen busul kuboka cungbinkeleraming. Ara, “Muna kimdongon nang kalurdeiriraming kisok kaluna kalubdeibniting,” tenen sunci busul kuboka sun damnyi kiknibminikdamingiryi, cungbinkeleraming. Ara, kisok kaluna tiya dinyi akwe dobdobkwaming ati, busul kuboka cungbinkeleraming. Ba, nunda dib tenen nang dobdobkwayeb muna kimdongon kisok kalun dinyi ara iya dinyi kum daneibman kum dinyi dobdobkwayeb. 26Ati, ni Paulus biryi, “Kum daneibman kum dinyi dobdobkwan,” tenen bingnun deyok aryi, talyi ati cungbana kum kunun. Eda, “Diboka dobdobkwan,” tenen cungbanun. Tonda, taruk iniboka ordana nang ara, “Muna kibdongobkwan,” tenen obkirikoka mentena kum uca ordaraming to, ni Paulus bibabyi neiktoto, “Muna kimdongon dinyi dobdobkwan,” tenen mentena kum uca Teleb Uram eterebde banun. 27Ati, niryi, “Ni nong ab ni kanya ab biriman aryi nun Du Yesus Uram kunubde binkwan,” tenen ni damnyi diboka kalingdanun. Ati, niryi, “Yuk nang asi Teleb Uram etereranse bok, ni yuk aryi nun Du Yesus Uram asi kum kunubmatinyi uca, Erci nisi kisal dangna dinyi kum karebnicei,” tenenun. Ato tenenun cok, nibabyi busul kuboka nun Du Yesus uram kunubde banun.
Currently Selected:
1Korintus Uram 9: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
