1Korintus Uram 5
5
“Er nai ner talyi yorandanyi bisi weneboka yakdonokdarur,” eboka eterebmou uram
5:1-13
1Sunda dib tenen nang kankan asi talyi yordana nang ton diboka kuramingiryi, talyi yordaraming. Ninyi aryi sunti ato eboka nungnansing uram asi amol kekebman ati ato ebmasin. Tonda, sun kankan aryi kuboka tonyi biryi iya ukubman kum dinyi kunurande ara er nai ner asi doboka talyi yorande ati kekebman. Sun Er Imtamnyi Uram walwal nang ara talyi yordaramingiryok, sunci, “Nun nai er ner asi talyi yobibyei,” teneramingiryi, ato dinyi kum kunuraming. Ba, sun dib tenen nang kankan aryi tonyi biryi sun Er Imtamnyi Uram walwal nang malyi kun dinyi bisibkaboka iya ukubman kum dinyi kunurande se. 2Ba, sunda Korintus atei kuboka dib tenen nang kankan asi iya ukubman kum dinyi kunurande bok, sunci alyi kuna kum uca sun damnyi ererdeirirdarandum se. Sunci sun damnyi luknubdongobdandoka a talyi yordan dinyi deyok aryi, mambul kanya bobdate se. Sunci er nai ner talyi yorandanyi bisi, “Nun kankan aryi bindobdum se!” eboka yakdonokdate se. 3Ni Paulus bira er nai ner talyi yorandanyi bisi, “Malyi dinyi kubumwe se,” eboka sirya kerebman ati ebman. Ni nong ara sun ab tonkwa kum kunmab ati, silalum sirik deici aryi anmalakoka kum ebman. Eda, ni kanya ara sun ab tonkwa kubmabci, niryi ni kanya biriman aryi a talyi yorandanyi bisi sirya kerebman ati ebman. 4-5Ati, sunda dib tenen nang aryi, “Nun Du Yesus si nabkwayeb,” tenen neik dam bulubmunyi ura, nira ni kanya deici aryi sun ab tonkwa bulubkwayeb. Ura, nun Du Yesus Er mikib sun kankan asi kubde ba, sunci er nai ner talyi yorandanyi bisi yakdonokdarur. Ato kuboka sunci anyi bisi isa sienyi Iblis taruk dam karebdarur. Ara, “Yakdonokibyi uca, anyi biryi er malyi kun dinyi taklobte,” tenen yakdonokdarur. Tonda, “Er malyi tenen dinyi taklobte uca, nun Du Yesus tamuryankwande uki tum berekci ura, Erci anyi bisi lebte,” tenen anyi bisi yakdonokdarur.
6Ni kwit yabwe, sunci sun damnyi erebdeibdandoka, “Nunda iya teleb nang kunub,” lak erdarandum ara malyito kurur se. Malyi kun dinyi mitik dinyi ababyi bisik kum sekdate uca, a malyi kun dinyi ara dakdongo-dakdongo yibici uca, ninyi nirya aryi a malyi kun dinyi dobdobingnyei. Ragi mitik dinyi ababyi roti umbura inirdaraming uca, roti nirya ara bungbung erande. Malyi kun dinyi ababyi neiktoto kurur ati ebman. 7-8Sunci sun kanya dam kuboka malyi kun dinyi nirya asi taklobdarur. Malyi kun dinyi ara ragi ato dinyi bai donokmunci, sunci sun damnyi kalikdandoka ragi inirdein kum roti ato kibdandarur. Nun Du Kristus biryi sunsi lebdeibsou deyok aryi, sunci kilibdob kanya boboka Er Imtamnyi urasintam aryi teleb dinyi akwe kunubdarur. Nun Du Kristus bira Erdamnyi nunti karebdandoka dibmou ati, nunci malyi kun dinyi nirya asi taklobkwayeb. Sun Israel yala nang minob kuramnyi nang ara kwalina si Paskah kwaliramnyi ba, sunci domba mi asi oboka Er Imtamnyi bisi dama kareramiryok, ragi inirdein kum roti yiramnyi. Ani, nun Du Yesus Kristus bira Er Imtamnyi bisi dama deirin domba mi atonyi kuramwe asi sirya obmai deyok aryi, nunci, “Weik kwalina si Paskah sirya kunubmar ati, nunci nun malyi kun dinyi minob dinyi nirya taklobkwayeb,” tenebkwayeb. Tonda, nunci nun kanya dam aryi bintinina kum uca, “Ukuryok roti ara ragi inirdein kum roti yibkwayeb,” tenen Er Imtamnyi urasintam aryi teleb dinyi akwe kunubde binkwayeb.
9Ni kwit yabwe. Niryi sunsi minob kerek sekeibmasise ara, “Sun talyi yormururdana nang dam kubmunyei,” eboka kerek sekeibmasise. 10Ato eboka kerek sekeibmasise ara, “Im dangna tukwe dangna kuramingnyi talyi yordana nang nirya asi dam kum kubting,” tenen nukoka kum kerek sekeibmasise. Tonda, im dangna tukwe dangna kuramingnyi, “Co bok ilinto talebtibyi,” tenen nang nirya ton, ukula don nang nirya ton, kwemdeina molon nang nirya ton ati nukoka kum kerek sekeibmasise. Im dangna tukwe dangna kuramingnyi malyi kun nang ara dantam-dantam kuraming ati kisibdobman kum kunung ati ebman. Nunda dib tenen nang ara, “Malyi kun nang nirya kisibdobtibyi,” tenebtibyi uca, nunci im dangna tukwe dangna takloboka dibtibyi. 11Ati, niryi sunti kerek sekeibmasin ara, “Sun talyi kuramingnyi malyi kun nang dam ara kisibdobdarur,” eboka nukoka kum kerek sekeibmasin. Eda, “Sun dib tenen nang kankan kuboka malyi kun nang dam asi kisibdobdarur,” eboka nukoka kerek sekeibmasin. Ara, sun, “Nunda nun Du Yesus bisi milin nang kunub,” lak erdaramingiryok, ner talyi yon nang kunung ati ebman. Sunci a nang ab tonkwa antaniboka yina yibmunyei. Tonda, sun dib tenen nang kankan aryi, “Co bok talebtibyi,” tenen nang ton, kwemdeina molon nang ton, ninyi talak doboka malyi uram en nang ton, anggur du yung ilinto yiramingnyi nang ton ati ato ebman. A nang ara, “Nunda nun Du Yesus bisi milinub,” eramingiryok, malyi dinyi dormururaming ati, sunci sun ab tonkwa antaniboka yina yibmunyei.
12-13Nunda dib tenen nang ara sun dib tenena kum nang aryi malyi deyok yuk-yuk lilibtibyi do? Ato tenen kum. Nun Nai Imtamnyi bira sun dib tenen kum nang aryi malyi deyok yuk-yuk lilibkwande. Ba, nunda dib tenen nang ara sun dib tenen nang yuk nang malyi deyok asi liliboka erekwanub ati ebman. Ati, sunci er nai ner talyi yorandanyi deyok lilibmunci, sun kankan aryi kuboka yakdonokdarur.#Ul. 17:7
Currently Selected:
1Korintus Uram 5: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
