1Korintus Uram 2

Paulus biryi, “Nun Du Kristus bira co lase deici aryi dibmounyi uram Teleb Uram lak eterebde banun,” eboka eterebmou uram

2:1-5

1Ni kwit yabwe dib tenen nang. Nira minob ura sun kankan dam yandoka Teleb Uram eterebmasise ara, “Ni uram keken nang sun kanya teleb kibdeibtinyi,” tenen Teleb Uram kum eterebmasise. Tonda, niryi, “Yuk nang aryi bingna kum dinyi iya bikdob dinyi eterebkwan,” tenen tukwetam kanya bon nang aryi bikdob tenen dinyi kum eterebmasise. Eda, niryi Er Imtamnyi biryi lak kibdeibsou Teleb Uram lak etereransise. 2Ati, niryi, “Nun Du Yesus Kristus uram Teleb Uram akwa lak eterebkwan,” tenen etereransise. Ara, “Co lase deici aryi dibmounyi bikwa lak eterebkwan,” tenen lak etereransise. “Yuk deyok ton kum eterebkwan,” tenen uram dobdeibse ati ato ebman. 3Ura, niryi sun kankan asi nun Du Yesus uram Teleb Uram etereransise ara ni yuk aryi mikibnyi kuboka kum etereransise. Eda, ni nong mitang kuranou ba, niryi sunti, “A nang ara Teleb Uram dobdobkwaming do kum do?” tenen ilil kanya boransiryi, Teleb Uram etereransise. 4Niryi sunsi Teleb Uram etereransise ara tukwetam nang aryi, “Bikdob uram,” tenen dinyi kum etereransise. Tonda, uram nisin telebto ara ninyi kanya teleb kimdeirin uram eboka kum etereransise. Eda, nira mitangnyi biryi nun Du Yesus co lase deici aryi dibmounyi uram Teleb Uram lak etereransise ba, Er Imtamnyi Kanya Roh Kudus aryi mikib kuboka sun kankan asi ilil tenen dinyi kiknibdeibsou. 5Ara, niryi, “Tukwetam nang aryi bikdob tenen dinyi deici aryi dib kum tenebting,” tenen sunsi tukwetam nang aryi bikdob tenen dinyi eboka kum etereransise. Eda, “Er Imtamnyi mikib deici aryi dib tenebting,” tenen nira mitangnyi biryi sunsi etereransise.

“Er Imtamnyi Kanya Roh Kudus ara imtam aryi kuboka bikdob dinyi etereboka lak kimsurur,” eboka eterebmou uram

2:6-16

6Nunda nun Du Yesus uram Teleb Uram eterebde ban nang ara tukwetam nang aryi bikdob tenen uram kum eterenub cok, nunci yuk bikdob dinyi ara imtam aryi kuboka bikdob dinyi eterenub. Ara, sun dib tenen nang kankan kuboka nebdob kanya bon nang asi a uram asi lak eterenub. Ba, sun tukwetam kanya bon nang aryi bikdob tenen dinyi kum eterenub. Tonda, sun isa sien nang ton tukwetam sien nang aryi eteren dinyi kum eterenub. Nun Nai Imtamnyi biryi karebci uca, a mikib dinyi yuk-yuk ara kum dandobkwaming ati ebman. 7Ba, nunci lak eterenub bikdob uram ara iya ilil tenen dinyi Er Imtamnyi biryi teneamwe iya bikdob dinyi kurur. A bikdob dinyi ara Er Imtamnyi biryi minob teneamwe bok, lak kum kiansou ani, ukuryok aryi lak kibdeibmasou. Ara, im ton tukwe ton kum kikniamuryok, Er Imtamnyi biryi nunti, “Erebdeibkwan,” tenen a bikdob dinyi minob teneansou ani, lak kibdeibsou. 8Sun tukwetam kuboka sien nang ara imtam aryi kuboka bikdob uram bingdona kum kuramnyi ani, ukuryok ababyi bingna kum kuraming. A nang aryi Er Imtamnyi bikdob dinyi bikmatingnyi uca, sunci nun Du Yesus Iya Erebdobnyi bisi co lase deici kum deibmating. Bok, a nang aryi Er Imtamnyi bingna dinyi kum bingnamnyi deyok aryi, sunci nun Du Yesus bisi co lase deici aryi deibmai. 9Ara, sun weik nang aryi Er Imtamnyi bikdob uram bingna kum kuraming bok, Er Imtamnyi biryi, “Nisi boukwe kununung nang asi lak kum kuamwe dinyi lak kibdeibkwan,” tenen a uram minob teneamwe. Ara, Er Imtamnyi Uram umbura aryi a deyok ati kerek sekeibmou to, kunubmou. Er Imtamnyi Uram ara ato esurur.

“Er Imtamnyi biryi sun Ersi boukwe weik kimnung nang asi iya ilil tenen dinyi karebkwande.

A dinyi ara ninyi tentok ababyi asing kum eiriramwe.

A dinyi ara ninyi tentok ababyi amol kum kekeramwe.

Tonda, a dinyi ara ninyi kanya dam aryi tenerdan kum dinyi kurande.

A dinyi ara iya ilil tenen dinyi kubkwande asi Er Imtamnyi biryi minob teneamwe to, sun Ersi boukwe kimnaming nang asi karebkwande.” (Yesaya 64:4)

10A dinyi ara ninyi kanya aryi bingdan kum dinyi kurande bok, Er Imtamnyi biryi Er Kanya Roh Kudus biriman aryi nunsi lak kibdeibmasou.

Er Imtamnyi Kanya Roh Kudus ara imtam tukwetam dinyi utotoa nirya liliboka bingdurnyi kururcok, Er Imtamnyi biryi Er kanya dam aryi tenen dinyi lak kum kibdeiansou dinyi ababyi nirya liliboka bingdur ati ebman. 11Nunda tukwetam nang ara yuk nang tenebmangnyi tok diboka kum bingnub. Eda, nun yuk aryi teneramibyi dinyi ara nun tikwe nun mining kanya dam aryi bingnub. Ura, Er Imtamnyi biryi Er kanya dam aryi tenebmaci dinyi ababyi neiktoto kurur. Er Imtamnyi biryi Er kanya dam aryi tenen dinyi ara yuk nang aryi bikmanto kum kurur. Eda, Er Imtamnyi Kanya Roh Kudus bikwe Er Imtamnyi tenen dinyi bingdur. 12Nunda dib tenen nang ara sun tukwetam kanya bon nang aryi bikdob tenen kanya kum dobdobmoubwe. Eda, Er Imtamnyi biryi karebmasou uca, Er Imtamnyi Kanya Roh Kudus asi dobdobmoubwe. Ara, nunci, “Er Imtamnyi biryi nunsi muna karebmasou uca, iya ererdeirisin dinyi dobdobkwayeb,” tenen diboka bikwamoubwe ati Er Imtamnyi biryi Er Kanya nunsi karebmasou. 13Ati, nunci Er Imtamnyi Kanya Roh Kudus aryi lak kimdeirisurur dinyi lak eramib. Ara, tukwetam nang aryi bikdob tenen dinyi dobdeiboka nunci Teleb Uram lak kum eramib. Eda, Er Imtamnyi Kanya aryi eteresurur to, nunci Er Imtamnyi Kanya dobdeibmaci uram dobdeibmiliboka dib en uram lak eramib. 14Sun tukwetam kanya bon nang ara Er Imtamnyi Kanya Roh Kudus aryi eteresurur uram ati dib kum teneraming. Sun ato kuramingnyi nang ara a uram ati, “Lub talebdob nang uram ato,” teneraming. Er Imtamnyi Kanya aryi eteresur uram ara Er Imtamnyi Kanya asi dobdobmangnyi nang akwe bingdonung. A deyok aryi, sun tukwetam kanya bon nang aryi a uram deyok kum bingdonung. 15Er Imtamnyi Kanya asi dobdobmangnyi nang ara utotoa nirya liliboka, “A dinyi ara teleb do malyi do?” tenen wimdeiriraming. Ato tenen kuraming asi yuk nang aryi sunsi, “Malyi kubmarum se,” eboka tatab-tatab ena kum kuraming. 16A dinyi ara Er Imtamnyi Uram umbura aryi esurur to kurur.

“Er Imtamnyi bira Iya Erebdobnyi kurur deyok aryi, unanyi-unaner ara Er tenen kanya bikmote do?

Nun Nai bira iya bikdobnyi kurur deyok aryi, unanyi biryi Ersi, ‘Eterebkitinyi,’ ebmote do?” ebmou. (Yesaya 40:13)

Ba, nunda dib tenen nang ara Er Imtamnyi Kanya Roh Kudus biriman aryi Kristus dam kun nang kunub ati, nunci nun Du Yesus Kristus biryi iya bikdob tenen dinyi bingdonub.

Currently Selected:

1Korintus Uram 2: MTG

Highlight

Copy

Compare