Esther 1
1
1Mha hau Ahasurus teiki chüta, Ahasurus-e India nunu vo Ethiopia#1:1 Moro Nubia; Ibri Kush. ketso, rüna krie puo di mepfüethenie mho kedi chü. 2Süteiki kediu Ahasurus-e Susa seluoba nu puo kediba gei ba. 3Puoe dikelie cie se cie, puo kedinuoko mu puo kituoko, Persiamia tsiu Mediamia chüpahi mhokezhako, pehüko siro rüna mho ahngko la thehe puo chü, mu uko vor puo mhodzünu keba ki, 4puoe teisozha kekra se, teisozha krie puo di hiethetha, puo kedi vipie thedze chükecü mu kinyi se uko pekie. 5Sidi teisozha süko tseita tse, kediue Susa seluoba nu keba pete la, kezhamia rei tsiu kecümia la rei thehe puo chü, thehe süu zha thenie chü, kediu zie puozhau nunu chü. 6Sünu pfhe krapouikecü, kepejo tsiu teimeziekecü pie linen tsiu pfhe krükecü gei phalie di se vo rakachü kechü puo kemetou#1:6 Moro seiro. nu tsiu marbel coko gei khe; siro yakouzhüu suna mu rakachü se chü, süko pie marbel kemetou tsiu teimeziekecü, tsiu krapouikecü, mu teimekiekecü pie khrapiekezha gei shüpie zhü. 7Suna hiedouko nunu krie, tsiu mha hiedouko puo rhi kekreikrei mu kediu kenyi ki ze kedimia zu kekra khashü. 8Süu kekrie ki thezho se di krie, miapuorei mia puo kemvü chü mo, kekreilamonyü kediue puo kediki nu kezhako ki u thuo u menguu rhi nunu se morokesuo puwaketa la. 9Siro Vasti kedipfü rei Ahasurus kediki nu thenumia la thehe puo chü.
10Teisozha thenie nhie, kediue khubezu krie di puo dzüle keba ki, sie puo mhodzünu puo lie chüyakezha iunukmia thenie Mehuman, Biztha, Harbona, Bigtha, Abagtha, Zethar mu Karkas uko ki diekhashü. 11Kedipfü Vasti bu puo keditsüre selie di kediu mhodzü vor puo zivi pie themiako mu kedinuoko pekieshünuta, kekreilamonyü puoe ngu zivithorcü la. 12Derei Vasti kedipfüe kediu puo liethoko ki diekhakeshüu ze mvüta; süla kediue puo nei mo seta, tsiu puo nou meyiepie puo nou rüdata.
13Sitse kediue thezhoko silieyakezha mhakesiko rüchü di sie (kekreilamonyü kediue thezho mu kethoca dze kesimia gei sükemhie chüyakezha la. 14Siro puo siesomia Karshena, Shethar, Admatha, Tarshish, Meres, Marsena, mu Memukan, Persia siro Media kedinuo thenieko, ukoe kediu mhodzünu baya, siro puo kediba nu therietho chü baya.) 15“Thezho-u medzi ro, Vasti kedipfü pie kedipuo chüwa ro vituo shi, kekreilamonyü puoe kediu Ahasurus puo kituoko ki ketsekeshü dieu ze mvüte eru.” 16Sitse Memukan-e kediu mu kedinuoko mhodzü nunu sie, “Vasti kedipfüe kediu rübei gei kekrükewa zo moü kedinuoko pete gei, tsiu kediu Ahasurus rüna nu themia pete gei kekrüwate. 17Kekreilamonyü kedipfü mhatho hau thenumia pete rei silietuo, ‘Kediu Ahasurus kedipfü bu puo mhodzü vornu diekhashü derei puo vor mote,’ ikecü ukoe silie tse, uko mhiki uko nupfunuo ngu mecütatuo. 18Sünhie yawinu Persia mu Mediamiapfüko kedipfü dze si tse, ukoe kediu nuonuo pete ki sümhiecü putatuo, sidi ngukemecü kratatuo mu noupfhü kere sietatuo. 19Kediu bu puo medo liro, puo bu kediu die khashücie, mu süusü Persia siro Mediamia zho chüwa di kediwa molieketuo nu thuwacie, Vasti bu Ahasurus kediu mhodzü la vor sa motalie; tsiu kedipfü thau pie puo ki vikuokecüpfü puo tsüwalie. 20Kediu thezho chükeshüu pie puo kedirüvie rüna pete nu pesikeshü ki, (süue mha kezha puo) mianupfünuo pete rei u nupfunuo, kezha shierei kecü shierei, therhu pie tsülietuo.” 21Kediu mu kedinuoko pete rei die süu u nei phreta; tsiu kediue Memukan die tuoi chüshüwa. 22Puoe leshü thupie puo kedirüvie pete nu, rüna puopuokecü u thuo u leshükhuu geinu, u thuo u die nunu, thepfumia kehoupuorei puo kinu mha kekhakelie mese zo üwa, mu süusü themia pete die nu thushülie morosuo ükecü chüshüwata.
Currently Selected:
Esther 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More