Esther 2
2
1Mha hako sie, kediu Ahasurus puo noupfhü rükreta tse, puo Vasti pfü kedipuo chüwa shi mu hapfü pejo di puo gei mhakikecüpuo chüwa shikecü dze rükra bata. 2Sitse kediu kituoko mia puo sie puo ki, “Kediu la rüü phouse kezivi pfhücie. 3Tsiu kediu bu puo kedirüvie rüna pete nu kezhamia kedalie di uko bu rüü phouse kezivi khe pfhü kengu se Susa seluoba nu kediu khrokezhau thenumia pfhe bayakezhau Hegai, kediu iunuk ki ze vorliecie, sidi uko chü keziviketuo vieko khashülie. 4Sidi rüü supfü puonie kediu nei chülietie shi, süpfü bu Vasti sou nu kedipfü chütacie,” sishü mu mha süu kediu puo medolie, süla puoe sükemhie chülie.
5Süteiki Susa seluoba nu Judamia puo ba, puo za Mordekai, puoe Jair nuo, Shimeiu nuo, Kish nuou, Benjamin yiemia puo. 6Kish-e#2:6 Ibri Süu Benjaminmia. Jerusalem nunu Nebukadnezar, Babilon kediu bu tezeketa Jekonia, Juda kediu ze di kediemia teze voketa ki puo sa teze vota. 7Puoe Hadasa, süpfüsü, Esther, puo nieu nuopfü theke se siershü kekreilamonyü puoe puo puo morei puo zuo rei jü; rüüpfüe zivi tsiu mesümede-i; puo puo mu puo zuo siaketa ki Mordekaie hapfü üse puo nuo tuoi thekelieta. 8Süki kediu diekhashü mu thezho-u se pesikeshü ki, mu rüümia kekra Susa seluoba Hegai thenumia kepfheu kebachüu nu vorkelie ki, Esther rei ze kediu kinu, Hegai thenumia kepfheu kebachüu nu vorlie. 9Sitse rüüpfüe puonei chülie, siro puo khriepfülie; tsiu puoe hapfü chü kezivi ketuo la kediu ki nunu puo tierko mu kecüca puo ya meseko, siro kedakelie chaliemiapfü thenie sa di uko pie thenuko ki kevitho-u nu shüwa. 10Esther-e puo themia morei puo seyie pie kiewa mo; kekreilamonyü Mordekaie puo bu süu pu hienuwacü la. 11Tsiu puoe teisonhie Esther kedipuo mhie ba shi, mu hasie puo gei kiütatuo shikecü silieketuo la, thenumia keba kiu kitie mhodzünu vo seiya.
12Rüümia puopuo bu kediu Ahasurus ki le ketuo tei kevor-e, u bu khrü kerekenie u chü kezivikecü bawa diya; kekreilamonyü süteiki u chü keziviketuo la khrü sorou mür tier mu khrü sorou mha kethengu se thekekecü chüya. 13Rüüko kediu ki lekecü ki, thenuko kiu nunu puoe kedipuo se vo nyü shiü süu pie puo tsüya. 14Rüüpfüe thevatie sünu letaya, siro puoe khise la par di Shashgaz, kediu iunuk-u bu mehoyakezha kediu zepfüko bayakezha thenuko ki kenieu nu votaya, mu kediu thuo puo ngupie puo nei di puo za kie la zo kemosie, süpfüe kediu ki la leya mo.
15Siro Mordekaie puo noupra mhie di thekekelie, puo nieu Abihail nuopfü Esther-e kediu ki leketuo puo mese tei vorlie tse, puoe Hegai, kediu iunuk, thenuko kemeho-u ki puo chatha die zo kemosie mha kekrei puorei cha mo. Sitse Esther-e puo kengu khe neipfülie. 16Sidi khrü ker-u, süu Tebet-u khrü, Ahasurus kedi chükelie cie thenie cie, Esther ze kediu ki nu vor. 17Kediu sü thenumia pete ki rei Esther khrieta, tsiu kediu mhodzüki rüü phouse peteko donu hapfüe puo khriepfülie mu puo nei chülie, süla puoe keditsüre pie hapfü tsügei shü, sidi Vasti sou nu puo bu kedipfü chüta. 18Süsie kediu kedinuonuoko pete, mu puo kituoko la thehe kezha puo keseshü, “Süue Esther theheu,” tsiu kedimia zho tuoi puoe puo rüna nu kerülei#2:18 Moro mechüu kejokeva. khapie themia tsü, mu mephruomevuo di mha methuo pie mia tsü mia za.
Mordekaie Mharhü Kesuo Dze Se Pesikeshü
19Siro rüü phouseko va kenieu vor kengukelie ki, Mordekaie kediu care ki ba. 20Mordekaie Esther ki kepu tuoi, puo tsie rei puo seyie morei puo themia suomia shikecü thashüwa mo zoluo, kekreilamonyü Esther-e Mordekai puo theke sierkeshü ki tuoi, puo pukeshüu medzi ba zo. 21Süteiki Mordekaie kediu care nu bakecü ki, kediu khro kezhamia kenie-e Bigthan mu Teresh kikha pfhe thayakezhanie, unie nou meyie ba mu kediu Ahasurus dukhriwakecü#2:21 Ibri Gei u dzie yhashütuoü. pfhü ba. 22Mu mha hau dze Mordekaie silie tse, puoe süu pie Esther kedipfü ki pushü; mu Esther-e Mordekai za nunu süu dze kediu ki pushü. 23Mu mha hau dze ketso kesie ki, süu kethokecü silieta; süla unie kenienie gouwa; süu thupie thedze leshüda nu zhü.
Currently Selected:
Esther 2: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More