Joshua 24
24
Joshua Die Thelako
1Sitse Joshuae Israel seyie pete pfhü kengu ze vo Shekem nu shülie, di Israel phichüko, krütako, capiko mu kezhamiako kieshü ru ukoe Kepenuopfü mhodzünu vorlie. 2Sidi Joshuae themia peteko ki, “Jihova Israel Kepenuopfüe puya: Thiedzütho nie puonuoko, Tera, Abraham mu Nahor unie puou, uko Eufrat rü lutsakhie lhou, sidi ukoe terhuo kekrei lie chü vor. 3Derei a Kerü lutsatienu nie puo Abraham ze Kanan kijü pete pfüthe vorshü, sidi puo nuolhou chü pekrashü. A Isak khapie puo tsüshü; 4mu ae Jakob mu Esau khapie Isak tsüshü. Siro ae Seir kijüthou rünau Edom khapie Esau tsüshü, derei Jakob mu puo nuonuoko we Ijipt nu tsuta. 5Kenuotsa a Mosa mu Aron unie ketseshü, tsiu ae sünu mhachüshü di Ijipt pechüpenyüshü; sidi nieko ze parshüte. 6Ae Ijipt nunu nie puonuoko ze parlie, di nie bu dzükezha nu vorlie, tsiu Ijiptkoe kierbagei mu kier geinu nie puonuoko whuo zo Kemerie Dzükezha#24:6 Moro Tekhrie Dzükezha. nu vor tso. 7Derei ukoe Jihova ki uko mezhiemeloshü tse, puoe kezei khapie Ijiptmia mu uko donu shü, sidi dzükezha bu kru tsur uko vuwa; ae Ijipt nu kedipuo chüshü shikecü nie mhipie ngu. Süsie niekoe teicie kekra rayha nu lhou. 8Ae nieko ze Jordan niathutsa lhou keba Amorko kijü nu vorshü; ukoe nie ze kegei, derei a uko khapie nieko dzie nu shü, mu ae nie mhodzünu uko pekawa; tsiu niekoe uko kijü pevielie. 9Siro Zipor nuou Balak, Moab kediu, Israel ze kegeituoü sie, sidi nieko rüsewaketuo la mia ketsepie Beor nuou Balam kie, 10derei ae Balam pfhe rünyü mvüta; süla puo bu japie nieko tsü; sidi a puo dzie nunu nieko kelashü. 11Siro niekoe Jordan ciese Jeriko nu vorlie, Jeriko themiako nie ze kegei; sütuoi Amorko, Perizko, Kananko, Hitko, Girgashko, Hivko; mu Jebusko rei nie ze kegei; derei a süko pete khapie nie dzie nu shüshü. 12Ae nieko mhodzü pfhidi ketseshü di süko bu nie mhodzü vo Amorko kedinie whuowa; süu n zhiecha mu n theü se chülie mo. 13Nie mhachü kemezhiekecü nunu ngulie kemo kijü puo, mu nie thuo chü kemo rünako se nie tsüshü; mu nie süko nu lhou bate; sidi nie pelhoushü kemo khubelie mu oliv lie nunu puo si riecü bate.”
14“Süla tsie Jihova preilie mu nie nou nie thochü di puo lie chülie; nie puonuokoe Kerü khie kekreitsa mu Ijipt nu terhuo lie chü kevorko khawalie, sidi Jihova lie chülie. 15Siro Jihova lie kechü nieko mhodzüki mha kesuo üro, nie supuo lie chütuo shiü thie nie thuo kedaliecie, nie puonuoko Kerü khie kekreitsa nu terhuo lie chü kevorko tuo mo, nie u kijü nu keba Amormia rhuoko tuo shi; derei a mu a kikru zowe Jihova lie chü zotuo.”
16Themiakoe la sie, “Jihova khawa di terhuo kekrei lie chütaketuo nouleu bu hie penuo hie zocie! 17Kekreilamonyü Ijipt kijü nu miadie kechü nunu hieko mu hie puonuoko ze parkelieu sü Jihova hie Kepenuopfü thuo zo, puoe hie rüve cha pete nu mu hie vokecü seyieko pete donunu hie pekruse vorshü zo, 18mu Jihovae hie mhodzünu seyieko pete whuowa, sizomonyü rünau nu lhou keba Amorko rei whuowa. Süla hie rei Jihova lie chü zotuo, puoe hie Kepenuopfü zocü la.”
19Derei Joshua la sie themiako ki, “Nieko Jihova lie chülie kenjü; puoe kemesa Kepenuopfü. Puo rokenyi Kepenuopfü puo zo. Puoe nie vajokewako morei nie kephouma vashü nie tsülie lho. 20Nie Jihova khawa di kekreimia rhuoko lie chüta ro, puoe nie gei mha kevi chüshü kevor nunu rürei la vor nie pechü mu nie pekapejüwatuo.” 21Sirei themiakoe Joshua ki, “Mo, hie Jihova lie chü zotuo!” sita.
22Sitse Joshuae themiako ki, “Nie Jihova lie chü zotuo üdi puo kedalieta ketho ükecü nie thuo nie zhapuko zo ho,” sishü ru ukoe sie, “U zo, hie-e zhapuko zo.” 23Sitse Joshuae sie, “Sizo üliro, tsie nie donu miaramia rhuoko khakegewalie, sidi nie nou khapie Jihova, Israel Kepenuopfü kitsashülie.”
24Themiakoe Joshua ki, “Hie Jihova hie Kepenuopfü lie chü zotuo, mu hie puo diekhakeshüko ze zotuo.” 25Süla Joshuae sünhie, themiako ze dietseidiekho puo chülie, sidi Shekem nunu uko la chünukecüko mu pethokeshüko khashü. 26Tsiu Joshuae die hako pete pie Jihova zho leshüdau nu thulie. Sidi puoe ketsie kezha puo pielie di, Jihova Kemesachüu nu phriebo puo khro nu ketsieu seshü. 27Sidi Joshuae themiako ki, “Meholiecie, ketsie hau bu u petsoukecü zhapupuo chütuo; we Jihova die u ki pukeshü peteko siliete; süla nie nie Kepenuopfü gei tijüta liro, hau bu nie kepetsou zhapu puo chütuo.” 28Süsie Joshuae themiako ketsepie u thuo u kayieko nu shüwa.
Joshua mu Eliazar Unie Se Dze
(Capi 2:6-10)
29Mha hako tseiketa sie, Nun nuou Joshua, Jihova kituou cie krie puo di kerta di siata. 30Sidi ukoe Gash Kijüthou peso kevatsa, Efraim kijüthou rüna nu, puo kayie kijü Timnat-sera nunu puo khruwa.
31Joshua kerhei chie, mu puo ze kelhou phichüko, Jihovae Israel la mhachükeshü pete si mu ngukecüko kerhei ki we Israelko Jihova lie chü vor.
32Siro Israelko Ijipt nunu se kevor Josef ruko pie Shekem nu khruwa mu süu Jakob-e Shekem-nuo puo Hamor nuoko kinu raka krie puo#24:32 Ibri Kesitah krie puo. pie khrükelie kijüu; mu kijü süu pie Josef nuonuoko kayie vie chüta.
33Siro Aron nuou Eliazar rei siata, di ukoe puo pie Gibia nu, puo nuou Finehas ketsü kijü, Efraim kijüthou rünau nu khruwa.
Currently Selected:
Joshua 24: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More