Johan 20
20
Jisu Rheilasieketa
(Mat 28:1-8; Mark 16:1-8; Luk 24:1-12)
1Siro zhadoudo zha therie nhie teizei baluocü nu Maria Magdalapfü mekhruu nu vo ru mekhruu nunu ketsieu ketoukewa ngulie. 2Sitse puo ta Simon Pitor mu Jisue puo khrie kevor pethakelie kekreiu ki vo di, “Mia mekhru nunu Niepuu toupiete, mu puo pie kirapuo zhüwa shi hie si mote!” 3Süsie Pitor mu pethakelie kekreiu mekhruu tsatie va vota. 4Unie keze ta vozhü tse pethakelie kekreiu Pitor mhodzü rie vo mekhruu tsolie. 5Puo nuketsu ru linen pfheko kezhü ngu, derei puo tuo le mota. 6Süsie nu Simon Pitor vor tsolie di mekhru nu le, puo rei linen pfheko kezhü ngulie, 7mu Jisu tsü kedze pfhenyhieyo, linen pfheko kezhü ki zhü mo di rüzi vo krei zhüketa ngulie. 8Süsie pethakelie kekreiu vor mekhruu tso riekelieu rei mekhru nu le, mu puo rei ngu di pelelie. 9Unie puoe kesia nunu rheilasie morosuokecü kethodieu silie mo zoluo. 10Sidi pethakelienie tuo la unie kinu vota.
Jisu Maria Magdalapfü Pengukeshü
(Mat 28:9-10; Mark 16:9-11)
11Derei Maria mekhruu khieki nu kra tha. Puoe kra chakhra nuketsu mekhruu meho; 12sitse teigeidieliemia kenie pfhe kekra se di Jisu pie kezhü chüu nu, mia puo puo tsütsa mu kekreiu puo phitsa keba ngu. 13Sitse unie sie puo ki, “Thenupfü no kiüdi kraya ga?” Puo sie unie ki, “Mia a Niepuu chüpiete, mu uko puo pie vo kirapuo shüwate shi a si mote.” 14Sishü di puo reipra tse Jisu süki ketha ngulie, derei puo süu üse Jisu ücü si mo. 15Sitse Jisu puo ki, “Thenupfü, no kiüdi kraya ga? No supuo pfhüya ga?” Puo süu üse tezie kepfheu nhie di sie puo ki, “Kezhau, mhanuü no puo toupieta üro, puo pie vo kirapuo zhüwate shi a ki pucie, sitse a puo pielietatuo.” 16Jisu sie puo ki, “Maria,” si. Sitse puo reipra Ibri#20:16 Süu, Aramaik. die nunu puo ki, “Raboni!” (puoca kepethau) ita. 17Jisu puo ki, “A nyü hiecie, kekreilamonyü a tsie rei Puou ki vo moluo. Derei no vo di a siezeko ki ‘A a Puou mu nieko Puou, a Kepenuopfü mu nieko Kepenuopfü ki khotazhükecü pushücie.’ ” 18Sitse Maria Magdalapfü vo di puoe pethakelieko ki, “A Niepuu nguwe,” ishü mu puoe puo ki mha hako pu üdi pie uko ki pushü.
Jisu Pethakelieko Pengukeshü
(Mat 28:16-20; Mark 16:14-18; Luk 24:36-49)
19Siro zhadoudo zha therie nhie thevatie pethakeliekoe kese, mu Judako keprei la kikhapfü di keze kehoukengupfü ba, süki Jisu vor uko donu thalie di sie, “Nieko keviu chüliecie.” 20Puo hau pukeshü sie, puo dzienie mu puotie rei pie uko pekieshü. Sitse pethakelieko Niepuu ngushü di uko nei phita. 21Jisu la sie uko ki, “Nieko keviu chüliecie. Puou a ketsekeshü tuoi, a rei nieko ketseshü ho.” 22Puo die hako pukeshü sie hapie uko gei shü di, “Kemesa Ruopfüu lieliecie. 23Nieko mia kejo vapie tsüwa ro, süko vawata zo; nieko mia kejo vapie tsü moro, süko ba zotuo.”
Jisu mu Thoma
24Derei Jisu uko ki kevor ki Thoma (Nuobi#20:24 Gk Didymus. ükezhau) kerekenieko mia puo uko ze ba mo. 25Süla pethakelie kekreiko sie puo ki, “Hieko Niepuu nguwe,” ishü. Derei puo uko ki “A a thuo puo dzienie nu gojalpfüko ngu, mu a dziekinuo pie gojalpfüko nu shü zo kemosie a pelelie lho.”
26Siro zhadoudo puo sie pethakelieko Thoma sa di keze ki nu ba. Uko kikhapfü ba, derei Jisu uko donu ler thalie di sie, “Nieko keviu chüliecie,” si. 27Süsie puo sie Thoma ki, “N dziekinuo pie hanu shücie mu a dzienie meholie, siro n dzie yhapie a tie biecie. Sidi kenoudota mo di pele zolie.” 28Thoma sie puo ki, “A Niepuu mu a Kepenuopfü,” sita. 29Jisu puo ki, “No a ngukelie la pelelie me? Ngu mo di pelekelieko we thejakepfütho zo.”
Leshü Hau Thukelie Ca
30Leshü hau nu thupie tuo kemo zasi kekra Jisue pethakelieko kengu kinu chü sashü. 31Derei mha hako thukelie nie bu Jisue Khristau, Ukepenuopfü Nuou ükecü pelelie#20:31 Leshü kewe huo nu pele zotuolieketuo la. mu puo pelelie di puo za nunu kerhei ngulieketuo la zo.
Currently Selected:
Johan 20: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More