Johan 19
19
1Süsie Pilat Jisu ze vo di puo vüwa. 2Tsiu rüpfhünuokoe zohu kechielie di tsüre puo chüpie puo tsü gei shü, süsie uko pfhenei meriemegekecü puo pie puo bu selie; 3sidi uko puo ki phirür di sie, “Harie, Judako kediu!” Sidi uko dziezhü shüpie puo vü. 4Siro Pilat la par di uko ki, “Harie, a puo kejo puorei ngulie kemo nieko bu silieketuo la a puo ze nieko ki partuoüzhie ho.” 5Sidi Jisu, bu zohu tsüre pfü mu pfhenei meriemegekecüu se di tuo par. Sitse Pilat uko ki, “Themiau sü harie!” 6Siro zievokezhako mu thenako puo ngushü tse, shiekhoui di, “Puo gouwacie! Puo gouwacie!” sita. Pilat uko ki, “Nieko thuo puo ze vo di puo gouwalie, a we puo pejolieketuo ca puorei ngulie mo ho.” 7Judako puo ki, “Hie thezho puo ba, mu thezho süu medzi liro puo sia zhüte, kekreilamonyü puoe puo thuo puoü Ukepenuopfü Nuou üdi pute.”
8Pilat hau sikelie ki, puo michie mieita. 9Sidi puo kediki#19:9 Gk Praetorium. nu la le Jisu ketso di, “No kirapuo nu vor ga?” si. Derei Jisu puo ki mhapuorei pu la mota. 10Süla Pilat puo ki, “No a rüchü lho me? A n khashüwalie kevi mu n gouwalie kevi kekuo bakecü si mo me?” 11Jisu puo ki, “Peso geinu kha n tsü kemo we no a gei kekuo puorei balie lheciü, süla a tepie n dzie nu keshüu kephouma rekuo.” 12Sitse sü yawinu Pilat puo khashüwaketuo pfhü sie, derei Judako shie di, “No themia hau khashükewa sie, no Kaisar khriethomia mote! Kehoupuorei puo thuo puo üse kedimia üyakezhau sü Kaisar kepetsoumia zo!” sita.
13Pilat die hako silie tse, Jisu ze parlie, di puoe dienya kecüyakezha Ketsie Badze morei Ibri#19:13 Süu, Aramaik. die nu Gabatha üyakezha gei thebau nu balie. 14Sünhie Ciekevonyi la Mha kesekecü teisozha; mu süki khinhieluota. Puo sie Judako ki, “Harie nieko kediu sü!” 15Sitse uko shiekhoui di sie, “Puo bu ba hie! Puo bu ba hie! Puo gouwalie.” Sitse Pilat sie uko ki, “A bu nieko kediu gouwatuo me?” Sitse zievokezhako sie, “Kaisar sie hie kedi kekrei jü,” sita. 16Süla Puo uko bu Jisu gouwaketuo la puo khapie uko tsüwa.
Jisu pie Krus geinu Goukewa
(Mat 27:32-42; Mark 15:21-32; Luk 23:26-43)
Süsie uko Jisu ze tuota. 17Sidi puo bu puo krus pie di thechü puo puo za Tsütsoru, Ibri die nu Golgatha ükecü nu vota. 18Sükinu uko puo gouwa, Jisu bu metsuo mu puo khie lutsahatsa mia kenie sa puo ze gou. 19Pilat-e mhapuo thu sapie krus gei shü. Süu “Nazaretmia#19:19 Gk nu Nazor-u. Jisu, Judako Kediu,” si. 20Judamia kekra rei thukeshü hau phrü, kekreilamonyü Jisu goukecü chüu nadiu kepenuokicü la; mu süu Ibri, Latin, mu Grik nu rei thu. 21Sitse Judamia zievokezhako Pilat ki, “Judako kediu idi thu hiecie, ‘Themia hau puo thuo a Judako Kediu iya.’ ” 22Pilat sie, “A thuwaketau thuwate,” sita. 23Siro rüpfhünuoko Jisu goukewa sie, puo pfhenei pielie mu süko kezapie za dia chülie di uko mia puo za puopuo lielieta. Uko puo pfhenei rei rhuolie; puo boulieu puo terhü sa mo di puo tsü nu do tsu puo phi tso. 24Süla uko kerüchü di sie, “Úko hau, rhawa hieü, supuo zanu partuo shiü pie dape khe,” silie. Hau chüketa kethodie nu
“Uko thuo uko donu a pfheneiko kezalie,
mu a boulieu dapeliete,”
ipie kezhü dieu bu tseilieketuo la zo. 25Chüpahiko mha süko chü.
Siro puo zuo, puo zuo siezepfü, Klopa kimia Maria mu Maria Magdalapfü rei krus khieki tha. 26Siro Jisue puo zuo mu puoe khrie kevor pethakelieu rei süki ketha ngu di sie puo zuo ki, “Thenupfü, n nuou sü cüge.” 27Süsie puo pethakelieu ki rei, “N zuo sü cüge.” Sü yawinu pethakelie süu süpfü bu puo kinu bataketuo la puo ze vota.
Jisu Se
(Mat 27:45-56; Mark 15:33-41; Luk 23:44-49)
28Mha hako sie Jisue mha peteko chü tseilieketa silie di (Kethodieu bu tseilieketuo la), puoe sie, “A terhüte,” sishü. 29Süki mhabou puo nu khubedzü kekhro pie tshukecü puo ba; süla uko sponj pie sünu selie di hisop sei geinu pie puo me nu khashü. 30Siro Jisu kekhrodzüu krielie tse sie “Tseite,” sishü. Süsie puo tsünge tsu di puo ruopfü khashüwa.
Rüngou pie Jisu Zekecü
31Siro sünhie Mhakesekecü zha, süla Judako sabat nhie themo-u bu krus gei zha nyü mota, sabat-e teisozha kemesa puocü la. Süla uko Pilat ki uko bu goupiekezhako phi dutshewa di themoko lhouwaketuo chalie. 32Süla rüpfhünuoko vor di Jisu sa goupiekezhanie therieu mu kekreiu phi dutshewa. 33Derei uko Jisu khieki phir tse puo siaketa ngulie, süla uko puo phi dutshe mota. 34Derei rüpfhünuoko mia puo puo ngou pie Jisu tie zeshü, sitse thezie mu dzü kru mha parta. 35(Nie bu pelelieketuo la mha süu chüketa kenguu thuo hau zhapu chüshü. Puo zhapu süu ketho zo, mu puo ketho-u pu ücü si ba.) 36Mha hako chüketa kethodie nu, “Puo ruko puo rei bietshewalie lho,” ipieketuo dieu bu tseilieketuo la zo. 37Süsie rei kethodie nu die kekrei puo, “Uko thuo rüngou pie zewaketau meho zotuo,” sipie zhü.
Jisu Khrukewa
(Mat 27:37-61; Mark 15:42-47; Luk 23:50-56)
38Mha hako sie, Josef Arimathiamia puo Pilat ki vor di Jisu mo-u chata, puo Jisue pethakeliemia puo, derei puo Judako keprei la pekhre tuoya. Pilat puo bu pielie kevi chüshü, süla puo vor di puo mo-u pielie. 39Nikodema, tsie mhodzü theva zenu vo Jisu ze kesekecüu rei mür mu aloes kesa sher hiepengou mese pie vor. 40Unie Jisu mo pielie di Judamia kesia kekhruzho-u medzi di kethengupfü sa di linen pfhe pie themo-u kezülie. 41Jisu goukewa chü süki tezie puo ba, mu tezie sünu miapuorei khru mo zoluokecü mekhru kesa puo zhü. 42Sünhie Judako Mhakesekecü teisozha, mu mekhruu süki ba zocü la unie Jisu pie sünunu khruwa.
Currently Selected:
Johan 19: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More