Pethakeshüu 12
12
1N khriesa zhako nu n pelhoukeshüu rükralie, teisozha kesuoko vorkecü mhodzü, tsiu teicieko penuo vorkecü mhodzü, noe sie, “A süko nu mha a kenei ba mo” iketa mhodzü; 2niaki mu kezie, tsiu khrü, mu themvüko zeibouitakecü mhodzü, tsiu kimhouko teirü sie la vor#12:2 Moro puo sie! Ibri ahar. kemonu, 3teisozha sünhie kipfhemia perüsatatuo, tsiu kekuomia nuketsutatuo, tsiu mha geyakezhapfüko themia tsaketa la rüleitatuo, tsiu khirki nu mha mehokezhamia mha ngu merütatuo, 4Tsiu chaü nu kikhako khawatuo, mhakege pfhe tsaketa ki, tsiu mia puoe pera pfhe ze di sietatuo, tsiu tsali kechüpfüko chü kerünuoketa ki; 5mha kerükrie rei preiketa ki, tsiu kemichie-e cha nu tuota, mu almond pou parta, mu ku u pelhata, tsiu u kemenguu chülie mota; kekreilamonyü themiae kechachie kiu nu la votatuo, tsiu thekrü chüyakezhako chaüko nu rühou tuoketa ki, 6rakachü rhü phreikeshü, morei suna khou bietshakewa, morei dzükhou nu lipfhüu biephrokewa, morei puothuou puo bou nunu biephakewa mhodzü, n pelhoukeshüu rükraliecie. 7Thiedzü tuoi nyopheu kijüu ki la votatuo, tsiu thesüu#12:7 Moro ruopfüu. Ukepenuopfü ki la votatuo. 8Kemethuo sie rei kemethuo zo; Pethakeshüue#12:8 Ibri Qoheleth, kepethau idi se vor. puya; mha peteko kemethuo zo.
Thela Die
9Pethakeshüu mhasikecü rübei monyü, puoe tsie rei mha kesikele pie themia pethaya, uwe, puoe mha leshü sidi pfhüse parlie, di mhasidie kekra pfhü kesiesoshüte. 10Pethakeshüue die u keneiko pfhüshü tsiu thupie kezhüko mezhü zo, süko ketho dieko zo.
11Mhakesimia die-e kethe kemethe mhie, tsiu kehou nu kepethamiae gojal pie zhie kesakeshü, tekuokepfhemia puo kinu khakeshü kengukelie dieko kemhie: 12A nuo, mha hako mho rei menuoliecie, leshü kekra chükeshü puo thela tuo mo; tsiu leshü phrüthor rei uchü umo mezietaya.
13Mha thelau pete rünyüliete; Ukepenuopfü preilie, tsiu puo diekhakeshüko chüüzelie, hau themia chü morokesuo mhatho peteu zo. 14Kekreilamonyü Ukepenuopfüe mhatho pete, kepekhre nu vie pete, mha kevi rei kesuo shierei se dienya kecükecü ki vortuo.
Currently Selected:
Pethakeshüu 12: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More