Mhakechüko 22
22
1“Kezeko mu a puonuoko, tsie a kitsa dieu rünyüshücie!” 2Siro puo Ibri#22:2 Süu, Aramaik. die nunu uko ki die puta tse uko kemekrie sakuota. Sitse puo sie:
3“A Judamia puo zo, Kilikia nu Tars nunu penuolie, derei rüna hau nu Gamaliel dzie nunu u puonuoko zho touu pie a pethapfülie di nieko thie haki kethako mhiei Ukepenuopfü kitsa a rhiechü kesiermia zo. 4Ae Chau medziyakezhako pechü di uko bu kesia ketso rei tuo üsie, sidi thepfu rei thenu rei tepie kedieki nu shü, 5süusü zievokezhatho-u mu mechükehou nu phichüko pete rei a zhapu chülie vi. A uko bu thupie u themia Damaska nu kebako ki keshü leshüko rei ngulie, süla ae sünu vo di themia süko teze vor Jerusalem nunu pechüketuo le tuo zo.
Paul Puo Nou Kedikelie Dze Kepu
6“A Damaska penuo vozhü tse, khinhieluo ki ziekruoicü puo teigei nu tsur a khie lutsahatsa va pezieta. 7Sitse a te kijü tsuta, tsiu mhapfhe puo sie a ki, ‘Saul, Saul! No kiüdi a peseya ga?’ idi kepu si. 8Süki a sie ‘No supuo ga, Niepuu?’ Sitse puo sie a ki, ‘A Nazaret#22:8 Gk Nazor-u. Jisu, no puo peseyakezhau zo,’ sita. 9A ze ketuo themiako rei kezieu we ngu, derei uko a ki mha pukeshü pfheu we si mo. 10Sitse a sie, ‘Niepuu, a bu kedipuo chü ta?’ Sitse Niepuu a ki, ‘No sielie di tuo Damaska nu lelie, sitse sünunu n bu chütuo üdi rhüpie ketuoko pete pushütuo ho,’ sita. 11Kezie süu bu a rüpie mha ngulie mota di a ze ketuoko bu a dzie teshü di Damaska nu le.
12“Anania ükecü thezho ze pecü phiyakecü puo ba mu Judamia sünu keba khe rei puo rhu phiyakezha puo, 13a ki vor; mu a khieki thalie di, ‘A siezeu Saul, no mha ngu laliecie.’ Sitse sütei touki a mha ngulie mu puo ngulie. 14Ru puo sie, ‘U puonuoko Kepenuopfü n kedapie n bu puo medo silieketuo, tsiu kemiatho-u ngulieketuo mu puo tie nunu kepar puo pfheu rünyütuoü rhüse tuote; 15süu n bu themia peteko mhodzünu no si mu nguketako zhapumia puo chülietuo. 16Süla no tsie kiüdi pfhe ba zo ga? Sielie, di dzülupfülie mu puo za nu n mezhiemelo di n kephoumako khrüwalie,’ sita.
Judakemomia la Paul Kiekelie
17“A Jerusalem nu la tsurta, di rüsuokiu nu kecha chü ba tse, a sie si mo zhüta. 18Süki Jisu ngu ru puo a ki, ‘No rükri Jerusalem nunu tuotacie, hanu themiako no a zhapu chükeshü lielie lhotakecü la.’ 19Sitse a sie, ‘Niepuu, uko a vo di Sinagog kheko nu n kepeleko telie di vü reiwaketa si ba. 20Siro Stefan n zhapuu zie pekrukeshü ki, a rei a medo zokecü la süki tha di puo kedukhriko pfhenei pfhe tha zo.’ 21Sitse puo a ki, ‘Tuoshüliecie, a n ketsepie kepecie nu Judakemoko ki shütuoükezhü la,’ ” silie.
Paul mu Rommia Nyiemhokezhau
22Ha ketso zowe uko puo die rünyü tha; süsie uko shie u rhiechü di, “Kijü nunu themia haicümia chüwalie. Puo bu lhou tuokecü mese mo,” sita. 23Siro uko shiekhoui di u pfhe rhuo kelhouwa di nyophe bie kelhoupie teikhrie nu shü vüta tse, 24Rommia nyiemhokezhaue Paul ze chüpahiko ba nu lelie mu seiro pie puo vü di Judako kedipuo la puo ngumvü hathede chüte shicü ketsolienuwa. 25Derei uko kero pie puo phalie di puo vütuo ükesie ki Paul süki kriemhokezhau ki, “Rommia puo zorei puo kejo ngulie kemonu vükecü thezho nyi me?” sita. 26Sitse kezhau die hau silie tse, vo nyiemhokezhau ki, “No kituoü tha ga? Themia hau Rommia puo zo,” ishü 27Süla nyiemhokezhau Paul ki vor di, “A ki pushücie, no Rommia zo le.” Sitse puo sie, “U zo.” 28Süki nyiemhokezhau sie “A we Rommia chükelie raka kekra pie khrü di chülie.” Sitse Paul sie, “A we penuolie tse nunu zo,” sita. 29Süki puo ketsotuoü kethako tsiesieta; mu nyiemhokezhau Paul üse Rommia ükecü sikelie sie puo thegiro pie puo phakecü la michieta.
Mechükehou nunu Paul Ketsokecü
30Siro puoe Judako kedipuo tou la Paul pejo ba shicü silie nyüta; süla süsienhie puo Paul phrei lashüwa di zievokezhako mu mechükehouu kehoutuoü kieshü. Süsie puo Paul ze vor puo bu uko mhodzüki thalie.
Currently Selected:
Mhakechüko 22: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
