Mhakechüko 14
14
Ikonia nu Kevo
1Siro sükemhie di Ikonia nu rei Paul mu Barnaba unie Judamia Sinagog nu le die pukeshü ki Judamia mu Grikmia kekra rei pelelieta. 2Derei pele kemvü Judakoe Judakemoko pfükerhüshü di uko bu kepeleko petsou sierta. 3Süla unie telhe sünu bata, siro thepfu se di Niepuu dze pie pu, puoe unie geinu zasiko mu u ngoko chülie kevi khashü di puo mia ngukemezhie dieu ketho zo ükecü zhapu chüshü. 4Derei rüna sünu themia kro kenie chüta; huomia Judako kitsa mu kekreiko apostelnie kitsa thata. 5Siro Judako mu Judakemoko, krütako ze di unie pese tsiu ketsie pie unie vaketuo rhülie, 6apostelnie süu silie tse ta Likaonia kijübou nu Lustra mu Derbe rünanie siro sonuoki keba rünako nu vota, 7di unie süko nunu dieliekeviu pu petha tuota.
Lustra mu Derbe nu Kevo
8Lustra nu mia puo, penuolie tse nunu puo phi suota di mhakipuorei chatuo chie kemo kerünyiemia puo ba. 9Puoe Paul diepu rünyü ba. Paul-e puo meho terüshü, mu puoe shürholieketuo kepele keba ngushü. 10Ru puoe melie puo rhiechü di, “Sielie di n phinie pie thaliecie!” Sitse themiau karüi sie di chatuolieta. 11Krodiue Paul chükeshüu ngu tse Likaoniamia die nunu shie u rhiechü di, “Terhuomiako themia rhi chüpfü di ker u ze tuote.” 12Sidi uko Barnaba üse Zeus üdi kie, mu Paul üse Hermes üta, kekreilamonyü puo die pukuocü la. 13Siro Zeus zievo-u rüsuokiu nadiu khie careko sie ki ba#14:13 Moro Nadiu Casie Zeus zievo-u., ru thudo mu nyiepou cüko se care ki vor; puo mu krodiue ruosuo chüpie unie tsütuo üdi. 14Derei apostelnie Barnaba mu Paul süu si tse, unie pfhenei cierha di krodiu donu vo shiekhoui di sie, 15“Kezeko#14:15 Gk Themiako., nieko kiüdi hau chüya ga? Hie rei nie kemhie themia ze, mu hienie nie bu mha kemethuo hako nunu rüreise rhei tuoyakezha Ukepenuopfü, tei, kijü, dzükezha mu sünu ketuo pete chükeshüu ki volieketuo la dieliekeviu se kevor zo. 16Thiedzü puoe themia pete bu u thuo u medo-u chü tuota zo; 17derei puo teigei nu teiperüshü di puo si rüchülieketuo teiko rhie kekreishü di kecüca se nie ketshukelhuo chüshü tsiu thenou kenei pie nie tsü di mha kevi kechü nu puo thuo puo zhapu chü baya zo,” sita. 18Puo die hako pu zorei krodiu ruosuo chüpie unie tsüketuo kha re se di khalie.
19Derei Antiok mu Ikonia nunu Judamia huo vor di themia kro-u hüpie uko kitsa shülie. Sidi uko ketsie pie Paul vata mu puo üse siata üdi puo merhashü casie prawa. 20Derei pethakelieko puo houpfü tha ru puo sielie di tuo la nadiu nu leta. Süsienhie puoe Barnaba ze Derbe nu vota.
Siria Antiok nu La Kevor
21Paul mu Barnaba nie dieliekeviu pie Derbe nadiu nu pethashü di themia kekra bu pethakeliemia chülie, süsie unie la Lustra nu vor di tuo Ikonia mu Antiok nu vota. 22Sünu unie pethakelieko chü kemeteishü mu kepele nu thepfu thalienu di sie, “We Ukepenuopfü kedi nu leketuo la kepechü kekra ze kese morosuo,” idi pethashü. 23Süsie unie-e kehou puopuo nu uko la phichümia keda phreshü di cha mu mevo di uko khapie ukoe puo pelekelie Niepuu dzie nu shüwata.
24Süsie unie Pisidia pfüthe Pamfilia kijü nu vorlie. 25Sidi unie Perga nu dieu pie pethakewa sie Atalia nu keta, 26siro sünu unie rou zelie di Antiok nu la vota, rüna sünunu Ukepenuopfü ngukemezhie mhatho-u chünushü, mu unie-e süu chü tseiwa. 27Sidi unie sünu vo tsolie tse kehouu nu themiako kie kengulie di Ukepenuopfü unie ze mhachükeshü pete mu kimhie di Judakemoko bu pelelieketuo chau khrüshü shicü dzeko pushü. 28Sidi unie puotei huo sünu pethakelieko ze bata.
Currently Selected:
Mhakechüko 14: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
