Pitor Kenieu 2
2
Siedzekesi Ketijü mu Uko Siazha
1Derei themia donu siedzekesi ketijü sieryakezha tuoi nieko donu rei kepetha ketijüko sier zotuo, süko pekhre di mia pekaketuo kemeda dieko se vortuo. Siro ukoe uko khrükelie Niepuu rei melietatuo, sidi kepeka meshüpie uko thuo uko gei shü mhailietuo. 2Siro themia kekra uko rüyokecüko siedzi chütuo, siketa la mia bu ketho chau thatatuo. 3Tsiu uko kemehou la mha kese dieko se di nieko pie thelhi chütuo. Uko pejokecüe tsie rei hadzü mhie rüleizhü mo zo, mu uko kepeka rei rükreta mo zo.
4Kekreilamonyü thiedzü teigeidieliemia kro puo phoumaketa ki Ukepenuopfü süko rei khrie mo zo di süko tepie mizie#2:4 Gk Khehoko. nu shüwa, mu ketsokecü teiu ketso la uko khapie kezei kesoutho nu phapie#2:4 Gk Khehoko. bawate; 5mu thiedzü dzüdi puo chüpie miathokemoko kijü nu keshü ki, kemiatho dze kepethau Noah mu kekreimia thenie kelalie, derei kijüu khrie mota zo üro; 6mu puoe Sodom mu Gomora nadinie pejowa di pekapie mige chüwa, sidi miathokemoko ki vorketuo thakie puo chüshü üro, 7siro kerüyoko la puo nou kemezhie sekelie Lot kemiatho-u kelashü üro, 8(Kemiatho-u teisonhie uko donu lhou di thezho kejü mhathoko si mu ngu di puo nou pechüpenyü zo di kemezhie sewa), 9siüro Niepuu dophi nunu kemiathomia kelalieketuo mu siazha pie miathokemoko tsü di uko bu mia nyie pepiketuo teisozhau tsoketuo do rei si, 10süusü u chü u phou mengu se u perhuwayakezhako mu kekuo kesemia thayakezhako la pekuo.
Süko kerüzha mu thepfu se di zayie chü kebako#2:10 Moro teigeidieliemia; Gk Zapuzayie. rei tha michieya mo, 11sirei teigeidielieko uko ki zhakuo mu kuokuocüko thuo rei Niepuu mhodzünu süko pejo di thamelekecü, chüya chie mo. 12Themia hako we mhasi kemo khunuo, lhou sier mia bu u telie di dukhriwayakezha mhie; uko mhadze si kemoko rei tha tuoya, khunuo süko pekacü ki uko sa pekawatuo,#2:12 Gk Uko kepeka nu. 13sidi mhatho kesuoko la kesuo zhakhra ngutuo. Uko khinhie gei rüyoketuo üse u kenei puo chüya. Uko mesa kemo kerhu kro puo zo, tsiu nie ze thehethehie kechü ki zorei thenga mu mha vapesuokecüko chü u neiya. 14Uko mhi-e pieü thuo tshu, mu kephouma chü rüleiya mo. Uko themia u nou jüya kemoko selietaya. Uko nou mha kemehou zhathor. Rüsekepfü nuonuoko zo. 15Uko cha kemezhüu khawa di yotuote, sidi mha kesuo zhakhra puo neiyakezha Bosor#2:15 Leshü kewe huo nu Beor. nuo Balaam chau ze tuote, 16derei puo kejo la puo kerhie, sidi die pulieya kemo gadau thuo themia pfhe chü di siedzekesiu kenya thukhawa.
17Hakoe dzü kejü dzüluoki tsiu mhoutsa teikhrie bu heseketa kemhie, uko la kesuo zeibouikecü kesepie bate. 18Siro ukoe kemelhakecü diethuodieruo pu khuboupfü u chüüphou rüyako se di kekreimia lhou kekrüketuoko therhie prakezhüko meshü mu se tuoya. 19Uko mia shüphralietuoü phrashüya, derei uko zorei mha kesuo kechü diemia zo; mhapuo bu u penyüwa ro süu die chüta zo. 20Siro u Niepuu mu u kelakelieu Jisu Khrista sikelie geinu kijü gei mha u chü pesuoyakezhako therhie pralieketamia, süko nu la le di u penyülieta ro sümia rüli thelatsa therietsa ki suokuotaya. 21Kekreilamonyü kemiatho chau silie di diekhakeshü kemesako nunu rüreiketau ki rei si moto zokecüu vikuotuo. 22Süko dze mia,
“Tefü merüshü di puo thuo puo merü nu la phiya,”
mu “Thevo puo khrü kemesashü rei la le phuo buoya”
üdi mhasidie ketho-u nu kepu mhie tou zo.
Currently Selected:
Pitor Kenieu 2: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More