Seyiedze Kerieu 29
29
Rüsuokiu la Mha Khakeshü
1Siro Kediu David-e kehou pete ki pukeshü, “A nuou Solomon, Kepenuopfü rübei puo kedakeshüu, medzü mu mhatei si moluo, mu mhatho-u zha; rüsuokiu sü themia la mo derei Kepenuopfü Jihova la zo. 2Süla a chülie kevi de a Kepenuopfü kiu la mha keseshüte, suna vieko la sunako, rakachü vieko la rakachü, mese vieko la mese, thegi vieko la thegi, mu sei vieko la sei, süsie rei sümho gei shüketuo la onix mu ketsieko, antimoni, puo rhi kekreikreicüko, ketsie puoma kere neiüko, mu marbeltsie rei kekra. 3Süsie rei a a Kepenuopfü kiu la a noumvü tuotakecü la a thuo a vie, suna, rakachü, a kemesa kiu la mha kesekeshüko tsü geinu a thuo khapie a Kepenuopfü ketsüko: 4Ofir suna talent nyie se, rakachü kevipfü talent nyie thenie, se kiko sozhako daketuo la, 5mu suna vieko la suna, rakachü vieko la rakachü, mhachü kesiko dzie se chüshüketuo mhatho neiüko la, siro thie suomianie u mhatho-u khapie Jihova tsüshütieya ga?”
6Sitse u puonuo kiko nu krütako, süsie rei seyieko krütako, nyiemhokezhako mu kriemhokezhako, mu kediu lietho nu kezhako u nei siei di mha khashü. 7Ukoe Ukepenuopfü kiu mhatho la suna talent nyie pengou mu darik suna talent nyie ker, rakachü talent nyie ker, mese talent nyie kerethetha mu thegi talent nyie krie puo khashü.
8Siro kehoupuorei ketsie puoma kere kebamia khapie Jihova kiu kinyi nu Gershonmia Jehiel dzie nu shü. 9Sidi hako khashü nyü di, u nou puo zo di Jihova kiu la mha methuo khakeshüko la themia u nei phita; kediu David rei puo nei phi.
David Ukepenuopfü Tshekeshü
10Süsie David-e mechükehouu mhodzünu Jihova tsheshü. David-e sie, “He-i Jihova, hie puo Israel Kepenuopfü, kechachie thejakepfüu chülie. 11He-i Jihova, kezha, kekuo, zapuzayie, kuokelie mu kedi pete n vie zo; teiko gei mu kijü ketuo pete n vie zocü la; kedi kechü n vie zo, he-i Jihova, mu noe mha peteko mho puotsüu chüte. 12Kinyi mu therhu n kinu vor phre mu noe peteko mho di baya. N dzie nu kekuo mu kezha ba zo; mu pete bu zhakelie mu kekuo khakeshü n dzie nu ba. 13Süla hie Kepenuopfü, hie tsie n thezieya mu n za kezhau tsheya.
14“Derei a sü supuomu, mu a themiako mha methuo khakeshü sü kedipuo mu? Mha peteko n kinu vor, mu hie we n vie se n tsü la keba zocü la. 15Hie n mhodzünu chazoumia mu hie puonuoko tuoi rüvemia zolie, kijü nu hie teisozhako mha khrü puo mhie zo, mha bame puorei jü ze. 16He-i Jihova hie Kepenuopfü, hieko n za kemesau la ki puo chü n tsütuo üdi mha keseketuo la kha phikeshü hako n dzie nunu vor mu pete n vie zo. 17A Kepenuopfü, no thenouu pfhüya, mu kemezhüu n neiyakecü a si ba, a a nou mezhü di mha hako pete khashüzhie, mu a tsie n themiako, hakiha tha di u nei phi mu khrie mo zo di khakeshü ngute. 18He-i Jihova, hie puonuoko Abraham, Isak mu Jakob Kepenuopfü, n themiako melou nu mhachülieketuo mu mha kele bu ba seilie thienyü mu uko melou rüguopie n kitsa tuokelie chücie. 19A nuou Solomon bu puo nou pete pie no diekhakeshüko, n zhapuko, chünukeshüko pete chü mu zelieketuo khashücie, sidi a rüsuoki chüketuo la mha kese sebaketau chülie üthienyü,” sishü.
20Süsie David-e sie mechükehou ki, “Jihova nie Kepenuopfü tsheliecie.” Sitse mechükehou pete Jihova uko puonuoko Kepenuopfü tsheshü mu nuketsu di u khapie Jihova mu kediu mhodzünu shü. 21Uko ruosuoko chüpie Jihova tsü mu süsienhie kethe ruosuoko chüpie Jihova tsükeshü thudo nyie puo, tekuochü nyie puo, tekuonuo nyie puo, mu kekrie ruosuoko mu Israel pete la ruosuo chü phi. 22Sidi uko sünhie u nei phi di Jihova mhodzünu mhacümhakrielie.
Solomon Kenhepie Kedi Kechü
Sidi uko va kenieu David nuou Solomon bu kedi chü; siro uko puo kenhepie puo bu Jihova kedinuou chü, mu Zadok bu zievo chü. 23Süsie Solomon we Jihova kediba gei balie, puo puo David kediu sou nu; puo kruolie mu Israel pete puo die ze. 24Siro krütako mu terhümiavimia kekuoko, mu kediu David nuonuo pete kediu Solomon gei dietho tuolietuoü phrashü. 25Siro Jihovae Israel pete mhodzünu Solomon chü pezha phishü, sidi Israel nu puo mhodzü kedi puorei nguliekemo kedi therhu mu kekuo se puo tsü.
26Jese nuou David hakemhie di Israel pete mho kedi chülie. 27Puo Israel mho teicie hiedia kedi chü; puo Hebron nu cie thenie di, mu Jerusalem nu cie serese. 28Süsie puo phichü di teisozha kekra lhoulie, tsiu kinyi mu therhu thuo puo tshupfü di siata; tsiu puo nuou Solomon puo sou nu kedi chüta. 29Siro Kediu David mhathoko therie nunu thela ketso siedzekenguu Samuel mu mhadze kethuu mu siedzekenguu Nathan mhadze kethu dau nu mu siedzekesiu Gad kethu dau nu thupie tuo. 30Puo kedi kechü dze pete, puo kekuo mu puo geinu Israel gei mu kijü kekreira kediko gei mhachüketako tuo phre.
Currently Selected:
Seyiedze Kerieu 29: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More