Nugana 31

‘UPWA 31.

1Ta Labana natunao me‘olotodi ‘idi ona ‘i nonodi, si gwae, Iakobo ni‘atu tamada ‘ina iage iauiauna i ‘ewedi; ta tamada ‘ina iage ‘ediega ‘ina esaesa iauiauna i ‘ewena. 2Ta Iakobo Labana maninina i ‘itena, ta, wa ‘ita, nigea ‘enaia nadigega tuta lowa. 3Ta Ieoba Iakobo ‘ena ‘i ona, Tubumuao ‘idi ‘asa ‘ena ‘u da ‘ila, ta ‘imu bu‘unao ‘edia; ta ‘abo‘agu ma‘ieaio. 4Ta Iakobo ‘i etune ta Rakela ta Lea ‘i bwauiedi mitawaia ‘ina iau ‘enaia, 5ta ‘i eonedi, Tamami maninina ia ‘itena, nigea ‘eguia nadigega tuta lowa; ta tamagu ‘ina Eaubada ma‘ieagu ‘a miami. 6Ta wa mwaratoni ‘igu waiwai maibo‘anega tamami ‘ena ia guinua. 7Ta tamami ‘i kaboegu, ta ‘agu e‘isa ‘i gibunina e sanauna; ta Eaubada nigea ‘i tagwarena be ‘i da gieto‘umaliegu. 8‘Abo ‘i ona gete nadigega, Iomwaiomwaridi ‘amu e‘isa; ga iau maibo‘ana iomwaiomwaridi si enatunedi: ta ‘abo ‘i ona nadigega, Ma‘adi saba ‘amu e‘isa; ga iau maibo‘ana ma‘adi saba si enatunedi. 9Nadigega Eaubada tamami ‘ina iobai i ‘ewedi, ta eguia i ‘ebwaeaedi. 10Ta gete ‘i apwesa tuta nina iau si ‘euwana, ia ‘ita tu‘e, ta madawara ‘ena ia ‘itena, ta, wa ‘ita, gota me‘olotodi iau ‘edia si mwera ma‘adi saba, iomwaiomwaridi, ta guaiaguaiadi. 11Ta Eaubada ‘ina anelose madawara ‘enega ‘i eonegu, Iakobo: ta ia ona, ‘Abo‘agu. 12Ta ‘i gwae, Gete tuga ‘u da ‘ita tu‘e, ta u ‘ita, gota me‘olotodi iauiaudi iau ‘edia si mwera ma‘adi Saba, iomwaiomwaridi, guaiaguaiadi: iage iauiauna Labana ‘i guinua ‘emuia ni‘atu ia ‘itena ta ‘enega. 13‘Abo‘agu Betela ‘ana Eaubada, ‘ena ‘ora ‘u siwarorona, ‘ena ‘eguia ona‘upa‘upa u ‘inanena: gete tuga ‘u da tooro, ‘asa gete ‘enega ‘u da tauia, ta ‘imu ‘asa ‘ena ‘u tubua ‘ena ‘u da ‘ila. 14Ta Rakela ta Lea si onalimana ta ‘ena si gwae, Tamama ‘ina anua ‘ena ‘e bweu esena nai ‘egu‘eguia ‘i miami manuma? 15Nigea nai ‘a eto‘u‘umara ‘ina nuenega? ‘i gimwaniema ta ‘enega, ta wate ‘ama e‘isa ‘i loegumwarina. 16Gwegwe iauiauna Eaubada i ‘ewedi tamama ‘enega, nate ‘abo‘ama ta natuma ‘ima gwegwe: gete ‘enega, to‘ase nai Eaubada ‘emuia ‘i ona, ‘u da guinua. 17Ga Iakobo ‘i tooro, ta natunao be mwanenao kameliao ‘edia ‘i sa‘udi: 18ta ‘ina iobai iauiaudi i ‘ewedi, ta ‘ina gwegwe iauiauna ‘i egogonedi, ‘ina iobai tauna ‘i lobelobedi, taudi ‘i egogonedi Padanarama ‘enaia, be ‘enega ‘i da tauia tamana Isaako ‘enaia ‘asa Kanania ‘enaia. 19Ta Labana ‘i tauia sabi ‘upwa ‘ina sipi: ta Rakela goamamea i ‘ipwaridi taudi tamana ‘ina iageao. 20Ta Iakobo Labana goma Siria ‘enega ‘i tauia ma‘ulamo, ‘ina dena nigea ‘i simasimane ta ‘enega. 21Ta ‘enega ‘i dena ma‘ina iage iauiauna; ta ‘i tooro, ta Boasi‐‘Awana ‘i taonina, ta maninina ‘oea Gileada ‘enaia.

22Ta asiata ‘e tonina Labana ‘ena si simana ‘aene Iakobo ‘i dena. 23Ta tasinao i ‘au‘ewedi ma‘enao, ta ‘i muriena asiata ‘e sebeni; ta ‘i lobena ‘oea Gileada ‘enaia. 24Ta Eaubada Labana goma Siria ‘ena ‘i mai boiboi ‘ana madawarega, ta ‘i eonena, ‘U da ‘ita‘i‘isio ‘oio ta gea‘abo Iakobo ‘ena ‘u onaona nai bobo‘ana nai to‘umalina. 25Ta Labana ‘i apwesa Iakobo ‘enaia. Ta Iakobo ‘ina anua i ‘abina ‘oea ‘enaia: ta Labana matasinao ‘oea Gileada ‘ena i ‘abina. 26Ta Labana Iakobo ‘ena ‘i ona, To‘ase ‘u guiguinua, ga ‘eguiega ‘u tauia ‘ipwaramo, ta natuguao mewainedi u ‘au‘ewedi ‘atua ioniionidi sisi‐saiega? 27To‘ase manuna ‘u dena kwaikwaia, ta u ‘ipwarigu; ta nigea ‘u simasimana ‘eguia, be ‘enega ia da etuneio guausoarega ta wariega be, taborineega ta apiega be; 28ta nigea ‘u tagwaregu be natuguao me‘olotodi ta natuguao mewainedi ia da ‘awamuidi? gete tuga ni‘atu ‘u bubuna ‘euwauwa. 29Nimagu ‘ina waiwaiega ia da gieto‘umaliemi: ta tamami ‘ina Eaubada guruwana ‘i eonegu, ‘i gwae, ‘U da ‘ita‘i‘isio ‘oio be gea‘abo Iakobo ‘ena ‘u onaona nai bobo‘ana nai to‘umalina. 30Ta gete tuga, nuanuaio ‘u da tauia, tamaio ‘ina anua manuna ‘u gewagewana, ta to‘ase manuna ‘igu tokwarui u ‘ipwaridi? 31Ta Iakobo ‘i onalimana ta Labana ‘ena ‘i gwae, Ia ‘atesa‘ara ta ‘enega: ia ona ta ‘enega, Nai natumuao mewainedi ‘eguiega ‘u da ‘oaegu. 32Tauna ‘ena ‘imu tokwarui ‘u lobedi, gea‘abo ‘i da bobo‘ana ta ‘i da mwawasa; tasidao matadia ‘imu iage ‘eguia ‘i miami ‘u da ‘itena, ta ‘emuia ‘u da ‘ewena. Iakobo nigea ‘i sinapuna ‘aene Rakela i ‘ipwaridi ta ‘enega. 33Ta Labana Iakobo ‘ina anua ‘enaia ‘i rugu, ga Lea ‘ina anuaia, ta toguinua mewainedi ‘e rua ‘idi anuaia; ta nigea ‘i lobalobadi. Ta Lea ‘ina anuega ‘i apwesa, ta Rakela ‘ina anuaia ‘i rugu. 34Ta Rakela goamamea i ‘ewedi, ta kameli ‘ana iage ‘edia ‘i sa‘udi, ta ‘edia ‘i miaiaidi. Ta Labana anua maibo‘ana ‘ena ‘i gidadana, ga nigea ‘i lobalobadi. 35Ta waine nina tamana ‘ena ‘i ona, Gea‘abo ‘igu ‘inapwana ‘i da gamwasoara nigea kapekapeana ia da tooro matamuia ta ‘enega; iine ‘idi bubuna ‘eguia ‘i miami ta ‘enega. Ta i ‘ebesa ioge, ta goamamea nigea ‘i lobalobadi. 36Ta Iakobo ‘i gamwasoara, ta Labana ma‘ieana si losaia: ta Iakobo ‘i ona limana ta Labana ‘ena ‘i ona, To‘ase ‘igu bubuna geiogeioi? ta to‘ase ‘igu bubuna to‘umalina, ta ‘enega ‘u pili‐pili muri‘oaiabugu? 37‘Igu gwegwe iauiauna ‘edia ‘u gidadana, ta ‘imu anua ‘ana gwegwe iauiauna ‘ediega to‘ase ‘u lobena? Gete ‘ena ‘u da sa‘ui tasiguao ta tasimuao matadia, be ‘enega si da loina taterua ‘edia. 38Iakwara ‘e tweniti ma‘ieaio ia miami; ‘imu sipi sinadi ta ‘imu gota mewainedi nigea natudiao si be‘u daita, ta ‘imu iau ‘ina sipi me‘olotodi nigea ia ‘enidi. 39Tauna bomitawa si sabuna nigea ia da me‘ena ‘emuia; ‘abo‘agu ia loseena; nimaguiega u ‘eonegu, nai ‘asiata si ‘ipwa‘ipwarina nai boiboia si ‘ipwa‘ipwarina, 40Gote nadigega ‘Abo‘agu; asiataia ‘ara ‘i loiisigu, ta boiboia gogai ‘i loeloesawarigu; ta ‘igu ‘enomwataia mataguiega ‘i dena, 41Iakwara ‘e tweniti getedi ‘imu anuaia ia miamiana; iakwara ‘e potini ‘emuia ia guinua natumuao mewainedi ‘e rua manudi, ta iakwara ‘e sikisi ‘imu iau manuna: ta tuta ‘e sanau ‘agu e‘isa ‘u gibunina. 42‘Abo tamagu ‘ina Eaubada, Aberaamo ‘ina Eaubada, ta Isaako ‘ina ‘Ebematauta, nigea ma‘ieagu, ‘ai‘aila ‘u da etunegu manimenimegumo. Eaubada ‘igu elo‘uia i ‘itena ta nimagu ‘idi guinua, ta guruwana ‘i ba‘emu. 43Ta Labana ‘i onalimana ta Iakobo ‘ena ‘i gwae, Mewainedi natuguao mewainedi, ta gogama ‘igu gogama, ta iau ‘igu iau, ta maibo‘ana u ‘itena ‘igu iage: ta to‘ase ia da guinua batua natuguao mewainedi getedi ‘edia, nai gogama ‘edia taudi si enatunedi? 44Ta gete tuga ‘u da mai, ‘ona‘upa‘upa ta da bubuna, ‘abo‘agu ta ‘oio; ‘i da ‘ebe‘ita ‘eguia ta ‘emuia. 45Ta Iakobo gurewa i ‘ewena, ta ‘i gietooro ‘ora manuna. 46Ta Iakobo tasinao ‘edia ‘i ona, Gurewa wa da egogonedi; ta gurewa si ‘ewedi, ta da‘oa si bubuna: ta da‘oa deinaia si ‘e‘ai. 47Ta Labana ‘i eesena Iega‐saaduta: ta Iakobo ‘i eesena Galeeda. 48Ta Labana ‘i gwae, Da‘oa gete ‘ebe‘ita ‘eguia ta ‘emuia batua. Ta ‘enega ‘ana esana si ‘inanena Galeeda: 49Ta Misipa, ‘i ona ta ‘enega, Eaubada ‘i da ‘ita‘i‘isi ‘eguia ta ‘emuia, ‘ena ta miakwaia ‘e bweuna ‘e bweuna ‘enega. 50‘Abo natuguao me wainedi ‘u giedeedonidi, ta ‘abo wate mwanemuao u ‘au‘ewa ta nigea natuguaodimo, nigea ‘e bweu tai ma‘eda; u ‘ita, Eaubada to‘ita ‘eguia ta ‘emuia mwatuidaia. 51Ta Labana Iakobo ‘ena ‘i ona, Da‘oa gete ‘u da ‘itena, ta ‘ora ‘u da ‘ita, tauna ia sa‘u ‘eguia ta ‘emuia mwatuidaia. 52Da‘oa gete ‘i da ‘ebe‘ita, ta ‘ora ‘i da ‘ebe‘ita, ‘aene gea‘abo da‘oa gete ia da ataona ‘emuia, ta ‘oio gea‘abo da‘oa gete ta ‘ora gete ‘u da ataona ‘eguia, ‘eunua manuna. 53Aberaamo ‘ina Eaubada, Naora ‘ina Eaubada, tubudi ‘idi Eaubada, ‘i da loina mwatuidaia. Ta Iakobo ‘i ona‘upa‘upa tamana Isaako ‘ina ‘Ebematauta ‘enega. 54Ta Iakobo taria i ‘ebwaea ‘oea ‘enaia, ta tasinao ‘i bwauiedi be palaua si da ‘e‘ai: ta palaua si ‘enina, ta si mia masarina ‘oeaia. 55Ta Labana ‘i unuboi, ta natunao me‘olotodi ta natunao mewainedi i ‘awamuidi, ta ‘i onaobobomedi: ta Labana ‘i tauia, ta ‘ina esena ‘ena i ‘ila.

Currently Selected:

Nugana 31: DOBOT

Highlight

Copy