Nugana 29

‘UPWA 29.

1Ga Iakobo ‘i tauia, ta bomatu natunao ‘idi ‘asa ‘ena ‘i mai. 2Ta i ‘ita, ta wa ‘ita mitawaia wewerupwa, ta, wa ‘ita, sipi iau ‘e toi deinaia si ‘eno‘eno; wewerupwa nina ‘enega iau si enumadi: ta gurewa wewerupwa ‘awanaia sinabwana. 3Ta gote ‘ena iau iauiaudi si egogona: ta gurewa si puli ‘ilena wewerupwa ‘awanega, ta sipi si enumadi, ta gurewa si sa‘u limena ‘ana ebesa‘u ‘enaia wewerupwa ‘awanaia. 4Ta Iakobo ‘edia ‘i ona, Tasiguao, mwa‘adega omi? Ta si ona, ‘Abo‘ama Aranega. 5Ta ‘i eonedi, Labana Naora natuna wa mwaratoninaia? Ta si gwae, ‘A mwaramwaratonina. 6Ta ‘i eonedi, ‘I bobo‘ana? Ta si gwae, ‘I bobo‘ana: ta, u ‘ita, natuna me wainena Rakela ‘i mema sipi ma‘edi. 7Ta ‘i ona, Wa ‘ita, gete asuoreore, ta nigea ‘ana tuta be iobai si da egogona: sipi wa da enumedi, ta wa da tauia be wa da e‘enidi. 8Ta si ona, Nigea kapekapeana, ga iau iauiaudi si da egogona, ta gurewa si da puli‘ilena wewerupwa ‘awanega; ga sipi ‘a enumedi. 9Ma‘edi ‘i onaona, ga Rakela ‘i mai tamana ‘ina sipi ma‘edi; tauna i ‘ita‘ita‘i‘isidi ta ‘enega. 10Ta gete ‘i apwesa, ni‘atu Iakobo Rakela Labana sinana nuuna natuna me wainena i ‘itena, ta Labana sinana nuuna ‘ina sipi, ga Iakobo ‘i tauia serabenaia, ta gurewa ‘i puli‘ilena wewerupwa ‘awanega, ta Labana sinana nuuna ‘ina iau ‘i enumedi. 11Ta Iakobo Rakela i ‘awamuina, ta i ‘ara bwau, ga ‘i dedoi. 12Ta Iakobo Rakela ‘ena ‘i simana ‘aene tauna tamana tasina, ta tauna Rebeka natuna: ta waine ‘i pili ta tamana ‘ena ‘i simana. 13Ta gete ‘i apwesa, ni‘atu Labana Iakobo nuuna natuna ‘ana tetera ‘i nonona, ga ‘i pili sabi lobena, ta i ‘atubwailina, ta i ‘awamuina, ta ‘ina anua ‘ena ‘i me‘ena. Ta iage getedi iauiauna ‘i simana Labana ‘enaia. 14Ta Labana ‘ena ‘i ona, ‘Ai‘aila ‘oio lulugu ta esiogu. Ta ‘i miami ma‘ieana ta tuta nawarae ‘e bweuna. 15Ta Labana Iakobo ‘ena ‘i ona, ‘Oio tasigu, ta ‘enega ‘aene ‘eguia ‘u da guinua daita? ‘U da eonegu, to‘ase ‘amu e‘isa? 16Ta Labana natunao me wainedi ‘e rua: me sinabwana ‘ana esana Lea, ta me goamana ‘ana esana Rakela. 17Ta Lea mata ‘atana; ta Rakela ‘ana ‘ita bobo‘ana ta sinesinebwainina. 18Ta Iakobo Rakela ‘i obobomena, ta ‘i gwae, Ia da guinua ‘emuia ga iakwara ‘e sebeni Rakela natuio me goamana manuna. 19Ta Labana ‘i gwae, ‘I bobo‘ana ia da ‘ebwaea‘ena ‘emuia, ta gea‘abo mari tai ‘ena ia da ‘ebwa‘ebwae: ‘u da miami ma‘ieagu. 20Ta Iakobo ‘i guinua iakwara ‘e sebeni Rakela manuna; ta ‘ina nuena ‘aene ‘asiata pu‘epu‘edi, ‘ina oboboma ‘enaia manuna. 21Ta Iakobo ‘i ona Labana ‘ena, Mwanegu ‘u da ‘ebwa‘egu, ‘igu tuta ni‘atu si gumwara, be ‘ena ia da rugu. 22Ta Labana tai iauiauna esena nina ‘enega ‘i egogonedi, ta sagari ‘i bubuna. 23Ta boiboia gete ‘i apwesa, natuna me wainena Lea i ‘au‘ewena, ta ‘ena ‘i me‘ena; ta ‘ena ‘i rugu. 24Ta Labana ‘ina toguinua me wainena Silipa natuna Lea ‘ena i ‘ebwaea‘ena ‘ina toguinua mewainena manuna. 25Ta gonagonaia gete ‘i apwesa, wa ‘ita, tauna Lea: ta Labana ‘ena ‘i ona, To‘ase gete ‘eguia ‘u guinuena? nigea nai ia guinua ma‘ieaio Rakela manuna? ‘Enega to‘ase manuna ‘u kaboegu? 26Ta Labana ‘i ona, ‘Ima esena nigea nadigega ‘a bubuna, be megoamana ‘a da gimi ‘ebwaea‘ena tomatua nuganaia, 27Tauna gete ‘ana wiki ‘u da loegumwarina, ta ‘ana e rua wate ‘a da ‘ebwaemu guinua nina ‘u da guinua ‘eguia iakwara wate e sebeni. 28Ta Iakobo ‘i bubuna nadigega, ta ‘ina wiki ‘i loegumwarina: ta natuna Rakela i ‘ebwaena be ‘i mwanena. 29Ta Labana natuna Rakela ‘ina toguinua me wainena Bila i ‘ebwaena be ‘i da e‘ina toguinua me wainena. 30Ta Rakela wate ‘ena ‘i rugu, ta Rakela wate ‘i obobomena wawasae Lea ‘enaia, ta wate iakwara ‘e sebeni ‘i guinua ma‘ieana.

31Ta Ieoba i ‘itena ‘aene Iakobo Lea ‘i guitoasena, ta gamwana ‘ebetubua ‘i gigegena: ta Rakela ‘i megagara. 32Ta Lea i ‘euwana, ta natuna me‘olotona ‘i enatunena, ta ‘i eesena, Rubena: ‘i ona ta ‘enega, Ieoba ‘igu elo‘uia i ‘itena ta ‘enega; gete tuga mwanegu ‘i da obobomegu ta ‘enega. 33Ta i ‘euwana limana, ta natuna me‘olotona ‘i enatunena; ta ‘i ona, Ieoba ‘i nonona mwanegu ‘i guitoasegu ta ‘enega, ta ‘enega gete wate natugu i ‘ebwaegu: ta ‘i eesena Simeona. 34Ta i ‘euwana limana, ta natuna me‘olotona ‘i enatunena; ta ‘i gwae, Gete tuta gete mwanegu ‘i da mia ma‘ieagu, natunao me‘olotodi ‘etoi ‘ena ia enatunedi ta ‘enega: ‘enega si eesena Lebi. 35Ta i ‘euwana limana, ta natuna me‘olotona ‘i enatunena: ta ‘i gwae, Tuta gete Ieoba ia da tupuna: ta ‘enega ‘i eesena Iuda; ta enatuna ‘i sa‘una.

Currently Selected:

Nugana 29: DOBOT

Highlight

Copy