Eclesiástico 23
23
Ñembo'e
1Che Ru che rekove Jára,
ani reheja añe'ẽ rei mante
ha che juru rupi ha'a.
2Mávapa oiporúta
iteju ruguái
che remiandúre
ha che ñe'ãre
arandu tukumbo,
ani haguã ojeheja rei
che jejavykue
térã oñemo'ã
che angaipa?
3Ani, okakuaávo
che jejavykue
ha oñembohetavévo
che angaipa,
ipu'aka che rehe
che rayhu'ỹva
ha che rehe ija'e'ỹva
opuka.
4Che Ru che rekove Jára,
ani che moĩ ipópe kuéra,
ani reheja ajapo'i
che rapichápe,
5ha eipe'a che hegui
mba'e ky'a pota.
6Taryrýi tembi'úre
ha mba'e tie'ỹ pota
ani oñemomba'e che rehe,
ani reheja añeme'ẽ
teko ky'ápe.
Ñe'ẽ hekopegua ha hekopegua'ỹ
7Che ra'y kuéra,
pehendu che remimbo'e:
ojapóva ha'eháicha
ndo'a mo'ãi ñuhãme.
8Ijuru rupi ho'a
iñangaipáva,
ha ijuru rupi avei
ho'a ijuru atã
ha hova atãva.
9Ani rejepokuaa vai
reme'ẽvo ne ñe'ẽ
Ñandejára rérare
oimeraẽ mba'ére.#Mt 5.34; Stg 5.12.
10Peteĩ tembiguáire
oñemaña ramo manterei
katuete iteju ruguáita,
upéicha ohenóiva
Ñandejárape
ha manterei he'íva héra
naipotĩ mo'ãi ivaívagui.
11Oñe'ẽ reíva
Ñandejára rérape
ojapo mante ivaíva,
ha ndojei mo'ãi hógagui
ñenupã.
Ojavýrõ, ivai hembiapo,
ndojapóirõ upe he'i vaekue
iñangaipa jo'a,
ome'ẽ japu ramo iñe'ẽ
ndojeheja rei mo'ãi chupe
iñangaipa,
ha hogapy henyhẽta
po'a'ỹgui.
12Oĩ ñe'ẽ
oñemyengoviáva jejukápe,
aníke oñehendu
ko'ãichagua
Israelgua apytépe.
Umi Ñandejárape ohayhúva
ojei ko'ã mba'égui,
ha noñemongy'ái
ko'ã tembiapópe.
13Ani rejepokuaa
juru ky'áre,
cháke ne mohembiapo vaíne.
14Ne mandu'a
nde ru ha nde sýre
reikórõ poguasu apytépe,
ani reiko itavyraívaicha,
cháke rembyasýta
reju hague yvy ári,
ha rejahéita
pe ára ne reñói haguére.
15Ojepokuaáva juru guasúre
naipohã véima omano meve.
Poromyakã ratĩ
16Mokõichagua tapicha
omboheta angaipa
ha pe mbohapyha ogueru
Ñandejára pochykue:
17Pe tekove rakuchi
hendýva tatáicha,
ndogue mo'ãi ikusuguepa
peve.
Ikuña hetáva
nahyguãtã mo'ãi,
tata ohapypa peve chupe.
Oiko mantévape
kuña rapykuéri,
oimeraẽ kuñánte iporã,
ha omano meve
ndopytu'u mo'ãi.
18Oporomyakã ratĩva
he'ívo:
“Ha'éko ndoikuaa mo'ãi,
iñypytũ
ha tápia ore mo'ã,
avave nda ore recha mo'ãi,
mávagui piko akyhyjéta?
Ñandejára niko
noma'ẽ mo'ãi
che rembiapóre.”#Job 24.15.
19Ndoipotáinte
avave ohecha chupe
ha ndohecha kuaái
Ñandejára resa
ohesape porãveha
kuarahy reságui,
ohechaha
opa yvypóra rembiapo
ha oikeha oikohápe
umi okañýva.#Sal 33.13-15; Pr 15.3; Eclo 15.19; Heb 4.13.
20Ñandejára oikuaa vaekue
opa mba'e
ojapo mboyvéma voi,
ha oikuaa porã gueteri
ojapopa rire.
21Oimo'ã'ỹháguinte
oñemyakãsãta,
ha opavave renondépe
oñemotĩta.
22Upéicha avei kuña
iménape ohejáva,
ha oguerúva ñemoñare
peteĩ mombyryguágui.
23Tenondete voi ojapo
pe ndohejáiva ojejapo
Ñandejára rembiapoukapy,
upéi omomarã iménape,
mbohapyha katu
oporomyakã ratĩ
ha ogueru ñemoñare
peteĩ mombyryguágui.
24Pe kuña ojereraháta
ñembyaty guasúpe,
ha hembiapo vaikue
opẽta imemby kuérare.
25Imemby kuéra
ndahapo mo'ãi
ha iñemoñare
ndahi'a mo'ãi.
26Opavave
imandu'a vaíta hese kuéra,
ha pe ky'a oguerekóva
marõve ndoje'o mo'ãi.
27Ha ambue kuéra
ohecha kuaáta
ndaiporiha mba'eve
iporãvéva
Ñandejára ñembyajégui,
ha he'ẽvéva
hembiapoukapy apógui.
Currently Selected:
Eclesiástico 23: GDC2006
Highlight
Copy
Compare
Share
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.