Romanos 8
8
O zivoto ando duo
1Akana inai ni iek dos pe llene kai si phangle ando Kristo Jesus, 2soke o zakono e Duoko kai del zivoto ando Kristo Jesus braduisarda tut katar o zakono bilachimako ta katar o meripe. 3Soke o Del cherda so nasti cherela o zakono e Moiseseko, soke sama kovle ando mas, o Del bichalda isto pe chaurre te cherdol sargo iek manus kai inaile zor ta bilacho ta sargo kurbano kai delpe pala o bilachipe, ta gia cheres le o Del zatrisarda o bilachipe. 4Te sai cherdol ande amende o chachipe e zakonoko kai ni lla prema o mas, kai lla prema o Duo.
5Gola kai zivin ta ni achaven po bilachipe, samo mislin te cherel bilachipe. A gola kai zivin te kanden so phenel o Santo Duo mislinpe samo te cheren so o Santo Duo mangela. 6Te zivia samo te misli amen ande sa o bilachipe kai mangel amare esnage, ondaka ka acha fulade e Devletar. A te misli amen ande sa so mangel o Santo Duo, ondaka ka avel amen o zivoto ostade ta e pas. 7Gola kai nasti achaven po bilachipe von samo mislinpe te cheren bilachipe. Von si dusmanura e Devleke, soke ni kamen ta i nasti kanden o zakono e Devleko. 8Gola kai cheren samo o bilachipe nasti peren drago e Devleke.
9A te zivila ande tumende o Duo e Devleko, morabi te na llan pala tumaro bilachipe. Ko inai le o Duo e Kristoko, inai e Kristoko. 10E esnaga chachimaia si muli, a o Kristo te zivila ande tumende, o duo zivil soke o Del llinda tumen chache i te merela amari esnaga cheres o bilachipe. 11O Duo goleko kai vazdia e Jesuse katar o meripe te zivila ande tumende, isto vou kai vazdia e Jesuse katar o meripe, ka del zivoto ande tumare esnage merimake katar o Duo e Devleko kai zivil ande tumende.#1 Kor 3.16.
12Goleke phlalalen, inai soke akana pe zor te zivi ta te chera so amen mangaia te chera. 13Soke tumen te zivina e ezgodenchar kai tumen mangen, ka meren ostade, a katar o Santo Duo te mukena gola ezgode bilache kai mangen, ka avel tumen zivoto ostade.
14Soke sa gola kai si inllarde katar o Santo Duo e Devleko si chave e Devleke. 15Soke o Duo kai o Del dia tumen ni phandel tumen te aven sluge pe dar. O duo e Devleko cherel amen chave e Devleke ta mukel amen te phena e Devleke: ¡Dade!#Mk 14.36; Gl 4.6. 16O Duo e Devleko phangliol amare duoia ta phenel amenge kai sam chave e Devleke. 17Ta akana sar sam chave e Devleke sai la sa o lachipe kai vou lacharda amenge. Ta sa gala ezgode ka fulavalen e Jesusea. A te avelape kai nakha patnia sar vou nakhla patnia, chachimaia lea ka fulava e pachiu kai si te den le.#Gl 4.5-7.
O baro lachipe kai si te avel
18Pachau kai e patnia kai nakha ande gava vreme inai niso te thovaia len e bare ezgodenchar kai si te dikha mai angle. 19Sa o sueto aduricharel oma o Del te sikavel kai amen sam leke chave. 20Soke o sueto ni llanel ta inai pala lengi dos, soke gia manglala o Del, a o sueto so achel le si te aduricharel#Jen 3.17-19. 21te aven mukliarde katar lengi zatrania. Ta aduricharen te avel len e dragostia katar o mukliardipe kai e chave e Devleke si len. 22Amen llana kai gava sueto nakhel dukha sargo kana iek diskinia si te maladol lake. 23Ta ni nakhel dukha samo voi, i amen kai dia amen mai anglal o Santo Duo ta sa e ezgode kai ka del amen o Del mai angle, goleke amen adurichara te len amen sar pe chaurre ta golea ka aven braduime amare esnage,#2 Kor 5.2-4. 24O Del braduisarda amen soke si amen e vera kai gia ka avelpe. A te adurichara so akana dikhol gua inai vera, ¿Ko aduricharel varesavi ezgoda kai si le? 25A te adurichara te la vareso kai akana ni dikha, morabi te adurichara le esmiro.
26Isto gia, soke amari vera ando Del si kovli, goleke o Santo Duo pomozil amen. Soke ni llana te sai moli amen e Devleke, a isto o Santo Duo molilpe pala amende ta cherel le gia sukar kai inai alava te phena sar vou molilpe. 27Ta o Del kai pinllarel sa amare mislura, llanel so o Duo mangel te phenel. Soke o Duo molilpe e Devleke pala po foro santo, ta leko molipe si isto so o Del mangel.
28Llana kai o Del lacharel sa e ezgode po lachipe golenge kai volin le, golenge kai vou ikharda gia sar vou mangla. 29O Del mai anglal llanela ka ka esviril te aven sargo leko chaurro, te sai vou avel o chavo mai purano maskar e but phlalorre.#2 Kor 3.18; Gl 4.19; Flp 3.10. 30Ta golen kai vou esvirisardaia, ikharda len ta golen kai ikharda, llinda len chache, ta golen kai llinda len chache dia len po baripe.
31Samo achel amen te phena kai o Del te si amenchar, niko nasti avel ande brasnia amenchar. 32O Del kai ni achada te del amen pe chaurre, ta dia le te merel pala sa amende, ¿Sar ni ka del amen pe chaurrea sa e ezgode? 33¿Ko sai dosarel katar fiso golen kai o Del esvirisarda? Kana isto o Del llinda len chache. 34¿Ko sai del len ande kris? Kana o Kristo si kai mulo pala lende ta i mai but, vou ustilo katar o meripe ta si pe rig e chachi e Devleki, ta molilpe pala amende. 35¿Ko sai fulavel amen katar e Jesukristoko volipe? ¿E duk, e dar, e patnia, e bok, o sil, o meripe? 36Sar phenel o pisipe:#Sal 44.22.
Cheres tu suako drom sam thode po meripe,
inllaren amen sargo bakren kote kai mundaren len.
37Maskar sa amare dukha, pacha kai o Jesukristo ka cherel amen te dobisara soke vou volisarda amen. 38Me pachau kai nisavi ezgoda ka fulavel amen katar o volipe e Devleko: ni o meripe, ni o zivoto, ni e suechura, ni e duura, ni so si akana, ni so si te avel, 39ni so si mai upre, ni so si mai tele, ta nisave ezgode cherde e Devletar. ¡Niso nasti ka fulavel amen katar o volipe kai o Del sikada amenge ando Kristo Jesus amaro Gazda!
Currently Selected:
Romanos 8: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
