Romanos 12
12
O zivoto nevo
1Goleke phlalalen, pala o volipe kai si e Devle pala tumende, mangav tumendar te thoven tumen te radin leke sa tumare zivotoia ta te cheren so si leke drago. Gia si sar morabi te blagosi le. 2Ta na zivin ios sar zivil o sueto, mai sukar si te pharrudon tumare mislura ta tumaro zivoto soke gia ka llanen savi si e volia e Devleki, ta so mangel si lacho posteno orta ta chacho.
3Soke o Del ande po volipe thoda man apostol ta goleke mangav tumendar te na mislin tumen kai sen mai lache neko so sen. Mai sukar dikhen isto pe tumende prema o pachape kai o Del dia tumen, soke sen llene kai llan pala o Kristo. 4Gia sar si amen va ta porrne ande amari esnaga, sa ni cheren isto iek buchi, 5isto gia amen, kai sam but, saurre chera iek esnaga ando Kristo ta sam istarde iek pe aver, soke sam katar iek esnaga.#1 Kor 12.12.
6Soke o Del dia amen suako llene iek buchi sar vou mangla te del amen. Goleke te mangla o Del te del amen e buchi te da orba ande leko anav, cherale sar trubul iekhe llenetar kai llal pala o Kristo 7te thoda amen te pomozi averen, cherale sukar. Te thoda amen te sikava, thova amen te sikava. 8Te mangela amendar te da zor averen, morabi te cherale. Te si te pomozi e chorren cherale veselimaia.#1 Kor 12.4-11.
Voli amen chachimaia
9Volin tumen chachimaia iek avere. Murzin po bilachipe ta na durion katar o lachipe. 10Volin tumen sargo phlalorre iek avere, ta traden liubao maskar tumende.
11Radin vrenimaia ta na cherdon lene. Radin e Devleke veselimaia ta zoriaia.
12Zivin vesele soke tumen aduricharen e Devle, kana nakhen duk pala o Del sikon te terpin, na muken te molintumen e Devleke.
13Pomozin e phlalorren kai si chorre, len e llenen kai aven duratar ande tumare chera.#Ebr 13.2; 1 P 4.9.
14Na den armaia golen kai mangen te maren tumen. Mai sukar mangen e Devletar te blagosil len.#Mt 5.44; Lk 6.28.
15Veselin tumen golenchar kai si vesele ta roven golenchar kai roven.
16Zivin lachimaia iek averea ta na istardon. Na cheren tumen mai bare katar aver, dikhen averen sargo isto tumen. Na mislin tumen kai tumen sen e mai bizai.#Pr 3.7.
17Vareko te cherda tumenge varesavo bilachipe na cheren leke isto gua bilachipe, mai sukar roden te cheren o lachipe angla e manusa. 18Cheren so sai te na achen nikaia ande joli. 19Na thoven kasti e llenenge kai dukhade tumen, muken len ande Devleke va, soke ando Pisipe phenel: Murni si e buchi te chinav e kris ta te dav e duk e bilachen, phenel o Gazda.#Dt 32.35. 20Ta i phenel:#Pr 25.21-22.
A te avela cho dusmano bokhalo, de le te jal, a te avela trusalo, de le te piel, gia ka chere te phabol leko mui lallaimatar. 21Na muk te dobil tut o bilachipe. Mai sukar dobisar e lachimaia o bilachipe.
Currently Selected:
Romanos 12: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
