Numeros 3
3
E Levita ta lengo rado
1Gava si o porodo e Aaronoko ta e Moiseseko, kana o Del dia orba po burdo katar o Sinai. 2Gala si e anava katar e chaurre katar o Aaron: Nadad, kai saia o mai purano, o Abiu Eleazar o Itamar.#Nm 26.60. 3Gala si e chaurre katar o Aaron kai sea thode te aven popura. 4A o Nadad ta o Abiu mule angla o Del kana ande iag kai ni saia pinllardi angla o Del po pusto katar o Sinai. Ta sar len ni saia minone, o Eleazar ta o Itamar lie orado te aven popura po than pe dadeko o Aaron.#Lv 10.1-2; Nm 26.61.
5O Del dia orba e Moisesea ta phenda leke:
6Ikhar e llenen katar e vicha katar o Levi te aven kai o Aaron ta te thovenpe tala leke va te pomozin le. 7Von ka radin e Aaronoke ta sa e foroke, ta ande chara kai chidiniaon ka cheren po rado, 8ta ka arakhen sa e ezgode katar o santuario ta ka radin ando santuario. 9Maskar e chaurre katar o Israel, e Levita si kai karing e Aaronoke ta leke porodoke, 10Ta ka thove e Aarone ta leke chaurren te aven popura. A vareko te cherela o rado e popoko kana vou inai popo gua lleno ka chindol pe leke te merel.
E livita si e Devleke
11O Del dia orba e Moisesea ta phenda leke:
12E levita si kai ezbirisardem po than katar e purve kai biandon katar o Israel. Soke e Levita si murne. 13Soke o purvo kai biandol si murno. Sar kai me cherdem te meren sa e llenen kai sea e purve kai biandilea ande phuv katar o Ejipto, ta me liem mange sa e llenen kai biandile o purvo ando Israel, gia e purve katar e manusa ta i katar e zivirinie. Goleke von si murne. Me sem o Del.#Ek 13.2,11-16.
O llindipe katar e levita
14O Del dia orba e Moisesea po pusto katar o Sinai ta phenda leke: 15Ka lline e llenen kai si levita prema lengi familia ta lengi familia purani, ka lline e minonen kai si lenge mai but katar iek chon upre. 16Ta o Moises cherda o llindipe gia sar o Del phendaia leke te cherel.
17E chaurre katar o Levi sea gala:
O Gerson, o Keat ta o Merari.
18E chaurre katar o Gerson sea gala prema pe anava ta pe familie:
O Libni ta o Simi.
19E chaurre katar o Keat, sea gala prema pe familie:
O Amram, o Ishar, o Ebron ta o Usiel.
20E chaurre katar o Merari sea gala prema pe familie:
O Mali ta o Musi. Gala si e familie katar o Levi prema pe familie purane.
21E familie katar o Jerson sea o Libni ta o Simi. 22Sa e llenen kai llinde lendar katar o chon llive upre, sea efta milie ta panch stotine. 23E familie katar o Jerson inzarena pe chare katar likel o kham palal katar o santuario. 24O birovi katar e vicha katar o Jerson saia o Eliasaf, o chaurro katar o Lael. 25Ande chara kai chidiniaon von arakhena o santuario, katar e chara kai ucharela o santuario, e kortina kotar katar delpe ande chara kai chidiniaon, 26e kortine katar e bar, ta e kortina kotar katar delpe ande bar, kai si pasa o santuario ta kai si pasa o altar truial ta i e sole kai thodona e kortine.
27E familie katar o Keat sea katar o Amram, o Ishar, o Ebron ta o Usiel, 28ta sa e llene llinde katar o chon upre sea ojto milie ta sov stotine, ta von sea thode de arakhen o santuario. 29Ta inzarena pe chare pe rig katar o sur katar o santuario. 30Ta o birovi katar e viche katar o Koat saia o elisafan, chaurro katar o Usiel. 31Ta von sea kai arakhena e arka katar e alava, o stali, o kandelero, e altare, e ezgode katar o santuario kai radin ta e kortina ta sa pe ezgodenchar.
32O mai baro birovi katar e levita saia o Eleazar, chaurro katar o popo Aaron ta vou saia thodo te dikhel e llenen kai arakhena o santuario.
33Katar o Merari saia e familia katar e malitas ta e familia katar e musitas gala si e familie katar o Merari. 34Sa e llenen kai llinde lendar katar o chon llive upre, sea sov milie ta dui stotine. 35Ta lengo birovi saia o Suriel, chaurro katar o Abial, ta inzarena pe chare pe rig katar o norte katar o santuario. 36E chaurre katar o Merari sea thode te arakhen e table katar o santuario, ta e alkave ta e pulsura, ta e riga kai thodon ta lenge ezgode, 37ta i e pulsura kai saia truial katar e bar, pe rigenchar kai thodon ta pe chilenchar ta pe solenchar.
38Pe rig oriental, angla o santuario ta anglal katar e chara kai chidiniaon, inzarena pe chare o Moises ta o Aaron ta e chaurre katar o Aaron, kai von sea kai arakhena o santuario po than katar o Israel. A te avela pase iek lleno kai von ni pinllarena gole lleneke chindolape te merel.
39Kana o Moises ta o Aaron cherde o llindipe katar e levita prema lenge familie, gia sar phendaia de cheren, e llene katar o chon upre kai sea llinde sea bista dui milie.
O pochindipe katar e chaurre mai purane
40O Del phenda e Moiseseke:
Llin sa e chaurren mai puranen katar e israelitura, katar iek chon upre prema lenge anava.
41Ta e levita ka le len mange, po than katar sa e chaurre e mai purane katar e israelita. Ta le i e zivirinie katar e levita, po than katar e purve zivirinie kai biandon katar e israelitura. Me sem o Del.
42Ta o Moises llinda sa e chaurren mai puranen katar e israelita, cherda le gia sar o Del phendaia leke te cherel. 43Ta sa e llene mai purane prema lenge anava katar iek chon upre, sea bista dui milie ta dui stotine ta eftavardes ta trin.
44Mapalal o Del dia orba e Moisesea ta phenda leke:
45E levita le len po than pe sa e mai purane chaurre katar o Israel, soke e levita si murne. Me sem o Del. 46A te pochindon e dui stotine ta eftavardes ta trin chaurre mai purane katar e israelitura, kai si mai but, 47ka mange panch tolaria rupune kai phariaven des gramura prema sar phariadol ando santuario pe suako lleno. 48Ta de gola love kai o Aaron ta i kai leke chaurre.
49Lia Moises e love katar o pochindipe katar e llene kai sea mai but neko so pochindea e levita, 50ta chidia milia ta trin stotine ta sovardes ta panch tolaria rupune, prema so sar phariadol ando santuario. 51Mapalal dia gala love kai o Aaron ta kai leke chaurre, gia sar o Del phendaia leke te cherel.
Currently Selected:
Numeros 3: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
