Numeros 14
14
E israelita vazdinaile po Del
Dt 1.26-33
1Ondaka e israelita thode te urkin, ta sorro riat thode te roven. 2Saurre thode te den orba e Moiseseki ta e Aaronoki. Ta phenena: ¡Daboida te mulama ando Ejipto, o kate po pusto! 3¿Soke o Del anda amen ande gaia phuv? ¿Te mera po maripe ta amare chaurre te peren ande va amare dusmanenge? ¡Mai sukar avela amenge te iri amen ando Ejipto! 4Ta thode te phenen iek avereke: ¡Thova iekhe te avel amaro birovi ta iri amen ando Ejipto!
5O Moises ta o Aaron die changa lligo ni lengo chikat dodisarda e phuv ta gua cherde le angla sa o foro, katar o Israel, 6O Josue ta o Kaleb i von llelea te dikhen goia phuv, chinde pe patave te dikhol kai sea dukhade 7ta phende sa e israelenge:
¡E phuv kai llelam te dikha si but sukar!
8A te avila drago e devleke vou ka inllarel amen kai goia phuv ta ka del la amenge. Goia phuv si kai o thud ta o aullin llan sargo pai. 9A na vazdiniaol po Del, ta na daran katar gola llenen katar goia phuv, soke amen ka jalen sargo marrno, len inai ko te pomozil len, a amenchar si o Del. ¡Na daran!#Ebr 3.16.
10Ondaka sa o sueto dela orba te mundaren len e barrenchar. Ondaka o baripe e Devleko sikadilo ande chara kai chidiniaon, angla e akha sa e israelenge 11ta o Del phenda e Moiseseke:
¿Pegachin ios gava foro ka del man e zea? ¿Pegachin ios ni ka pachan ande ma, ta ande bare ezgode kai cherdem maskar lende?
12Ka bichalav lenge iek nasualipe kai ka mundarel ta nasti ka len peke goia phuv, a tutar ka cherav iek foro mai baro ta mai zuralo neko von.
13A o Moises phenda e Devleke:
Tu che zuriaia ikandan katar o Ejipto gale foro. Kana e ejipsiura ka llanen so mange te chere, 14ka phenen le e llenenge katar o Kanaan. A gala llene asunde kai tu Devla san maskar gava foro, kai muke te dikhen cho mui ta kai cho oblako si upral pe lende, ta kai ollivesea lla angla lende ande iek baro oblako ta o rachaia ande iek bari iag. 15Te cherea te merel gale foro sargo ikhe llene, ogola phuvia kai asunde katar e bare ezgode kai cherdan ka phenen: 16O Del nasti cherda gale foro te del ande phuv kai phendaia lenge kai ka del len, ta goleke cherda len te meren po pusto. 17Goleke Devla akana sikav chi bari zor, gia sar dian orba kana tu phendan: 18Me sem o Del kai ni joliaivav oma ta sem baro ando volipe. Me prostiv o bilachipe ta golen kai vazdiniaon pe mande, ta ni phenav kai o dosalo si lacho. Me ochiniu o bilachipe e dadengo ande lenge chaurre, ande lenge unukura ta para unukura ta ande lenge para unukunenge o nukura.#Ek 20.5-6; 34.6-7; Dt 5.9-10; 7.9-10. 19Goleke cheres cho volipe kai si gia baro, prostisar o bilachipe gale foroko, gia sar prostisardanle katar o Ejipto llik kate.#Ek 32.11-14.
O Del dukhavel e israelen
Dt 1.34-40
20Ondaka o Del phenda:
Sukar me prostiv len, gia sar manglan le mandar.
21A gia sar si o chachipe kai me ziviu ta kai mo baripe pherel sa e phuv,#Ebr 3.18. 22ni iek katar gola kai dikhle mo baripe ta e bare ezgode kai cherdem ando Ejipto ta po pusto ta kai zumade man des droma ta ni kamle te kanden man, 23ni iek lendar ni ka dikhen e phuv kai phendem kai ka dav la lenge puranenge. Ni iek katar gola kai joliarde man ka dikhen la. 24A samo mo ande mo sluga Kaleb saia iek duo kai ni saia sargo ogolengo ta kandia man chachimaia. Goleke le ka mukav te del ande phuv kai llelo te dikhel ta leko porodo ka zil kote.#Jos 14.9-12. 25Akana e amalesita ta e kananeoura zivin ando putardipe. A tumen irin tumen thiara ta llan po pusto, po drom kai llal kai e Mora e Loli.
26O Del dia orba e Moisesea ta e Aaronoia ta phenda lenge:
27¿Pe gachin ios morabi te terpiu e orbe bilache kai den murne gala israelitura bilache? 28Goleke lla ta phen lenge kai me phenav gia: Me, o Del jav sovel pe mo zivoto kai ka cherav te perel pe tumende isto e orbe kai asundem kai tumen phenena. 29Sa e llene kai si lenge mai but katar e bis burs kai sea llinde kai die orbe bilache mandar.#Ebr 3.17. 30Ni iek tumendar ka del ande phuv, kai sovlienchar jalen kai ka dav la te zivin ande late. Samo ka den o Galeb chaurro katar o Jefone ta o Josue chaurro katar o Nun. 31A tumare chaurrenge kai tumen phenena kai ka peren ande va tumare dusmanenge, len ka inllarav len ande phuv kai tumen ni kamlen, ta von ka phinllaren la. 32A tumare esnage mule ka achen chudine pe gava pusto,#Ech 7.36. 33ta pe gava pusto tumare churre ka zivin sargo chobanura saranda burs. Gia von ka pochinen tumaro bilachipe, lligo ni sa tumen ka meren kate po pusto. 34Tumen achilen saranda llive ta dikhena e phuv, isto gia tumen ka achen saranda burs ta gia ka llanen sar me dukhavav. 35Me o Del, phenav le: Gia ka cherav gale foroia kai si bilacho kai chidinailo pe mande. Pe gava pusto ka malaven pi zatrania, kate ka meren.
O meripe katar e des llene kai llele te dikhen e phuv
36E llene kai o Moises bichaldaia te dikhen e phuv kana irisaile cherdea sa e foro te den orbe ta te vazdiniaon po Del, ta phenea kai goia phuv saia bilachi, 37ta gola llene kai diea orba bilachi gole phuviaki, mule katar iek muka angla o Del. 38A o Josue chaurro katar o Jefone ni mulo, maskar gola llene kai llelea te dikhen e phuv.
Marde e israelen ande Orma
Dt 1.41-46
39Kana o Moises phenda lenge so o Del phenda, saurre tristosaile. 40Ta ustile thiarinako rano ta likiste upral po burdo, ta phenena: ¡Ia san kate! lla kai e rig kai o Del phenda, soke cherdam o bilachipe.
41A o Moises phenda lenge:
¿Soke ni kanden so phenda o Del? ¡I gava so mangen te cheren ni ka likel tumenge sukar!
42Na llan mai angle, soke o Del inai tumenchar. Tumare dusmanura ka maren tumen. 43Incha angle aduricharen tumen e amalesita ta e kananeoura, te marenpe tumenchar ta ka mundaren tumen e jarniea. Ta sar tumen muklen e Devle, vou ia inai tumenchar.
44Avon i gale alavenchar pale thode te liken upral po burdo, a e arka katar e alava e Devleke ta o Moises ni miskosaile katar o pero. 45Ondaka fuliste e amalesita ta e kananeoura kai zivina ande goia phuv, ta marde e israelen llik kai e Orma.
Currently Selected:
Numeros 14: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
