Mateo 9
9
O Jesus sastarel iekhe manuse kai nasti phirela
Mk 2.1-12; Lk 5.17-26
1Mapalal o Jesus likisto ande llimia, nakhlo pe o goia rig katar e mora ta avilo kai po foro. 2Kote inllarde lete iekhe llene kai nasti phirela inzardo ande iek postelia, kana dikhla o Jesus lengo pachape, phenda e bangeke:
Chaurrea, cher chuke zor, cho bilachipe si prostime.
3Ondaka nesave kovacha e zakonoke mislisaile gia: Gava lleno kusel e Devle gole alavenchar. 4A o Jesus llangla so mislina, ta puchla len: ¿Soke mislin tumen gia?
¿Soke mislin tumen gia baro bilachipe ande tumaro lio? 5¿So si mai lesno, te phendol: Cho bilachipe si prostime, o te phendol:
Uste ta phir? 6Goleke ka sikavav tumenge kai o Chavo e Manuseko si le e zor pe phuv te prostil o bilachipe. Ondaka phenda e bangeke:
Uste, le chi postelia ta llatar ande cho cher.
7Ta o lleno kai nasti phirela ustilo ta llelotar kai po cher. 8O sueto chudisailo kana dikhla goia ezgoda ta blagosina e Devle kai diaia gia bari zor e manusen.
O Jesus ikharel e Mateo
Mk 2.13-17; Lk 5.27-32
9Kana o Jesus llelotar kotar, dikhla iekhe llene kai ikhardola Mateo kai besela po stali, kote kai pochindol e love e phuviake ta o Jesus phenda leke:
Aide pala ma.
Ondaka o Mateo ustilo ta llelo pala le.
10Iek llive kai o Jesus saia besindo pe sinia ando cher, ta but publikanura ta bilache llene kai avilea, i von besle pe sinia e Jesusea ta leke disipulonenchar. 11Kana dikhle gava e fariseura, puchle e disipulonen:#Lk 15.1-2.
¿Soke tumaro kovachi jal e publikanonenchar ta i e bilache llenenchar?
12Kana o Jesus asunda gaia orba, phenda lenge:
E saste ni trubul len doktori samo e nasualen. 13Llan tumen ta sikon so si gala alava: zalba mangav a na kurbanura, soke ni avilem te ikharav lachen, avilem te ikharav e bilachen te sai aven keime.#Os 6.6; Mt 12.7.
Puchen katar o alluno
Mk 2.18-22; Lk 5.33-39
14Ondaka avile kai o Jesus e disipulura katar o Juan kai kristila ta puchle le:
¿Soke amen ta i e fariseura alluni a che disipulura ni cheren le?
15O Jesus phenda lenge:
¿Sai aven zalosne e llene kai si ikharde pe iek biau kana o chavo kai zinilpe si lenchar? A ka avel o llive kana ka len lendar gole kai zinilpe, ondaka von ka allunin.
16Niko ni thovel iek kotor chiti nevo pe iek fistano purano, soke o kotor o nevo chikniol ta chirdel, ta cherel te chindol ios mai but o chiti o purano. 17Ta ni thodol e mol nevi ande morcha purane, soke e morcha pharron ta gia e mol ta e morcha jasaon, Goleke si te thodol e mol e nevi ande morcha neve. Ta gia e dui ezgode te achen pe iek than.
E chorri e Jairoki ta e diskinia kai peravela rat
Mk 5.21-43; Lk 8.40-56
18Kana o Jesus phenela lenge gala orbe, avilo lete iek lleno katar e gazda e judionenge ta dia changa angla le, ta phenda leke:
Mi chorri muli, akana aide ta thov cho va pe la ta ka zivil.
19O Jesus ustilo ta llelo pala le pe disipulonenchar. 20Ta kana vou llala, iek diskinia nasuali kai peravela rat cherela desudui burs, avili palal pala o Jesus ta dodisarda leko gertachi. 21Soke phenela voi peke: Samo te dodiu leko gertachi ka sastivav. 22Ondaka o Jesus boldinailo ta dikhla pe late, ta phenda lake:
Cher chuke zor chorrie, cho pachape sastarda tut.
Ta e diskinia sastili isto ande gua saiato.
23Kana o Jesus dia ando cher katar o gazda e judionengo, ta kana dikhla golen kai basalena e tuturuge ta o sueto kai urkila ta rovena. 24Phenda lenge:
Len tumen katar soke e minoni inai muli, voi sovel.
A von marena letar espurnia. 25A kana tradie e sueto avri, dia andre ta lia e minona e vastetar ta voi ustili. 26Ta lleli gaia viasta pe sa goia phuv.
O Jesus sastarel duie korren
27Kana o Jesus likisto kotar llele pala le dui korre kai urkina ta phenena leke:
¡Te avel chuke zalba amendar Chavo e Davideko!
28Kana avilo kai o cher avile pasa le e korre, ta o Jesus puchla len:
¿Tumen pachan kai sai cherav gaia ezgoda?
Von phende leke:
Ea Gazda.
29Ondaka dodisarda lenge akha ta phenda:
Gia sar si tumaro pachape, gia te cherdol tumenge.
30Ta e korre dikhle. A o Jesus phenda lenge te na llanel le niko. 31A von kana likiste kotar phende saurrenge sa e bare ezgode kai o Jesus cherela.
Iek nemao del orba
32Kana von llanatar, ande kai o Jesus iekhe nemave kai saia o llavolo ande lete. 33Kana tradia e llavolo letar, o nemao dia orba, a o sueto chudilape ta phenela:
¡Nikada ni dikhlam iek ezgoda sargo gaia ando Israel! 34A e fariseura phenena:#Mt 10.25; 12.24; Mk 3.22; Lk 11.15.
Isto o gazda e llavolonengo diale e zor te chudel avri e llavolonen.
O Jesus avila leke zao katar o sueto
35O Jesus phirela sa e forura ta i e forichura minone, ta sikavela ande lenge khanllira e judionenge, ta dela orba katar e lachi viasta e charoinaki ta sastarela suako nasualipe ta suako duk e foroki.#Mt 4.23; Mk 1.39; Lk 4.44. 36Kana dikhla kai sea but llene avila leke zao lendar, soke ni saia len niko ta sea rispime sargo e bakre kai inai len chobano.#Nm 27.17; 1 R 22.17; 2 Kr 18.16; Jer 50.6-7; Ez 34.5; Zak 10.2; Mk 6.34. 37Ondaka phenda pe disipulonenge:
Chachimaia o lliu si but a cherricha e manusa kai radin. 38Goleke molintumen e Gazdake te bichalel llenen kai radin te chiden o lliu.#Lk 10.2.
Currently Selected:
Mateo 9: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
