Mateo 17

O Jesus cherdol sargo aver

Mk 9.2-13; Lk 9.28-36

1Nakhle sou llive kotar ta o Jesus inllarda e Pedro, e Santiago ta e Juane phlal e Santiagoko upre pe iek burdo but baro. 2Kote angla lende cherdilo sargo aver, ta leko mui klichisarda sargo o kham, ta leke patave cherdile parrne sargo o villelo. 3Ta sikadile lenge o Moises ta e Eliase kai dena orba e Jesusea. 4Ondaka o Pedro phenda e Jesuseke:

Gazda, ¡Gia sukar kai sam kate! Te mangea, ka cherav kate trin cherorra e patrenchar:

Iek chuke, aver e Moiseseke ta aver e Eliaseke.

5Kana o Pedro dela orba, iek oblako villeloko ucharda len ta asundilo iek avazi katar o oblako, kai phenela: Gava si mo Chaurro kai voliv le ta kai esvirisardem, le asunen.#Jen 22.2; Sal 2.7; Is 42.1; Mt 3.17; 12.18; Mk 1.11; Lk 3.22; 2 P 1.17-18.

6Kana von asunde gaia orba, e disipulura thodepe tele moia pe phuv ta saia lenge bari dar. 7Ondaka o Jesus avilo pasa lende ta dodisarda len, ta phenda lenge:

Usten ta na daran.

8Kana ustile ni dikhle nika, samo e Jesuse.

9Kana fuliena katar o burdo, o Jesus phenda lenge:

Na phenen nikake so dikhlen lligo ni o Chavo e Manuseko ka ustel katar o meripe.

10Ondaka e disipulura puchle e Jesuse:#Mal 4.5.

¿Soke e kovacha e zakonoke phenen kai mai anglal si te avel o Elias?

11O Jesus phenda lenge:

Gua si o chachipe, o Elias avel mai anglal ta ka lacharel sa e ezgode. 12A me phenav tumenge kai o Elias ia avilo, ta von ni pinllarde le, ta cherde lea sogo mangle, isto gia o Chavo e Manuseko ka nakhel patnia pala lende.#Mt 11.14.

13Ondaka e disipulura llangle kai o Jesus dela lenge orba katar o Juan kai kristila.

O Jesus sastarel iekhe chaurre bengalo

Mk 9.14-29; Lk 9.37-43

14Kana avile kote kai saia o sueto, avilo iek lleno pasa o Jesus ta dia changa angla le, ta phenda leke:

15Gazda, te avel chuke zao me chaurretar soke perel bengendar ta nakhel bari patnia ta but droma perel pe iag ta but droma ando pai. 16Andem le kai che disipulura, a von nasti sastarde le.

17O Jesus phenda lenge:

¡Ioi manusalen kai inai tumen pachape ta sen bilache! ¿Pe gachin ios morabi te avav tumenchar? ¿Pe gachin ios morabi te terpiu tumen? Anen mange kate e chaurre.

18Ondaka o Jesus dia po llavolo, ta o llavolo likisto katar o chaurro, ta kotar angle achilo sasto ande goia doba.

19Ondaka e disipulura avile pasa o Jesus ta puchle le po chorial:

¿Soke amen nasti tradiam gole llavolo?

20O Jesus phenda lenge:#Mt 21.21; Mk 11.23; 1 Kor 13.2.

Soke si tumen cherricha pachape. Chachimaia phenav tumenge kai te avela tumaro pachape sargo iek simicha mostasaki ka phenen gale burdoke:

Le tut kotar ta thov tut pe aver rig ta gua burdo ka cherel le, ta tumen ka cheren suako ezgoda. 21A gaia buchi nasti cherdol te na avela molipe ta alluno.

Pale o duito phenel o Jesus kai ka merel

Mk 9.30-32; Lk 9.43-45

22Kana von sea ande Galilea, o Jesus phenda lenge:

O Chavo e Manuseko si te avel dino ande va e manusenge, 23ta ka mundaren le, a ando trito llive ka ustel katar o meripe.

A von tristosaile but.

E love kai si dine ando cher e Devleko

24Kana o Jesus ta leke disipulura avile ando foro katar o Kafarnaum, avile pasa o Pedro e llene kai chidena e dui drakme kai denpe ando cher e Devleko ta puchle le:#Ek 30.13; 38.26.

¿Tumaro kovachi ni pochinel e dui drakme?

25O Pedro phenda:

Ea vou pochinel.

Kana o Pedro dia ando cher, o Jesus mai anglal dia orba lea ta phenda leke:

¿A tu Simon so misli? E charura, ¿katar len e love, katar gola kai si katar leki phuv o katar gola kai inai katar leki phuv?

26O Pedro phenda leke:

Katar gola kai inai katar leki phuv.

O Jesus phenda leke:

Goleke gola kai si katar leko foro ni pochinen. 27A te na joliaon, lla ande mora, chude e mreza ta le o purvo macho kai ka ikane, putar leko mui ta ka malave iek tolari. Le le ta de le pala ma ta i pala tu.

Currently Selected:

Mateo 17: BACHRO

Highlight

Copy

Compare