Mateo 11
11
1Kana o Jesus sikada pe desuduie disipulonen so te cheren llelotar kotar te sikavel e lachi viasta ande lenge forura.
E llenen kai bichalda o Juan kai kristila
Lk 7.18-35
2Kana o Juan saia ande rubie phende leke so cherela o Jesus ta bichalda duien katar pe disipulura, 3te puchen le: ¿San tu gua kai saia te avel o si te adurichara avere?
4O Jesus phenda lenge:
Llan ta phenen e Juaneke e ezgode kai dikhen ta asunen. 5Phenen leke kai e korre dikhen, e bange phiren, e leprosura saston, e kasuke asunen, e mule llundinpe ta e chorrenge phendol e lachi viasta.#Is 61.1; 35.5-6. 6¡Ta blagosime si gua kai ni jasarel po pachape ande ma!
7Kana von llanatar thoda o Jesus te del orba e llenenge katar o Juan ta phenela: ¿So llelen tumen te dikhen po pusto? ¿Iek ran chinome e balaviatar? 8A te na, ¿so llelen te dikhen? ¿Iekhe manuse furiado ande glamne patave? Tumen llanen kai e llene kai furiadon gia zivin samo ande chera e charoke. 9¿A so llelen te dikhen? ¿Iekhe profeta? Ea phenav tumenge, ta mai but neko iek profeta. 10Soke o Juan si kai si pisime letar:#Mal 3.1.
Me bichalav me profeta angla tu,
te lacharel chuke o drom.
11Chachimaia phenav tumenge kai maskar sa e manusa, ni iek ni saia mai baro neko o Juan kai kristil, a o mai mimono ande charoina e milosoki si mai baro neko vou.
12Sar kana avilo o Juan kai kristil llik akana, e charoina e milosoki jal duk katar o silnope e manusengo, ta e llene silne lenla peke. 13Sa e poraukura ta o zakono phende so saia te avelpe llik kai o Juan,#Lk 16.16. 14a te kamena te len le, vou si gava Elias kai saia te avel.#Mal 4.5; Mt 17.10-13; Mk 9.11-13. 15Ka si len kan te asunen.
16¿A pe ka ka phenav kai si chuti gaia vicha? Von si sargo e minone kai besen po maskar katar e forura ta urkin ogole minonenge kai llan lenchar ta phenen lenge. 17Basaldam tumenge ande firura ta ni chelden, llilabiam tumenge llilia zalbake ta ni rovden. 18Soke avilo o Juan kai ni jal ta ni piel, ta phenen letar, ande le si o llavolo. 19Mapalal avilo o Chavo e Manuseko kai jal ta piel ta phenen letar, gava si iek lleno kai samo jal ta piel ta kai si amal e llenenchar kai si publikanura ta e manusenchar bilache. A leko bizaipe dikhol ande so cheren sa leke chave.
E forura kai ni kamen te pachan
Lk 10.13-15
20Ondaka lia o Jesus te dosarel e foronen kote kai vou sastardaia bute llenen, soke ni irisailea katar pe bilache droma. Ta phenela gia: 21¡Tesko chuke, Korazin! ¡Tesko chuke Betsaida! Soke te cherdilea ando Tiro ta ando Sidon e bare ezgode Devlikane kai cherdile tumende, von ollikana irisailea katar pe bilache droma ande patave zalosne ta chudiea prajo pe po soro.#Is 23.1-18; Ez 26.1—28.26; Jl 3.4-8; Am 1.9-10; Zak 9.2-4. 22Goleke, phenav tumenge kai ando llive e krisako tumen ka aven mai dukhade neko e llene katar o Tiro ta katar o Sidon. 23A tu, foro katar o Kapernav, ¿misli kai ka ave vazdino llik ando miloso? Ka fulie llik kai e charoina e merimaki, a te cherdilea ande Sodoma e bare ezgode Devlikane kai cherdile ande tute, llik ande gala llivesa e Sodoma achilia.#Jen 19.24-28; Is 14.13-15. 24Goleke phenav tumenge kai ando llive e krisako ka avel mai bari chi duk neko e Sodomaki.#Mt 10.15; Lk 10.12.
Samo o Chavo llanel ko si o Dad
Lk 10.21-22
25Ande gua vreme o Jesus phenda:
Blagosiv tut, Dade, Gazda e milosoko ta i e phuviako, soke gurudan gala ezgode katar e bizai ta katar e llangle ta sikadanlen e minonenge. 26Ea Dade, soke gia avila chuke drago te cherele.
27Mo Dad dia mande sa e ezgode. Niko ni pinllarel e Chave, samo o Dad, ta niko ni pinllarel e Dade samo o Chavo ta o Chavo sikavel le kake vou mangela.#Jn 3.35. 28Aven mande sa gola kai sen radime ta kai inllaren pharipe, ta me ka cherav te lelpe tumendar o chiñipe. 29Kanden mo zakono ta sikon mandar kai ni istardivav ta mo lio si kovlo ta manchar ka lelpe tumendar o chiñipe. 30Soke mo zakono sai inllardol ta inai pharo.#Is 30.15; Jer 6.16.
Currently Selected:
Mateo 11: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
