Josue 6
6
Sar lie peke o Jeriko
1Niko nasti dela ando Jeriko ta niko nasti likela letar, soke e udara sea phangle te arakhen e foro katar e israelitura. 2A o Del phenda e Josueeke:
Me diem tute o Jeriko, leko charo ta leke boñikura. 3Llan truial katar o foro sa e boñikura sov llive, iek drom suako llive. 4Efta popura ka llan anglal katar e arka, ta suako iek ka inllarel iek tuturuga cherdi katar e sing e bakreki. Ta ando eftato llive ka llan efta droma truial katar o foro, ta e popura ka basalen e tuturuge. 5Kana ka asunen kai o basaldipe katar e tuturuge si lungo, tumen ka urkisaren sa e zoriaia, ta e zidura katar o foro ka peren. Ondaka suako iek ka llal orta karing o foro te del andre.
6O Josue chavo katar o Nun ikharda e poponen ta phenda lenge:
Inllaren e arka katar o alav, ta efta popura te llan angla la. Inllaren tuturuge cherde katar e sing e bakreki. 7Ta e foroke phenda:
Llan truial katar o foro. E boñikura te llan angla e arka e Devleki.
8Sa cherde so phenda lenge o Josue. E efta popura llana anglal katar e arka katar o alav e Devleko ta basalena e efta tuturuge, ta e arka katar o alav llala pala lende. 9E boñikura llana anglal katar e popura kai basalena e tuturuge, ta ogola kai arakhena lenge zea llana palal katar arka, ta e popura ni achena te basalen e tuturuge. 10A o Josue phenda e boñikonenge te llan bi te phenen niso lligo ni ka phenel lenge te urkin sogo sai.
Sar lie o Jeriko
11O Josue cherda te llal e arka e Devleki truial katar o foro iek drom. Mapalal irisaile ando pero ta racharde kote goia riat. 12Thiarinako rano o Josue ustilo ta e popura lie e arka e Devleki. 13E efta popura llana anglal katar e arka e Devleki ta ni achena ni te phiren ni te basalen e tuturuge. E boñikura llana angla lende ta ogola boñikura llana palal katar e arka e Devleki. E tuturuge ni achena te basen. 14Ando duito llive, pale llele iek drom truial katar o foro, ta irisaile ando pero. Gia cherde sov llive.
15Ando eftato llive ustile thiarinako rano, ta phirde efta droma truial katar o foro sar cherdeale ogola llivesa. A gua llive phirde truial katar o foro efta droma. 16Kana e popura basalde e tuturuga ando eftato drom, o Josue phenda e llenenge:
¡Urkisaren! O Del dia tumenge o foro. 17O foro ta sa so si andre ka avel zatrime, soke gia phenda le o Del. Samo e kurvichka e Rajab ka zivil ta sa gola kai ka aven ande lako cher, soke voi guruda e llenen kai bichaldam po chorial.#Dt 13.15-16; 20.16-18; Jos 2.6. 18Arakhen tumen te na len niso katar so si ando foro soke o Del phenda te avel sa zatrime. Te lena fiso katar o foro ka cheren te avel proketo o pero katar o Israel, ta ka perel pe tumende o bilachipe.#Jos 7.1. 19A o sunakai, o rup ta sa e ezgode tuchne ta sastrune, ka aven dine e Devleke ta gurudine kote kai si leko barvalipe.
20O foro urkisarda ta e popura basalde e tuturuge. Ta kana o foro asunda e tuturuge sa urkisarde but zurale ta o zidura katar o Jeriko peletar.#Ebr 11.30. 21Mapalal mundarde e murusen, e diskinien, e ternen e puranen, ta i e guruven, e bakren, ta e magarchen.
22O Josue phenda e llenenge kai avilea te dikhen e phuv:
Llan kai o cher katar e kurvichka te ikanen la kotar ta sa e llenen kai si late, gia sar tumen jalen lake sovel. 23Ta e llene llele kai e Rajab ta ikande la, lake dade, laki da, lake phlalen ta lake familia, ta inllarde len avri katar o pero e Israeleko. 24Ta phabarde e foro ta sa so saia andre. Samo ikande o rup, o sunakai, e ezgode tuchne, ta e ezgode sastrune ta thode len ando barvalipe katar o cher e Devleko. 25A o Josue braduisarda e Rajabe ta lake familia ta sa so saia la, soke voi guruda e llenen kai o Josue bichalda te dikhen e phuv po chorial. Ta kotar angle laki familia zivisarda maskar e israelitura llik allive.#Ebr 11.31.
26Mapalal o Josue jala sovel, ta phenda:
Proketo angla o Del o lleno kai pale ka vazdel o Jeriko. Te perel pe leko chavo mai purano e barra katar o foro, ta pe leko chavo mai terno te peren e udara.#1 R 16.34.
27O Del pomozisarda e Josuee ta leko anav cherdilo but pinllardo ande sa e phuv.
Currently Selected:
Josue 6: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
