Job 22
22
Iek katar e trin orbe
Caps. 22—27
Elifas
1Ondaka o Elifas o temanita phenda:
2¿Sai del chari o manus e Devle?
Nasti, soke o manus bizai rodel samo piro chari.
3¿Veselilpe o Del kai si le sa e zor
soke tu san chacho, o dobil vareso
soke tu lla chachimaia ande cho zivoto?
4¿A so, o Del dukhavel tut,
o thovel tu pe kris soke kande le?
5¿O soke cho bilachipe si baro
ta e ezgode bilache kai chere inai len son?
6Soke tu mangea katar che phlal te muken
pe patave pala niso, ta lian e patave
katar gola kai ni saia len so te thoven pe pete.
7Ni dian pai gole kai saia chinio,
ta achadan o marrno katar o bokhalo.
8A sana barvalo ta saia tut e phuv,
sana iek glamno lleno kai zivisarda pe phuv.
9E phivlien bichaldan chuche vastenge,
ta dukhavea e minone bi dadenge.
10Goleke san istardo solenchar
ta avel pe tute iek bari dar,
11Iek baro truniariko ni mukel te dikhe,
ta san telal katar o pai.
12O Del si chak upre ando miloso,
e cheraia kai si mai upre achen tala leke porrne.
13¿A sai phene tu:
So llanel o Del?
¿Sar ka krisil maskar o truniariko?
14¿Ta kai e oblakura si truial letar ta ni dikhel
soke phiravelpe pe suako rig ando miloso?#Sal 73.22; Is 29.15.
15¿Mange te nakhe i tu po drom o purano
kai nakhle e llene bilache,
16kai avilo mai oma lengo vreme,
kana inllarda len iek baro pai?
17Von phenena gia e Devleke:
Duriu amendar.
¿A so cherda lenge o Del kai si le sa e zor?
18O Del pherdaia lachipe lenge chera.
A ni kamam te misliu man sargo von.#Job 21.16.
19E llene chache ka dikhen ta ka veselinpe,
ta gua kai inai dosalo
ka marel lendar espurnia ta ka phenel:
20Zatrime avile amare dusmanura,
ta e iag phabarda so achila lendar.
21Cher tut pale amal katar o Del, ta
ka avel tut pas, ta gia ka ave ando lachipe.
22Le akana o zakono kai phenda,
ta thov leke alava ande cho lio.
23Te irisailen kai o Del kai si le sa e zor,
te chudian tutar o baripe,
ta te chudian dur katar chi chara o bilachipe,
24ka avel tut mai but sunakai neko phuv,
ta sargo e barra katar o pai o sunakai katar o Ofir,
25o Del kai si le sa e zor ka arakhel tut,
ta ka avel tut rup pe umpe.
26Ta chi dragostia ka avel o Del kai si le sa e zor,
ta ka dikhe upre po Del.
27Ka moli tut leke, ta vou ka asunel,
ta tu ka chere e sovel kai jalan.
28Sogo ka chere ka likel chuke sukar,
ta cho drom ka klichil.
29Soke vou peravel gole kai istardol,
ta braduil gole kai dikhel tele.
30Vou ka mukliarel gole kai inai dosalo,
ta pala o chistope katar che va ka avel braduime.
Currently Selected:
Job 22: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
