Jeremias 44
44
O Del bichalel iek orba e judionenge kai llele ando Ejipto
1O Del dia orba a Jeremiaseke katar e judiura kai zivina ando Migdol, ando Tafnes, ando Menfis ta ando Patros kai si ande phuv katar Ejipto ta phenda lenge: 2Gia phenda o Del kai si le sa e zor, o Del katar o Israel:
Tumen dikhlen sa e zatrania kai andem po Jerusalem ta pe sa e forura katar o Juda ta sa gala forura akana si zatrime ta niko ni zivil ande lende, 3pala o bilachipe kai von cherde te joliaren man, phabarde lenge o taimano ta blagosisarde avere delen kai von ni pinllarena, ni tumen ni tumare dada. 4Ta bichaldem tumende sa me slugen e profetanen, but rano ta ni achilem te phenav tumenge:
Na cheren gala ezgode kai si gado kai me murziu pe lende. 5A ni asunden te sai irin tumen katar tumaro bilachipe, te na phabaren o taimano avere delenge. 6Goleke dia avrial mo silnope ta mi joli ta phabarda e forura katar o Juda ta e droma katar o Jerusalem ta achile puste ta zatrime gia sar si allive. 7Goleke, gia phenel o Del kai si le sa e zor, o Del katar o Israel:
¿Soke tumen dukhaven gachin isto tumen ta cheren te na achel ni murus, ni diskinia, ni terno ni minono kai piel kolin ando Juda ta te na achel lendar ni iek lleno?
8Ta joliaren man e ezgodenchar kai si cherde tumare vastenchar, ta phabaren o taimano avere delenge ando Ejipto, kote kai dien te zivin, golea isto tumen ka mundaren tumen, ta ka aven prokete ta ka maren tumendar espurnia sa e phuvia. 9¿Bristrailen katar o bilachipe kai cherde tumare papura, katar o bilachipe kai cherde e charura katar o Juda, katar o bilachipe kai cherde lenge rromia, katar o bilachipe kai cherden tumen ta o bilachipe kai cherde tumare rromiengo, ando Juda ta pe droma katar o Jerusalem? 10Ni jalen lallao ta ni darailen llik allive, ta ni llelen prema mo zakono ta prema mo sikadipe, kai diem tumen ta tumare paponen.
11Goleke, gia phenda o Del kai si le sa e zor, o Del katar o Israel:
Me ka dav tumen e zea te avel tumenge o bilachipe ta ka zatriv sa o Juda. 12Ta ka lav golen kai boldinaile ta llene ando Ejipto te zivin kote ta ando Ejipto sa ka aven zatrime. Ka mundaren len e jarniea ta ka bilavel len e bok. E jarniea ta e bokhaia ka meren, katar o mai terno llik kai o mai purano ta ka aven proketime, ka daran pala tumende ta maren tumendar espurnia ta ka kusen tumen. 13Soke ka dukhavav golen kai ka zivin ando Ejipto gia sar dukhadem e llenen ando Jerusalem e jarniea, e bokhaia ta e nasualimaia. 14Ta gola kai die ando Ejipto te zivin kote, niko ni ka achel llundo, niko nasti ka nasel te irilpe ando Juda, te irinpe kote kai zelin te aven, soke kote ka irinpe nesave llene kai ka nasen.
15Ondaka sa gola llene kai llanena kai lenge rromia phabarena o taimano avere delenge, ta sa gola diskinie kai sea kote ta but llene ta sa o foro kai zivila ando Ejipto, ando Patros, phende gia e Jeremiaseke:
16E orba kai andan amenge ando anav e Devleko, ni ka asuna la tutar, 17soke ka chera suako alav kai phendam, ka phabara o taimano e charoinake katar o miloso ta ka chuda e mol, gia sar cherdamle llik akana ta sar cherde le amare papura, amare charura ta amare sudura, ande forura katar o Juda ta pe plase katar o Jerusalem ta saia amen but jape ta sama vesele ta ni dikhlam ni iek bilachipe. 18A sar kana muklam te phabara o taimano ta te chuda e mol e charoinake katar o miloso, inai amen suako ezgoda ta mundaren amen e jarniea ta e bokhaia.
19Ta e diskinie phende:
A kana amen phabardam o taimano e charoinake katar o miloso ta chudiam lake e mol, ¿cherdam amen marrne te da len lake te blagosi le ta chudiam lake e mol, bi te pucha amare rromen?
20Ondaka dia orba o Jeremias sa e foroke, e murusenge ta e diskinienge ta sa e foroke kai phende leke gala alava, ta phenda:
21¿A tumen mislin kai o Del ni llanel gola ezgode? O Del llanela kai phabarden o taimano ande forura katar o Juda ta pe droma katar o Jerusalem, tumen, ta tumare papura, tumare charura ta tumare sudura ta sa o foro. 22Ta o Del nasti terpisardale ios pala o bilachipe kai cherena, pala o gadope kai cherden. Goleke tumari phuv achili zatrime, ande dar ta proketime, lligo ni achili pusti, gia sar si allive. 23Soke phabarden o taimano ta cherden o bilachipe e Devleke ta ni kandien leko avazi, ta ni phirden pe leko zakono ni pe leko sikadipe ni pe leke alava. Goleke avila pe tumende gava bilachipe, gia sar si allive.
24Ta o Jeremias phenda sa e foroke ta sa e diskinienge:
Asunen o alav e Devleko, sa e llene katar o Juda kai si ando Ejipto.
25Gia dia orba o Del kai si le sa e zor, o Del katar o Israel ta phenda:
Tumen ta tumare diskinie tumare orbaia phenden le ta tumare vastenchar cherden le ta phenden kai ka chera e sovel kai jalan, kai ka phabaren o taimano e charoinake katar o miloso ta te chuden lake e mol. Tumen cherden e sovel kai jalen. 26Goleke, asunen o alav e Devleko, sa e llene katar o Juda kai zivin ando Ejipto:
O Del phenel:
Jalem sovel pe mo baro anav, kai ni ka molilpe mange ios ande sa e phuv katar o Ejipto ni iek lleno katar o Juda, ta ni ka phenel:
Ando anav katar o Del o Gazda. 27Akana me ka dikhav pe lende te avel lenge o bilachipe, a na o lachipe. Ta sa e llene katar o Juda kai si ando Ejipto ka aven mundarde e jarniea ta e bokhaia lligo ni ka meren saurre. 28A cherricha si gola kai ka nasen katar o jarni ta ka irinpe katar o Ejipto te aven ando Juda. Goleke sa ogola llene kai die ando Ejipto te zivin kote, ka llanen kako alav ka cherdol kote, murno, o lengo 29O Del phenel:
Prema iek ezgoda ka llanen, kai pe gava than ka dukhavav tumen, ta sai llanen kai me alava ka cherdon te avel o bilachipe pe tumende: 30Gia phenel o Del:
Me ka cherav te perel o Faraon o Ofra charo katar o Ejipto ende va katar leke dusmanura ta ande va katar gola kai mangen te mundaren le, gia sar diem e Sedekiase charo katar e Judea ande va katar o Nabukodonosor charo katar e Babilonia, kai saia leko dusmano ta kai mangela te mundarel le.#2 R 25.1-7.
Currently Selected:
Jeremias 44: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
