Jeremias 22
22
Poroka katar e charura e Judaeke
1Gia phenda o Del:
Lla kai o cher katar o charo e Judaeko, ta kote de gaia orba, 2ta phen gia:
Asun o alav e Devleko, tu charo katar o Juda kai bese po trono katar o David, tu ta che sluge, ta cho foro kai del katar gala udara. 3Gia phenda o Del:
Cheren kris ta o cha chipe, ta braduin e llene kai si dukhado, katar gua kai dukhavel le, ta na kojaven ta na choren gole kai si katar aver phuv, ni e minonen bi dadenge ta ni e phivlien, ta na mundaren gole kai inai dosalo pe gava than. 4Soke te kandea chachimaia gava alav, e charura kai besen po than e Davideko, ka den katar e udara gale foroke ande pe bordona ta upral pe pe gra ta lenchar lenge sluge ta lengo foro. 5A e na asunde gala alava, phenel o Del, me jalem sovel isto pe mande, kai gava cher ka achel pusto.
6Soke gia phenda o Del cheres o cher katar e charura e Judaeke:
Tu san mange sargo o burdo Galaad,
sargo o than mai vazdino katar Libano,
a ka cherav te ache pusto, ta sargo
e forura kai kote ni zivil niko.
7Ka chinavav chuke e zatrania,
suako iek ka anel pe ezgode te marelpe,
ta ka chinen che sedrura esvirime
ta ka chuden len ande iag.
8Ta but llene ka nakhen pasa gava foro, ta ka phenen iek avereke:
¿Soke cherda gia o Del gale bare foroia? 9Ta ka phendol lenge:
Soke mukla o alav katar lengo Gazda o Del, ta blagosisarde avere delen ta radisarde lenge.
Iek orba e Jeremiaseke cheres o Salum Joacaz
10Na rov pala gua kai mulo,
ta te na avel chuke zalba letar,
rov zurale pala gua kai llaltar,
soke ni ka irilpe nikada
ta ni ka dikhel pi phuv kote kai biandilo.#2 R 23.29-30; 2 Kr 35.20-25; 2 Kr 36.1-4.
11Soke gia phenda o Del cheres o Salum
chavo katar o Josias, charo katar o Juda,
kai charoisarda po than katar o Josias leko dad
ta kai likisto katar:
Ni ka irilpe ios kate.
12Ta ka merel kote kai inllarde le phanglo, ta ni ka dikhel ios gaia phuv.
E orba kai phenel katar o Joakim
13¡Tesko goleke kai cherel po cher kojaimaia,
ta cherel pe sobe bangimaia,
ta thovel e llenen te radin leke llabe
ta ni pochinel lenge so mol lengo rado!
14Ta phenel:
Ka vazdav mange iek cher baro,
ta sobe kai del e balav andre, ta cherel lake
penllerave ta avrial thovel leke kotora kastune
katar o sedro ta makhel le ando lolo.
15¿Ka charoi soke truial tutar si o sedro?
Cho dad, ¿Ni jala ta piela ta cherda o chachipe
ta ondaka llela leke sukar?
16Vou cherda kris e llenenge kai trubul len,
e llenenge kai si proste, ta ondaka llela leke
sukar. ¿Ni pinllarela man? Phenel o Del.
17A che akha ta cho lio si samo te dobi tu,
ta te mundare e llenen kai inai dosale,
ta te thove ande nuzda ta te dukhave averen.
18Goleke o Del phenda gia katar o Joakim chavo katar o Josias, char katar Juda:
Te na phenel niko ando roipe pala le:
¡Ioi, phlalorrea! ¡Ioi phiorrie!
Ta na phenen ande duk:
¡Ioi gazda! ¡Ioi glamno!
19Ando limori magarchoko ka avel prajome,
terrindo ka inllaren le avri katar e udara
katar o Jerusalem ta ka chuden le.#2 R 23.36—24.6; 2 Kr 36.5-7; Jer 36.30-31.
E orba cheres o Jerusalem
20like po burdo o Libano ta molisao,
ta te asundol cho avazi po Basan ta urkisar,
karing suako rig, soke sa gola kai volin tut
si zatrime.
21Dia tuia orba kana llala chuke sukar,
a tu phendan:
Ni ka llav.
Gia cherdan sar kana sana terno,
ta nikada ni asundan mo avazi.
22Sa che chobanonen ka arakhel len e balav,
ta golen kai volin tut ka inllaren len phangle,
ondaka ka avel chuke lallao
ta ni ka llane so ka chere pala sa cho bilachipe
23Zivisardan ando Libano,
cherdan cho kuibo pe sedrura.
¡Gia surale ka urki kana dukhal tut,
dukha sargo iekhe diskiniake kana si te bianel!
E orba e Devleki e charoke o Jekonias
24Ande mo anav, phenel o Del, kai o Konias chavo katar o Joasim charo katar o Juda te avela vou angrusti ande mi nai pe mo va o chacho, i kotar ikanava tut. 25Ka dav tut ande va katar gola kai roden te mundaren tut, ta ande va katar gola kai dara te dikhen pe tute, ea, ande va katar o Nabukodonosor charo katar e Babilonia, ta ande va katar e kaldeura. 26Ka cherav ta lla phanglo tu ta chi dei kai bianda tut, ande aver phuv kote kai ni biandilan, ta kote ka mere.#2 R 24.8-15; 2 Kr 36.9-10. 27Ta kote kai von zelin sa pe liea te irinpe, ni ka irinpe.
O profeta del po alav
28¿Si gava lleno o Konias iek piri chudini
ta phagi? ¿Si iek ezgoda kai niko ni mangel la?
¿Soke avile chudine vou ta leko porodo,
ta chudie len ande iek phuv kai ni pinllarena?
29¡Phuv, phuv, phuv!
Asun o alav e Devleko.
30Gia phenda o Del:
Pisisaren so ka avelpe
gale llenea kai inai le porodo,
gava lleno kai ni iek ezgoda lachi
ni cher ande po zivoto, soke niko katar leko porodo
ni ka resel te besel po trono katar o David,
ta ni ka charoil po Juda.
Currently Selected:
Jeremias 22: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
