Jueses 3
3
E forura kai achile ando Kanaan
1Gala si e forura kai o Del mukla ande phuv te zumavel e israelen kai ni sea kana mardepe te len o Kanaan. 2O Del mukla len te sai pinllaren o maripe e israelitura kai nikada ni mardeape. 3Achile e panch gazda katar e filisteura, achile sa e kananeura, e sidoniura ta e jeveura kai zivina pe burdura ando o Libano, katar o Baal Jermon llik o Jamat.#Jos 13.2-6. 4Gia o Del mangla te zumavel e israelen, te dikhel dal kandena e zakonura kai cheres o Moises diaia e puranen. 5Ta e israelitura zivisarde maskar e kananeura, e jeteura, e amorreura, e ferezeura, e ititura ta e jebuseura. 6Ta e chave ta e chorra katar e israelitura zinisaile e chavenchar ta e chorrenchar katar gola forura ta blagosisarde lenge delen.
O Otoniel braduil e Israele katar o Kusan Risataim
7Ta so cherde e israelitura saia bilacho angla e akha e Devleke, soke bristardepe letar ta blagosisarde e baalen ta e Asera. 8Ta o Del jolailo po Israel ta dialen ande va katar o Kusan Risataim, o charo katar o Mesopotamia. Ta e israelitura sea sluge katar o Kusan Risataim ojto burs. 9Ondaka e israelitura ikharde e Devle, ta o Del bichalda iekhe llene te braduil len. O lleno kai bichalda o Del ikhardola Otoniel chavo katar o Kenaz o phlal mai terno katar o Kaleb.#Jue 1.12-13. 10Ondaka o duo e Devleko avilo po Otoniel ta krisisarda e Israele. Chidia e israelen ta likisto te marelpe e charoia katar e Siria o Kusan Risataim, ta dobisarda le. 11Ta saia e pas ande phuv saranda burs. Ta mulo o Otoniel chavo katar o Kenaz.
O Ejud braduil e Israele
Mapalal kana mulo o Otoniel 12e israelitura pale cherde o bilachipe angla e akha e Devleke, goleke o Del zuriarda e charo katar o Moab, o Eglon. Dia le mai but zor neko e Israele. 13O Eglon achilo po alav e amonitonenchar ta e amalekitonenchar. Dia po Israel ta lia e foro katar e palmere. 14Ande desojto burs e israelitura sea sluge katar o Eglon. 15Ondaka ikharde e Devle ta o Del vazdia iekhe braduimari, o Ejud chavo katar o Gera katar e vicha e Benjamineki. Ta o Ejud saia stingo.
Iek drom e israelitura bichalde cheres o Ejud iek ezgoda sukar e Egloneke. 16Ta o Ejud lia iek churi ostro pe dui riga kai leko lungipe saia dopas pola, ta guruda le telal katar leke patave pe rig e chachi. 17Mapalal llelo te inllarel e ezgoda sukar e Egloneke kai saia but thuliardo. 18Ta kana dia e ezgoda sukar e Eglone, o Ejud likisto e llenenchar kai avilea lea, 19ta kana avilo kai si e dela ando Gilgal, o Ejud irisailo kai o Eglon ta phenda leke:
Si man te dav orba tuia po chorial.
Ta o charo phenda te liken e sluge kai sea lea. 20Ta kana o Ejud achilo korkorre e Eglonea kai saia besindo ande soba katar o milai, avilo lete ta phenda leke:
O alav kai si man te phenav chuke si e Devletar.
Kana o Eglon asunda le ustilo katar po trono. 21Ondaka o Ejud inzarda po va stingo karing pi chachi, lia e churi ta espidia la ando lli katar o Eglon. 22Espidia la gia zuralo kai sa e churi dia ando lli katar o Eglon ta leko koi ucharda la sa, soke o Ejud ni ikanda la avri, ta likisto o gadope. 23Mapalal o Ejud phangla o udar, thoda e alkava ta likisto katar e penllerava.
24Kana llelotar avile e sluge kai radina e charoke ta kana dikhle kai o udar saia phanglo mislisaile kai o charo llelo peke rigate. 25Ta sar nakhlo but vreme brigisaile kana dikhena kai o charo ni likela. Ondaka lie o klucho putarde o udar ta malade lengo gazda mulo pe phuv.
26Kana e sluge jasarena vreme o Ejud naslo, ta kana nakhlo e dela ando Gilgal gurudilo ando Seirat. 27Ta kana avilo ando foro basalda ande sing po burdo katar o Efrain ta e israelitura fuliste lea katar o burdo ta vou llala angle. 28O Ejud phenda lenge te llan pala le te marenpe e moabitonenchar soke o Del ka cherel te dobin len. Ondaka llele pala le, lie e thana kai e llene nakhen o Jordan ta ni mukle te nakhel nika. 29Ta mundarde des milie moabitonen kai sea boñikura zurale ta tromane. Ni achilo llundo ni iek lendar. 30Gia e israelitura dobisarde e Moabe. Mapalal saia e pas ande phuv ojtovardes burs.
O Samgar braduil e Israele katar e filisteura
31Mapalal avilo o Samgar chavo katar o Anat kai mundarda sov stotine filisteonen iekhe kastea.
Currently Selected:
Jueses 3: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
