Jueses 15
15
1Nesavo vreme mapalal kana chidena o lliu, o Sanson llelo te dikhel pe rromia ta inllarda lake iek busno, ta kana avilo phenda:
Me ka dav ande soba katar murni rromi te dikhav la.
A leko sastro ni mukla le te del andre, 2ta phenda e Sansoneke:
Me misliva kai ni volila la ios goleke diemla iekhe katar che amal. A laki phiorri e terni si mai sukar latar. Lela chuke pe lako than.
3A o Sanson phenda leke:
¡Akana ni ka avav dosalo andar o bilachipe kai ka cherav e filisteonenge!
4Ondaka o Sanson lia trin stotine lisiche, phangla dui pe dui lenge poria ta thoda pe lende kasta, 5mapalal phabarda e kasta ta mukla e lisiche te llan pe vostanura kai e filisteura thodea simiche. Gia phabarda o lliu e vostanura drakhake ta e vostanura maslinkenge. 6Ta e filisteura puchle ko cherdaiale ta kana llangle kai o Sanson cherdaiale soke leko sastro liaia leki rromi te sai del la leke amaleke, llele ta phabarde la ta lake dade. 7Ondaka o Sanson phenda:
Te si kai tumen cheren gia, ¡jav sovel kai ka cherav te pochinen so cherden!
8Ta dia pe lende gia zurale kai ni mukla len ni iek kokala sasto. Mapalal llelo te zivil ando anadipe katar o Etam.
O Sanson dobil e filisteonen ando Leji
9Ondaka e filisteura logle ande Juda llik kai o Leji. 10Ta e llene katar o Juda puchle len:
¿Soke avile te marenpe amenchar?
Ta von phende:
Amen avilam te phanda e Sansone te sai pochinel so cherda amenge.
11Kana asunde gava, trin milie murusa katar e vicha e Judaeki llele ando anadipe katar o Etam ta phende e Sansoneke:
¿Ni llana kai e filisteura si mai zurale neko amen? ¿Soke chere amenge gia?
Ta o Sanson phenda lenge:
Me samo cherden te pochinen so cherde mange.
12Ta von phende leke:
Amen avilam te phanda tut te da tut e filisteonenge.
Ta o Sanson phenda lenge:
Jan sovel kai tumen ni ka mundaren man.
13Ta von phende leke:
Ni ka mundara tut. Samo manga te phanda tut te da tut e filisteonenge.
Ondaka phangle le e solenchar neve ta ikande le katar e pechina.
14Kana avile ando Leji e filisteura likiste te len e Sansone ta urkina beselimatar. A o duo e Devleko avilo pe lete ta o Sanson phagla e sole kai phandena leke va sargo kana avena lino phabardo, 15mapalal lia iek kokalo katar e falka e magarchoki kai ni saia suko ta mundarda milia filisteonen. 16Ta phenda:
Iekhe falkaia magarchoki
cherdem iek ta dui kotora.
Iekhe falkaia e magarchoki
milia murusen mundardem.
17Mapalal chudia e falka magarchoki, goleke gua than ikhardol Ramat Leji. 18Ta o Sanson saia but trusalo goleke ikharda e Devle ta phenda:
¿Sar si kai cherdan te dobiv ande iek baro maripe ta akana muke man te merav trusatar ta ande va katar llene kai blagosin avere delen?
19Ondaka o Del putarda o anadipe kai si ando Ramat Leji, likisto pai ta o Sanson pila ta lia peke e zor. Goleke o bunari kai si ando Leji ikhardol llik akana En Jakore.
20Ta o Sanson gazdarisarda ando Israel bis burs ande llivesa katar e filisteura.
Currently Selected:
Jueses 15: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
