Jueses 13
13
O Sanson
1A e israelitura pale cherde o bilachipe angla e akha e Devleke, goleke o Del dialen ande va katar e filisteura saranda burs.
2Ta saia iek lleno ando Zora katar e vicha e Daneki kai ikhardola Manoa. Leki rromi nasti achela phari ta ni sea la minone. 3Ondaka o suecho e Devleko sikadilo lake ta phenda lake:
Tu kai nikada ni avile chuke minone, ka ache phari ta ka maladol chuke iek chaurro. 4Na pi mol ni rachia ta na ja niso pogano, 5soke ka maladol chuke iek chaurro kai ni ka chine letar leke bal, soke gua chaurro ka avel nazareo, dino e Devleke, ta ka braduil e Israele katar e filisteura.#Nm 6.1-5.
6Ondaka e diskinia lleli te phenel pe rromeke so nakhlaia, ta phenda leke:
Iek lleno e Devleko avilo mande, ta dikhola sargo suecho e Devleko. Ni puchlem le ko saia ta vou ni phenda le mange. 7Ta phenda mange kai ka maladol mange iek chaurro, goleke morabi te na piav mol ni rachia ta te na jav niso pogano, soke o minono ka avel dino e Devleke sargo nazareo omanglal te biandol.
8Ondaka o Manoa molisailo e Devleke ta phenda:
Me moliv man chuke Devla te bichale pale gole llene te sai phenel amenge so morabi te chera e minonea kai ka biandol.
9Ta o Del pale bichalda e suecho e diskiniake kana voi saia ando vos, a lako rrom o Manoa ni saia kote, 10ta voi prastia te phenel leke:
¡Asun, o lleno kai sikadilo mange o gua llive, pale dikhlem le!
11Ondaka o Manoa ustilo ta llelo laia kai saia o lleno, ta o Manoa puchla le:
¿Tu san o lleno kai dia orba me rromiake o gua llive?
Ta o lleno phenda:
Ea, me sem.
12Ondaka o Manoa phenda leke:
Kana ka cherdol so phendam amenge, ¿sar morabi te bariara e minone? ¿So morabi te chera lea?
13Ta o suecho e Devleko phenda:
Te cherel chi rromi sa so phendem lake. 14Te na piel niso cherdo katar e drak, te na piel mol ni rachia, te na jal niso pogano.
15Ta o Manoa ni llanela kai o lleno saia o suecho e Devleko, 16ta phenda leke:
Na llatar, achi te ja amenchar iek busno kai ka chirava.
Ta o suecho phenda leke:
I te achava nasti jav tumenchar. A o busno sai te de le kurbano e Devleke.
17Ondaka o Manoa phenda e suechoke:
Phen amenge sar ikhardo tu te sai da liubao chuke kana ka cherdol so phendan.
18A o suecho phenda:
¿Soke mange te llane mo anav kai si but sukar?
19Ta o Manoa lia o busno ta ezgode dine ta dialen kurbano e Devleke pe iek pechina. Ondaka o suecho e Devleko cherda iek bari ezgoda Devlikani. 20Soke kana likisto iag katar o altar, o Manoa ta leki rromi dikhle sar o suecho e Devleko likisto ando miloso ande iag. Ondaka die changenchar lligo lengo chikat dodisarde pe phuv. 21Ta o Manoa acharda kai o lleno saia o suecho e Devleko, soke ni sikadilo ios ni leke ta ni lake rromiake, 22ta phenda pe rromiake:
De istina amen ka mera soke dikhlam e Devle.
23A voi phenda leke:
Te mangela mundarel amen o Del, ni liea amaro kurbano ta amari ezgoda dini, ni sikadaia amenge sa gale ezgode, ta i ni phendaia amenge so ka cherdol.
24Ta avilala e diskiniake iek minono ta thoda leko anav Sanson. Ta o minono barilo ta o Del blagosisarda le.#Ebr 11.32. 25Ta o duo e Devleko thodape te avel po Sanson ando vos katar o Dan, maskar Zora ta Estaol.
Currently Selected:
Jueses 13: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
