Ebreos 7
7
O Jesus popo sargo o Melkisedek
1O Melkisedek saia o charo katar o Salem ta popo katar o Del o baro kana o Abraam irilape katar o maripe, kote kai vou dobisardaia e charonen. O Melkisedek avilo lete ta blagosisarda le, 2ondaka o Abraam dia le o diesmo katar sa so dobisardaia. Morabi te thova sama kai o anav Melkisedek si charo katar o chachipe, ta i sikadol sargo o charo katar o Salem, kai i gua anav si o charo katar e pas.#Jen 14.17-20. 3A niso ni llangliolpe katar leko dad ta katar leki dei ta ni katar leki vicha, ta ni delpe orba sar biandilo, ni katar leko meripe, ta gia prema o Chavo e Devleko kai si popo ostade.
4Akana, thoven sama gia baro saia gava popo kai isto o Abraam kai si katar amari vicha purani dia le o diesmo katar sa so dobisardaia e charonen. 5Gia sar phenel o zakono e Moiseseko, e popura kai si katar e vicha e Levieki si lenge dino o alav te len katar o foro o diesmo katar sa so dobisaren, ta ni chitilpe o popo te avela isto katar lengi vicha o katar lengi familia, goleke saurre morabi te den o diesmo.#Nm 18.21. 6A o Melkisedek ni saia katar e vicha e Levieki, ta lia o diesmo katar o Abraam ta blagosisarda e Abraame soke o Del diaia po alav leke vicha. 7A chachimaia gua kai blagosil si mai baro neko gua kai lel o blagosipe. 8Pe gava zivoto, e llene kai len o diesmo si manusa kai meren; a ando Pisipe kana del orba katar o Melkisedek del orba sargo katar iek lleno kai zivil llik akana. 9Ta akana sai phena kai e popura kai si katar e vicha e Levieki kai akana len o diesmo, pochinde i von o diesmo e Melkisedeke kana o Abraam pochinda o diesmo leke. 10Gava saia soke kana o Melkisedek avilo kai o Abraam, o Abraam inllarela pe pi esnaga pi vicha ta pe chaurren kai ni ios ni biandilea.
E dui popura
11O foro katar o Israel lia o zakono, gava zakono saia te sai pomozin e popura katar o Levi gole foro te sai avel orta. A sar gola popura nasti cherde le, saia te avel iek popo, na sargo ogola kai avena katar e vicha e Aaronoki, saia te avel sargo e Melkisedeki. 12Soke kana pharrudol e vicha e poponengi morabi te pharrudol i o zakono; 13a kana del orba katar amaro Gazda ando Pisipe, phenel kai vou si katar aver vicha ta katar goia vicha ni likisto ni iek popo. 14Soke sa llanen kai amaro Gazda avilo katar e vicha e Judaeki, ta o Moises ni phenda niso katar goia vicha kana dia orba katar e popura.
15Ta gava si te sai acharen mai sukar kai o nevo popo kai ka avel, si sargo o Melkisedek, 16soke vou inai thodo te avel popo prema sar phenel o zakono kai morabi te avel katar iek vicha, vou si thodo soke zivil ostade. 17Soke gava si so phenel o Del letar:#Sal 110.4.
Tu san popo ostade,
sargo o Melkisedek.
18Goleke e alava kai sea omanglal akana ni mol len ios soke gola alava sea kovle ta ni blazina, 19soke o zakono e Moiseseko ni cherda nika te aven orta. A akana adurichara iek ezgoda mai lachi, goleke ava pasa o Del.
20Ta o Del dia po alav pala gala ezgode sovlienchar. A ogola popura kana thode len saia bi sovlienchar, 21a kana saia o Gazda kote sea sovlia, soke ando Pisipe phenel:#Sal 110.4.
O Gazda jala sovel
ta ni ka delpe palpale:
Tu san popo ostade.
22Goleke, o Jesus si o alav kai dia ta cherda amen te acha pe iek nevi orba e Devlea. 23Ogola popura sea but soke o meripe ni mukela len te zivin ios; 24a sar o Jesus ni merel, leki buchi popoki nasti lel la aver. 25Goleke sai braduil ostade sa e llenen kai aven cheres le pasa o Del, soke o Jesus zivil ostade ta suako drom mangel e Devletar cheres lende.
26Goleke, o Jesus si o mai baro popo kai trubul amen. Vou si santo, bi dosako ta ni cherda o bilachipe, vou si fulado katar e bilache, ta si thodo mai upre neko o miloso. 27Vou inai sargo ogola mai bare popura kai morabi te mundaren zivirinie suako llive te del len kurbano, ta mai anglal isto pala lengo bilachipe ta mapalal pala o bilachipe e foroko. O Jesus ni cherda gia, vou dia kurbano iek drom ostade kana dia isto vou pe kurbano.#Lv 9.7. 28O zakono e Moiseseko thovel te aven e mai bare popura e manusen; a mai anglal saia o zakono ta mapalal katar o zakono o Del jala sovel, ta thovel te avel o mai baro popo pe Chaurre kai si cherdo orta ostade.
Currently Selected:
Ebreos 7: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
