Galatas 5
5
O Jesus cherda te ava mukliarde
1O Kristo mukliarda amen te na ava esluge, goleke llan orta ande gua mukliardipe ta na cherdon pale esluge.#Jn 8.32-36.
2Asunen man. Me o Pablo, phenav tumenge kai te cherden prema o zakono katar e sirkunsision, ni ka trubul tumenge nisoke o Kristo. 3Pale ka phenav suakone lleneke kai mangel te sirkunsidilpe:
Morabi te cherel sa so phenel o zakono. 4Tumen kai mangen te aven llinde chache soke cheren so phenel o zakono, durilen katar o Kristo, ta fuladilen katar o volipe e Devleko. 5A amen adurichara e Duoia te resa te ava llinde chache cheres o pachape. 6Soke cheres o Kristo Jesus, akana ni mol nisoke te cherdan o te na cherdan e sirkunsision. So mol akana si o pachape kai radil cheres o volipe.
7Tumen llana po lacho drom. ¿Ko achada tumaro pachape ando chachipe? 8Gua ni cherda le o Del, soke vou ikharda tumen. 9Cherricha levadura cherel te phukhol sa o marrno#1 Kor 5.6. 10A man si e vera ando Del kai ni ka pharruven tumaro mislo. A o Del ka thovel ande patnia gole kai mangel te muril tumen, ni chitilpe ko avela.
11A me phlalalen, te diema tumenge orba kai e sirkunsision mol la e judiura ni rodiea te mundaren man; ta te avilia goia mi orba ni cherdaia burkania maskar lende e viasta katar o krusto e Kristoko. 12A gola llene kai phenen kai morabi te cheren tumenge e sirkunsision, mai sukar avela te chinen petar sa goia rig.
O volipe si sa o zakono
13Phlalalen, tumen sen ikharde te aven mukliarde. A cheres gua mukliardipe kai si tumen na cheren o bilachipe kai mangel tumari esnaga. So si te cheren si te radin iek avereke cheres o volipe.#Mt 20.26. 14Soke sa o zakono si ande iek kai phenel gia: Volisar avere sar voli tu tut.#Lv 19.18; Ro 13.8-10. 15Arakhen tumen soke te dandarden tumen ta te jalen iek avere, isto tumen ka zatrin tumen.
O zivoto prema o Duo e Devleko
16Goleke phenav tumenge: zivin prema o Duo, ta na roden te chaliaren e bilache ezgode kai mangel tumari esnaga. 17Soke e mislura bilache inai prema o Duo, ta o Duo inai prema e bilache mislura. Iek avere ni kamen, ta goleke tumen nasti cheren sa so mangen.#Ro 7.15-23. 18A te sikada tumen o Duo, ondaka o zakono ni ka avel upral pe tumende.
19Sa llana so cheren e llene kai llan pala e bilache ezgode kai mangel e esnaga: cheren o kurvaluko, cheren ezgode pogane ta bilache, 20blagosin avere delen, cheren chirimate, si lenge joli, ni thovenpe zanio nikaia, ta joliaon kana avere si le. Joliaon oma, cheren te avel joli, ta te fuladol suako lleno pe pi rig. 21Si lenge joli kana avere si, matarne, drago lenge te jan but ta cheren aver ezgode sargo gala. Phenav tumenge, isto sar phendem tumenge omanglal, e llene kai cheren gala ezgode ni ka aven ande charoina e Devleki.
22A so cherel o Duo si, o volipe, e veselia, e pas, o terpipe, o pachivalipe, postenipe, e dragostia, 23te na avel istardipe ta te llanel o manus te achavel vou pe. Ni iek zakono nasti marelpe gale ezgodenchar. 24Ta e llene kai si katar o Kristo Jesus, mukle po krusto sa po bilachipe.#Ro 6.3-14; Gl 2.20; 6.14. 25Te zivi akana prema o Duo, muka te sikavel amen o Duo.
26Na istardiva ta na chera te avel murzania ni te avel joli maskar amende kana avere si le.
Currently Selected:
Galatas 5: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
