Ezekiel 47
47
O pai kai ezvoril katar o santuario
1Mapalal cherda te iriu man kai o udar e chereko, kote dikhlem kai telal katar o udar likela pai. Gua pai avela katar o sur ta mapalal kana nakhela katar e rig e chachi katar o cher e Devleko, llala karing likel o kham, karing saia o mui katar o cher e Devleko.#Is 44.3; Jl 3.18; Zak 13.1; 14.8; Jn 7.38; Apo 22.1. 2Ta ikanda man katar o drom e udareko katar o norte, ta cherda te llav truial po drom kai si avri katar o udar, karing o dron kai llal kai o udar kai del karing likel o kham, ta dikhlem kai o pai likela katar e rig e chachi. 3Ta o manus llelo karing likel o kham, ta inllarela ande po va iek solo, ta llinda lea panch stotine pole, mapalal phenda mange te nakhav o pai kai resela mange llik kai e kukui e porrneki. 4Mapalal llinda aver panch stotine pole, ta phenda mange te nakhav o pai kai resela mange llik kai me changa, mapalal llinda ios panch stotine pole, ta phenda mange te nakhav o pai kai resela mange llik kaimo maskar. 5Mapalal llinda ios panch stotine pole, tacherdili iek len kai nasti nakhava, soke o pai bariloia gachin, kai samo sai nakelape plivindo. 6Ta phenda mange:
Chavo e manuseko ¿Thove sama? Ondaka inllarda man ta cherda te iriu man sa pasa e len.
7Kana irisailem, dikhlem kai pe dui riga katar e len, sea but kasta. 8Ta phenda mange:
Gava pai llal karing e phuv kai likel o kham, ta ka fuliel llik kai o araba ta ka del ande mora, ta ka cherdol londo. 9Ta sogo zivil ta ka plivila kote kai ka den gala dui lena, ka zivil, ta ka aven but mache soke die andre gala paia, ta ka len o sastipe, ¡ta sogo ka del ande gaia len ka zivil! 10Ta pasa le ka aven e macharia, ta katar o Engadi llik kai o Eneglaim, ka inzaren pe mreze, ta ka aven but katar suako macho, sargo e mache katar e Mora e Bari. 11A kote kai si o pai chidino ta o glibo, ni ka chistonpe von ka achen londe. 12Ta pe dui riga katar e len ka barion katar suako kas kai del septelie, lenge patra nikada ni ka peren, ta suako drom ka aven pelende e septelie. Ande po vreme ka reslion sike lenge paia liken katar o Cher e Devleko, ta leke septelie kai aven te jampe, ta lenge patra te sastaren.#Apo 22.2.
Llik kai resel o foro
13Gia phenda o Del o Gazda:
Llik kate ka resen e phuvia kai ka fulavav e desuduie vichenchar prema so si te len. O Jose ka lel dui kotora. 14Ta suako iek ka lel gia sar perel le, pala late diem mo alav kai ka dav la tumare dadenge, goleke gaia ka avel e phuv kai ka achel tumenge.
15Ta gia ka resel e phuv llik kai o norte:
Katar e Mora e Bari, katar o drom katar o Etlon kai resel ando Zedad, 16Jamat, Berota, Sibraim, kai resel llik kai delpe ando Damasko ta ando Jamat, Jasar, Atikon, kai resel llik kai o Jauran. 17E phuv kai ka resel llik kai o norte, katar e mora llik kai o Jasar Enan kote kai delpe ando Damasko karing o norte, ta kote kai delpe ando Armat katar e rig norte.
18Katar e rig kai likel o kham, po maskaral katar o Jauran ta o Damasko, ta katar o Galaad ta katar e phuv e Israeleki, llik kai o Jordan. Gia ka lline llik kote kai resen llik kai e mora karing likel o kham.
19Katar e rig sur, katar o Tamar llik kai e paia ando Meriba, katar o Kades ta o paiorro llik kai e Mora e Bari. Gava si llik kai ka resel ando sur.
20E rig kai perel o kham ka resel llik kai e Mora e Bari llik angla o than kai delpe ando Jamad. Gava si lli kai ka resel karing perel o kham.#Nm 34.1-12.
21Gaia phuv ka fulaven la maskar tumende, prema e llene katar e vicha e Israeleki. 22Ta ka fulaven la prema so ka perel pe suako lleno, a e llenen kai si katar aver forura ta zivin maskar tumende, ta kai avila len chaurre, trubul te dikhen len sargo porodo katar o Israel, goleke i von ka aven maskar tumende kana ka perel len iek kotor phuv maskar e viche katar o Israel. 23Ande vicha kai zivila gua lleno ka den le iek kotor phuv. Gia phenda le o Del o Gazda.
Currently Selected:
Ezekiel 47: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
