Ezekiel 3
3
1Ta phenda mange:
Chavo e manuseko, ja so maladan, ja gava lil ta lla ta de orba e vichaia katar o Israel.
2Me putardem mo mui ta cherda man te jav o lil. 3Ta phenda mange gia:
Chavo e manuseko, pravar tut ta pher cho lli gale lilea kai dav tut. Ta jalem le ta ande mo mui saia guglo sargo aullin.#Jer 15.16; Apo 10.9-11.
4Mapalal phenda mange:
Chavo e manuseko, lla ta de orba e llenenchar katar o Israel ta de lenge orba me alavenchar. 5Soke ni san bichaldo kai iek foro kai del bare orbe, o kai ni achardol so phenen, tu san bichaldo kai o foro katar o Israel. 6Ni bichalav tut kai e llene kai den orba ande aver chib kai tu ni pinllare, a te bichaldema tut lende von asundea tut. 7A e llene katar o Israel ni ka thoven chuke sama, soke ni kamen te asunen man, soke sa e llene katar o Israel si zurale soreke ta lengo lio si sargo barr. 8Goleke, me ka cherav te ave lenchar zurale soreko ta cho zuralo soro ka thove lenge zurale sore. 9Me cherdem te avel cho soro mai zuralo neko o barr, na dara lendar ta na izdra angla lende, soke von si iek foro kai ni kandel.
10Ta phenda mange:
Chavo e manuseko, asun sa e alava kai me ka phenav chuke ta le len ande cho lio. 11Lla ta de kote kai si e phangle, kai e chave katar cho foro ta de lenchar orba, asunena o ni asunena, phen lenge:
Gia phenda o Del o Gazda.
12Ta o duo vazdia man, ta asundem pala mande iek avazi kai asundola but zurale, ta phenela:
Blagosime te avel e zor e Devleki kai likel katar leko than. 13Ta i asundem sar basena e pakha katar e zivotura kana maladona iek averiaia, ta sar basena e tochkura kai llana angla lende ta basena but zurale. 14Ondaka o Duo vazdia man ta istarda man ta avila mange zao ta lallao, a o va e Devleko saia zuralo pe mande. 15Ta dikhlem e phanglen ando Tel Aviv kai zivina pasa e len e Kebar ta beslem pasa lende ta kote achilem efta llive pherdo chudo maskar lende.
O Del thovel e Ezekiele te arakhel
Ez 33.1-9
16Kana nakhle e efta llive o Del phenda mange gia: 17Chavo e manuseko, me thodem tut te arakhe e foro katar o Israe:
Goleke, tu ka asune so ka phenav chuke ta ka de pe lende ande mo anav.#Is 21.6,11; Jer 6.17; Os 9.8. 18Kana me ka phenav e bilacheke:
Chachimaia ka mere, a tu te na dian pe lete ta te na dian leke orba te acharel kai cherel o bilachipe ta gia te sai zivil, o bilacho ka merel pala po bilachipe, a tu ka ave dosalo katar leko meripe. 19A te dian po bilacho, ta te na irisailo katar po bilachipe ta katar po bilacho drom, vou ka merel pala po bilachipe, ta tu ka bradui cho zivoto. 20A o chacho te duriol katar po chachipe ta te cherela o bilachipe ta te thovava vareso te cherav le te perel, vou ka merel soke tu ni dian pe lete, ta ka merel ande po bilachipe ta o chachipe kai vou cherda ka bristraol, a tu ka ave dosalo katar leko meripe. 21A te dian po chacho te na cherel o bilachipe, ta te na cherda le, ka zivil, soke dian pe lete, ta tu ka bradui cho zivoto.
O Ezekiel achel nemao
22O Del thoda po va pe mande ta phenda mange:
Uste ta lla karing o vos, ta kote ka dav tuia orba. 23Ustilem ta llelem karing o vos, ta kote saia e zor e Devleki isto gia sar dikhlema le pasa e len e Kebar, ta diem changenchar llik tele. 24Ondaka o duo dia ande mande ta cherda te achav ta phenda mange:
De andre ande cho cher ta achi phanglo andre. 25Ta tu, chavo e manuseko, ka thoven pe tute sole ta ka phanden tut lenchar, ta ni ka like maskar e llene. 26Ta ka chera te lipilpe chi chib pe cho taloi ta ka ache nemao ta nasti ka de pe lende, soke von si iek foro kai ni kandel. 27A kana me ka dav tuia orba, ka putaol chi chib ta ka phene lenge gia:
Ko asunel, te asunel, a ko ni kamel te asunel, te na asunel, soke sen iek foro kai ni kandel.
Currently Selected:
Ezekiel 3: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
