Ezekiel 21

O jarni e Devleko

1O Del phenda mange gia: 2Chavo e manuseko thov tut angla o Jerusalem ta phen angla e thana chinade ta porokisar po Israel. 3Ka phene gia e foroke katar o Israel:

Gia phenda o Del:

Me sem joliariko pe tute, ta ka ikanav mo jarni katar po than ta ka chinav tutar e llene kai si chacho ta gole kai si bilacho. 4Ta soke si te chinav e chache ta i e bilache, goleke ka ikanav mo jarni katar po than pe suako manus, katar o sur llik kai o norte. 5Ta ka llanel suako manus kai me o Del ikandem mo jarni katar po than, ta ni ka guruvavla pale.

6A tu chavo e manuseko, rov bare zalbaia, rov angla lende. 7Ta kana ka phenen chuke:

¿Soke rove tu? ka phene:

Pala iek viasta kai kana ka avel ka cherel te jasarel e vlaga suako lio ta suako va ka jasarel e zor, ta ka brigilpe suako lleno ta suako chang ka kovliol sargo o pai, e viasta avel ta ka cherdol, gia phenel le o Del.

8O Del dia manchar orba ta phenda: 9Chavo e manuseko, porokisar ta phen:

Gia phenda o Del o Gazda:

O jarni, o jarni

si ostrome ta mordo.

10Si ostri te mundarel, mordi si te klichil.

¿Ka veseli amen?

Ni thoda sama po gazdaripe me chaveko

sargo kana si fisavo kotor kas.

11Ta dia te moren o jarni te avel ando va,

o jarni si ostrome, ta si mordo

te sai den le ando va katar gua kai mundarel.

12Urkisar ta rov, chavo e manuseko,

soke avilo pe mo foro,

ka avel upral pe sa e gazda katar o Israel,

ka peren po jarni von ta i mo foro,

goleke, ranisar chi chang,

13baro zumadipe si gava.

I te mukela o jarni pe iek rig golen kai gazdarin,

o jarni ni ka avel ios, gia phenel o Del o Gazda.

14Goleke tu chavo e manuseko,

porokisar ta mar ande palme

ta te bariol dui ta trin droma mai but

e joli katar o jarni kai mundarel,

gava si o jarni katar o baro mundaripe

kai ka mundarel saurren,

15te sai chiniol o lio ta te barion e belave,

pe lenge udara thodem e dar katar o jarni.

¡Ea! lachardo si te klichil

ta ostrome si te mundarel.

16Chinel pe rig e chachi ta ranil po stingo,

kaigo te miskoa tut.

17Ta i me ka marav ande palme

ta ka cherav te achel mi joli.

Me o Del diem orba.

18O Del dia manchar orba ta phenda: 19Tu, chavo e manuseko, pisisar dui droma katar ka avel o jarni e charoko katar e Babilonia, te liken e dui droma katar iek phuv ta thov vareso te llanen katar likel suako drom, te sai llanen kai savo foro llal. 20Phen e jarnieke savo si o drom kai llal kai o Raba katar e amonitura ta kai o Juda o foro zidome katar o Jerusalem. 21Soke o charo katar e Babilonia achilo kote kai maladon e droma, kote kai liken e dui droma ta te sai apogodil savo si o drom, chinol e llide, puchel pe delen, dikhla po buko. 22Ta apogodisarda kai si e rig e chachi si kai inllarel karing o Jerusalem te llan te marenpe, te llal angle o mundaripe, te sai urkin po maripe, te chalaven pe udara e bare kastenchar, te vazden iek phurd te nakhen e zidura ta te cheren peke thana te marenpe. 23A lenge ka avel iek apogodipe kojamno soke jala lenge baro sovel, a vou ka delpe golli katar lengo bilachipe ta ka phandel len. 24Goleke gia phenda o Del o Gazda:

Soke cherden te dav man golli katar tumaro bilachipe ta sikaden tumaro kojaipe ta pucharden tumaro bilachipe ande sa so cherden, soke diem man golli, ka aven dine ande va e charoke. 25A tu, kai san iek gazda bilacho ta melalo katar o Israel ta kai allive avilo cho vreme, o vreme katar o son e bilachimako,#Jer 21.7. 26gia phenda o Del o Gazda:

Muk e phuv, ikan e korona, gaia ezgoda ni ka avel ios gia, so si tele ka avel bariardo, a so saia bariardo ka avel thodo ando lallao. 27Sa gava ka achel ando phagipe ta ni ka avel ios, lligo ni ka avel gua ka si prema le ta ka dav le leke.

Duk katar e amonitura

28A tu chavo e manuseko, porokisar ta phen:

Gia phenda o Del o Gazda cheres e chave katar o Amon ta katar lengo lallao:

O jarni, o jarni si ikando katar po than te sai mundarel, mordi ta klichil te mundarel. 29Che poraukura phenen e poroka kojamni ta apogodin o kojaipe. Tu ka chere te perel o jarni pe kor katar e bilache kai si dosale te meren, kai avilo lengo vreme kana ka avel o son katar o bilachipe.

30¿Ka guruvel po jarni? Kote kai barilan, ande phuv kai zivisardan, ka krisiu tut, 31ta ka cherav te perel pe tute mi joli, ta ka dav tut ande va katar e manusenge tromane, gola kai zatrin. 32E iag ka phabarel tut, e phuv ka achel chingi che ratea, niko ni ka delpe golli tutar soke me o Del diem orba.#Jer 49.1-6; Ez 25.1-7; Am 1.3-15; Sof 2.8-11.

Currently Selected:

Ezekiel 21: BACHRO

Highlight

Copy

Compare