Ezekiel 16
16
O Jerusalem ni kandel
1O Del phenda mange gia: 2Chavo e manuseko, phen e llenenge katar o Jerusalem, o bilachipe kai cheren, 3ta phen gia:
Gia phenda o Del cheres o Jerusalem:
Tu cherdilan, tu biandilan ando Kanaan, cho dad saia amorreo ta chi dei itita. 4A o llive kai biandilan, ni chinde cho bureko, ta ni jalade tut e paiea te chiston tut, ta ni thode pe tute o lon, ta ni pacharde tut. 5Nikake ni avila zao tutar te cheren chuke varesavi katar gala ezgode, niko ni tristosailo pala tute, avilan chudini pe umal, cho zivoto ni mola le niso kana biandilan. 6Ta me nakhlem pasa tute ta dikhlem tut melali ande cho rat ta kana sana ando rat phendem chuke:
¡Zivi! Ea, phendem chuke, kana sana sa ando rat:
¡Zivi! 7Cherdem te bario sargo e char katar o vos, barilan ta cherdilan bari ta but sukar, barili chi esnaga ta barile che bal, a sana puchardi ta nangi.
8Ta me pale nakhlem pasa tute ta dikhlem pe tute ta sana ando vreme katar o volipe, inzardem mo va ta uchardem cho nangipe ta diem tut mo alav ta jalem chuke sovel, gia phenel o Del o Gazda, ta cherdilan murni. 9Jaladem tut e paiea, chistosardem tut katar cho rat kai saia pe tute, ta thodem pe tute o zeitino, 10Thodem pe tute patave kai saia len sukar suvdipe, thodem ande che porrne minie cherde katar o tejon, thodem pe tute o lino kai lacho ta e seda. 11Thoden pe tute ezgode kai dikhon sukar, ta thodem pe che va kore iek sinlliri pe chi korr. 12Thodem pe cho nak chea ta i pe che kan ta pe cho soro thodem iek korona. 13Gia sana furiadi ando sunakai ta o rup ta che patave sea cherde katar o lino mai lacho, seda ta sukar suvdipe. Jalan katar e arina mai lachi katar o lliu, aullin ta zeitino ta avila furiadi ande iek sukaripe but baro, cherdilan barvali ta i charoisardan. 14Ta lleli chi viasta maskar e phuvia soke sana but sukar. Sana sukar ta orta, soke me cherdem tut sukar, gia phenel le o Del o Gazda.
15A tu uzdisailan ande cho sukaripe, ta kurvisailan soke sana but asundi, ta cherea o kurvaluko kaiago nakhla ta cherela tut piri. 16Ta Katar che patave ikandan te chere chuke but thana vazdine ta upral cherdan o kurvaluko, nikada ni cherdili goia ezgoda ta ni ka cherdol pale. 17Lian i che sukar ezgode sunakune ta rupune kai me diema tut ta cherdan chuke lenchar slike muruseke ta cherdan lenchar o kurvaluko, 18ta lian che patave kai saia pe lende o mai sukar suvdipe ta thodan len pe lende ta mo zeitino ta mo taimano thodan angle lende. 19Ta i mo marrno, kai me diema tut, e mai lachi arina, o zeitino ta o aullin, kai me pravardem tut lenchar, thodan len angla lende te khanden lenge sukar, ta gia cherdanle, gia phenel le o Del o Gazda.
20Ta i lian che chaurren ta che chorren kai biandan mange ta dian len kurbano e te aven phabarde. ¿So saia, minoni ezgode cho kurvaluko, 21te chine i me chaurrengi korr ta te de len kurbano gole delenge ta te phabare len ande iag? 22Ta ande sa cho bilachipe ta cho kurvaluko ni dian tut golli katar cho ternipe, kana sana nangi ta puchardi, kana sana sa ande cho rat.
23Ta mapalal katar sa cho bilachipe o Del phenda:
¡Tesko, tesko chuke! gia phenel o Del o Gazda, 24cherdan chuke thana vazdine ta thana e kurbanoke pe sa e plase. 25Katargo likela iek drom cherdan iek than vazdino, ta gadosardan cho sukaripe ta kogo nakhela mangea te cherel tut piri ta barilo cho kurvaluko. 26Ta cherdan o kurvaluko e chavenchar katar o Ejipto, e llene thule, ta bariardan cho kurvaluko te de man joli.
27Goleke, me vazdiem mo va pe tute ta cherdem te na avel tut sogo mangea ta diem tut kai e chea katar e filisteura kai murzin pe tute, gola kai si lenge lallao katar cho bilacho drom. 28Cherdan o kurvaluko i e asirionenchar, a ni veselisailan lenchar ta ni chaliarde tut. 29Bariardan cho kurvaluko ando Kanaan ta e kaldeonenchar ta ni chalilan. 30¡Cho lio ni achel pe po than, gachin ezgode cherdan ta inai chuke lallao! Gia phenel le o Del o Gazda. 31¡Cherdan che thana vazdine katargo likel iek drom ta cherdan thana e kurbanoke pe sa e plase! Ta ni sana sargo kurvichka, soke ni chitilape chuke te pochinen chuke.
32Tu ni san chachi, dian che rrome pala aver murusa. 33Sa e kurvichke len vareso, a tu dian so saia tut sa che e murusen, ta dian len ezgode, te aven katar suako rig te cheren tuia o kurvaluko. 34Ta tu cherdan ande cho kurvaluko so ni cheren ogola diskinie:
Soke ni iek murus ni ikharda tut te chere lea o kurvaluko, a tu pochine, kana chuke saia te pochinen, goleke ni sana sargo ogola.
35Goleke, kurvichka, asun o alav e Devleko. 36Gia phenda o Del o Gazda katar o Israel:
Pala cho nangipe kai dikhilo ande cho kurvaluko, ta soke dikhilo kai achilan ando lallao angla che murusa kai sea tut, ta angla che gado dela, kai dian len o rat che chaurrengo, 37sa me ka ikharav sa e murusen kai avila tut lenchar dragostia ta ka chidav len truial tutar ta ka pucharav tut ta ka dikhen cho nangipe.#Apo 17.16. 38Ta me ka krisiu tut prema o zakono katar e kurvichke ta gola kai mundaren ta mundaripe katar e joli. 39Ta ka dav tut ande lenge va ta ka zatrin che thana vazdine ta ka len tutar che patave, ka len tutar cho sukar sunakai, ta ka muken tut nangi ta puchardi. 40Ta ka cheren te aven pe tute but sueto ta ka chalaven tut e barrenchar ta ka jiraven tut pe jarnienchar. 41Ka phabaren che chera ta pe tute ka chinen krisa angla but diskinie. Ta gia ka cherav te na ave ios kurvichka ta te na chude cho barvalipe. 42Gia ka lelpe mandar mo silnope kai si man pe tute ta ka duriol tutar mi joli ta ka achav esmiro ta ni ka joliaivav pale. 43Soke ni dian tut golli katar e llivesa katar cho ternipe ta cherdan te joliaivav ande sa gaia ezgoda, goleke, i me ka anav pe cho soro so cherdan, gia phenel le o Del o Gazda, soke ni mislisailan ande sa cho kurvaluko.
Prema e dei, gia si e chei
44Goleke, sa gola kai cheren paramiche, ka phenen cho anav ta ka phenen gia:
Gia sar si e dei, gia si e chei. 45Tu san che daki chei, kai chudia pe rrome ta pe chaurren ta san phei katar che phea kai mukle pe rromen ta pe chaurren. Chi dei saia etea ta cho dad amorreo. 46Ta chi phei e mai purani si e Samaria, voi ta lake phea kai zivin pe rig sur katar san tu. Ta chi phei e mai terni si e Sodoma ta lake chea, kai zivin karing o sur tutar. 47Ni cherdan samo prema so von cheren ta ni cherdan samo prema lengo gadope, ta sargo kana goia ezgoda ni saia but, tu cherdan ios mai bilache ezgode neko von ande cho zivoto. 48Dav tut mo alav, phenel o Del o Gazda, kai chi phei e Sodoma ta lake chea ni cherde sar cherdan tu ta che chea. 49Gava saia o bilachipe kai cherda chi phei e Sodoma:
Falisaili, chalili e marrnetar, cherela sogo mangel, voi ta lake chea, ta ni dia zor gole kai saia dukhado ta gole kai trubula le. 50Ta pherdile baripe ta cherde so si gado angla mande, ta kana dikhlem so cherena zatrisardem len. 51A e Samaria ni cherda ni dopas katar cho bilachipe, soke tu cherdan mai but gadope neko von ta chachardan che phiorren sa e bilachimaia kai tu cherdan. 52A tu kai dosardan che phiorren, o lallao kai inllarda cho bilachipe si mai but neko o gadope kai cherde von, von si mai chache neko tu. Goleke trubul te avel lallao i chuke, ta inllar cho lallao, soke chachardan che phiorren.
53Goleke me ka cherav te irinpe leke llene kai si phangle, e phangle katar e Sodoma ta katar leke chorra, ta e phanglen katar e Samaria ta katar lenge chorra ta ka cherav te irinpe e phangle katar che phangle maskar lende, 54te inllare cho lallao ta te avel chuke lallao katar sa so cherdan, a tu sana lenge so dela len zor. 55A che phea, e Sodoma ta lake chea ta e Samaria ta lake chea, ka bolden sar sea mai anglal, ta i tu ta che chea ka bolden sar sena mai anglal. 56Ni saia liubao kana dea po anav che phiorra e Sodoma kana sana ande cho baripe, 57mai anglal te llangliolpe cho bilachipe. Isto gia akana tu inllare o lallao katar e chea katar e Siria ta katar sa e chea katar e filisteura, kai pe suako rig murzin pe tute. 58Terpisar tu e duk katar cho kurvaluko ta katar o gadope kai cherdan, gia phenel o Del.
59Ta i phenda gia o Del o Gazda:
¿Ka cherav tuia gia sar tu cherdan, kai ni thodan sama po alav te sai phage e sovel? 60A me ka dav man golli katar mo alav kai diem tut ande llivesa katar cho ternipe, ta ka achav tuia pe iek alav ostade. 61Ta ka de tut golli so cherdan ta ka avel chuke lallao kana ka le tute che pheen, gola kai si mai purane tutar ta e mai terne tutar, kai me ka dav len chuke sargo chorra, a ni ka avel pala o alav kai diem tut, 62ka avel pala o alav kai ka cherdol tuia ta ka llane kai me sem o Del o Gazda. 63Te sai de tut golli ta te avel chuke lallao ta nikada ios te na putare cho mui, pala cho lallao, kana me ka prostiv sa so cherdan, gia phenel o Del o Gazda.#Jer 31.3-4; Os 2—3.
Currently Selected:
Ezekiel 16: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
