Eksodo 12
12
E Paskua
1O Del dia orba ando Ejipto e Moisesea ta e Aaronea ta phenda lenge:
2Gava chon ka avel o mai preche tumenge ta purvo katar e chona katar o burs. 3Ta phenen sa e israelenge gala alava:
O llive des katar gava chon, suako lleno tumendar ka lel iek bakro o iek busno, suako familia ka lel iek pe chereke. 4A e familia te avela but minoni kai ni resena te jan o bakro, ondaka von ta e llene kai zivin pasa lende ka jan gua bakro ta ka fulavenle prema e llene kai si ta prema so sai jal suako lleno, ta gia ka chinen e bakre pe kotora te resel saurrenge. 5Sai avel iek bakro o iek busno, morabi te aven saste ta te avel lenge iek burs. 6Ta ka guruven e bakre o e busne llik kai o llive desustar katar gava chon, ta gua llive ka den le kurbano pasa racha sa e llene katar o Israel. 7Mapalal ka len o rat katar gua kurbano ta ka makhen truial katar o udar gole chereko kote kai ka jan gua kurbano. 8Ta goia riat ka jan o mas peko pe iag, ta marrne kai ni thode pe lende levadura, ta ka janle e patrenchar cherke. 9Ni iek kotor ni ka janle ialo o chirado ando pai, sa morabi te avel peko ande iag, i leko soro, leke porrne, ta i sa so si ande leko lli. 10Morabi te janle gua llive, a te achela vareso thiarinako, ka phabarenle. 11Ta gia si sar ka janle, thode tumare patave pe tumende, ta i tumare minie, ta tumari rovli ando va, ta ka sigaren te janle soke si e Paskua e Devleki. 12Soke me ka nakhav goia riat katar sa o Ejipto ta ka rraniu merimaia sa e chaurren kai biandile o purvo, gola kai si e mai purane katar suako familia katar e ejipsiura. Gia katar e manusa ta i katar e zivirinie, ta ka chinav kris ta ka dosarav sa e devlen katar o Ejipto. Me o Del, phendem le.
13Soke o rat kai tumen ka thoven pe chera ka cherel te dikhol kai sen, ta gia kana me ka anav o meripe po Ejipto, niko tumendar ni ka merel soke kana me ka dikhav o rat ka nakhav angle katar gua cher. 14Gava si iek llive kai tumen morabi te den tumen golli letar, ta ande gua llive ka cheren iek slava ande pachiu e Devleke. Ta gaia slava ka avel iek zakono ostade kai ka cheren le e dada ta ka nakhel kai e chaurre. 15Ta efta llive ka jan marrne kai ni thode pe lende levadura, goleke katar o purvo llive llik kai o eftato morabi te na avel levadura ande tumare chera. Goleke vareko te jala marrno kai thode levadura pe lete ande gola efta llive, ka avel tradino katar o Israel. 16O purvo llive ta o eftato llive ka avel iek chidinipe santo. Ande gola llivesa ni ka radin, samo ka cheren o jape kai suako lleno ka jal. 17E slava katar o marrno kai ni thoven pe lete e levadura si iek llive kai tumen morabi te slavin, soke isto ande gua llive ikandem tumen saurren katar o Ejipto. Ka cheren gaia slava sargo iek zakono ostade kai ka cheren le e dada ta ka nakhel kai e chaurre. 18Ka jan marrno kai ni thode levadura pe lete pasa racha katar o llive desustar, katar o purvo chon llik pasa racha katar o llive bis ta iek katar gua chon. 19Morabi te na avel levadura ande tumare chera efta llive, soke ko jala marrno kai thode levadura pe lete ka avel tradino katar o Israel, i te avela katar aver phuv o te avela katar o foro. 20Goleke ni ka jan niso pe so thode levadura kaigo te zivina, morabi te jan marrno kai ni thode pe lete levadura.#Ek 23.15; 34.18; Lv 23.6-8; Nm 28.17-25; Dt 16.3-8.
21O Moises thoda te ikharen sa e phuren katar o Israel, ta phenda lenge:
Llan ta len iek bakro o iek busno tumare familiake, ta mundaren le te sai cheren e slava katar e Paskua. 22O rat morabi te thovenle ande iek lelleno, ta len iek patrorra ta chingaren len e ratea, ta makhen sa truial katar si thodo o udar e chereko. Ta niko tumendar te na likel katar po cher lligo ni ka llivosaol. 23Ondaka kana o Del ka nakhel te ranil merimaia e ejipsionen, ka dikhel o rat truial o udar, ta ka nakhel katar gua cher. Ta o Del ni ka mukel te del andre gua kai zatril, gia niko tumendar ni ka merel.#Ebr 11.28. 24Gala alava ka guruven len tumen ta tumaro porodo, sargo iek zakono ostade. 25Ta kana tumen ka den ande phuv kai o Del ka del tumen, gia sar dia tumen po alav, tumen morabi te cheren gava zakono. 26Ta kana tumare chaurre ka puchen tumen ¿So si gava zakono? 27Tumen morabi te phenen lenge: Gaia zivirinia del pe kurbano ande Paskua, ando liubao e Devleko. Kana vou ranisarda merimaia e ejipsionen, ta nakhlo e chera e israelenge kai zivina ando Ejipto, ta gia braduisarda amare familia. Ondaka pala gala alava kai dia orba o Moises, e israelitura die changa ta blagosisarde e Devle. 28Mapalal llele ta cherde sa sar o Del phendaia e Moiseseke ta e Aaroneke te cheren.
O meripe katar e chaurre e mai purane
29Ondaka kana saia o dopas katar e riat, o Del ranisarda merimaia e chaurren e mai puranen katar suako familia ande phuv katar o Ejipto, katar o chaurro o mai purano katar o Faraon kai besela pe leko trono, llik kai o chaurro o mai purano katar o lleno kai si ande rubie, ta e mai purane katar e zivirinie.#Ek 4.22-23. 30O Faraon, ta sa e llene kai radina leke, ta sa e ejipsiura, ustile goia riat ta ande sa o Ejipto kukina dukhatar ta rovena, soke ande suako cher saia iek mulo. 31Isto ande goia riat o Faraon bichalda te ikharen e Moisese ta e Aarone, ta phenda lenge:
Llantar dur katar mo foro, tumen ta e israelitura. Llan te blagosin e Devle, gia sar phenden le.
32Ta inllaren tumenchar tumare bakre ta tumare guruva, gia sar mangena, ta llantar. Ta molin tumen e Devleke pala ma.
33A e ejipsiura sigarena e israelen te sai llantar mai oma katar lengi phuv, soke mislinape kai sa ka meren. 34Ta e israelitura ikande e phalia kai ni ios ni thodea pe lende e levadura, ta ulisarde len pe patavenchar ta thode len pe pe dume. 35Ta e israelitura cherde so phendaia lenge o Moises, mangle katar e ejipsiura ezgode cherde katar o rup, katar o sunakai ta patave. 36Ta o Del cherda e ejipsiura te den len lachimaia sa so von mangena lendar, ta gia e israelitura lie sa so saia e ejipsionen.#Ek 3.21-22.
E israelitura llantar katar o Ejipto
37E israelitura likiste katar o Rameses karing o Sukot. E llene kai likiste sea preko sov stotine milie murus phirindo, bi te llindon e minone. 38Ta lenchar lleletar but llene katar suako vicha, ta but bakre ta guruva. 39Ta sar ni saia len vreme te cheren jape, soke e ejipsiura tradiea len katar pi phuv, cherde marrno katar e phalia kai ikandea katar o Ejipto kai pe lende ni thodea e levadura.
40E israelitura zivisardea ando o Ejipto star stotine ta tranda burs.#Jen 15.13; Gl 3.17. 41Ta isto gua llive kai nakhlea star stotine ta tranda burs, o foro e Devleko likisto katar o Ejipto. 42Goia riat o Del ikanda len katar o Ejipto. Goleke te sai den tumen golli katar goia riat e Devleki, i tumen morabi te prezon goia riat ta i tumaro porodo ostade.
O zakono katar e Paskua
43Ta o Del phenda e Moiseseke:
Gava si o zakono katar e Paskua: Ni iek lleno kai avel katar aver phuv, nasti ka jal katar o bakro kai diele kurbano. 44A o sluga kai si chindo lovenchar, sai ka jal letar te cherde leke mai anglal e sirkunsision. 45Ni iek lleno kai si katar aver phuvia kai radila chuke, nasti ka jal katar gua kurbano, 46ta morabi jalpe samo ande iek cher. Ta ni ka ikanen kotar ni iek kotor mas katar gua bakro, ta ni ka phagen ni iek katar leke kokala.#Nm 9.12; Jn 19.36. 47Gava zakono morabi te cheren le sa e israelitura. 48A te avela iek lleno katar aver phuv kai zivil maskar tumende kai mangela te cherel e slava katar e Paskua ando liubao e Devleke, mai anglal morabi te cherel sa e murusen katar pi familia te sirkunsidinpe, ta mapalal sai ka slavin e Paskua, ta ka avel sargo iek lleno katar tumari phuv. A niko nasti ka jal katar o kurbano te na cherde leke e sirkunsicion. 49Isto gava zakono ka a avel e llenenge kai biandile ande phuv ta i golenge kai si katar aver phuv ta zivin maskar tumende.
50E israelitura cherde sa sar o Del phendaia le e Moiseseke ta e Aaronoke. 51Ta isto gua llive o Del ikanda katar o Ejipto pe foro e Israele.
Currently Selected:
Eksodo 12: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
