Ester 1
1
E sinia katar o charo Asuero
1Ande llivesa kana o Asuero charoila pe stotina ta bis ta efta phuvia, katar e India llik kai e Etiopia, 2thodaia pi charoina ando foro kai ikhardol Susa.
3Ta ando trito burs katar leko gazdaripe, o charo Asuero cherda iek pachiu sa e llenenge kai radina leke ta kai pomozina ande leki charoina, e gazdenge katar e boñikura katar e Persia ta e Media, ta e llenenge kai gazdarina ande phuvia, 4ta gia te sikavel lenge o barvalipe ta o baripe katar leki charoina ta o glamno sukaripe katar leki zor. Sou chon cherda pachiu, 5ta pala goia pachiu, cherda aver pachiu, efta llive ande bar zeleni katar leko cher. Ta ikharda sa golen kai zivina ande Susa, e mai glamne ta i golen kai ni sea gia glamne. 6E bar saia lachardi ande chitura kuch, parrne, zelene ta vunete, istarde pe sole cherde katar o lino lolo kai nakhena katar e angrusta rupune, ta sea phangle pe direkura cherde katar o marmol. Ta i thodea kervetura sunakune ta rupune, ta e phuv saia uchardi e barrenchar mai kuch, nakar ta marmol parrno ta kalo. 7O pipe thovena le ande tasura sunakune, suako iek ni saia sargo aver, ta saia but mol pe goia pachiu soke o charo saia but posteno. 8A o charo phenda e llenenge kai anena o jape ta o pipe ando cher, te na cheren e llenen te pien pe zor, vou phenda te muken len te pien gachin von mangena. 9A e charoina e Vasti, i voi cherda iek jape e diskinienge kai avilea e gostonenchar ando cher katar o charo o Asuero.
10Ando eftato llive katar e pachiu, o charo saia but veselo soke pilaia mol, ta bichalda efta eunukura, o Meuman, o Bizta, o Jarbona, o Bigta o Abagta o Zetar ta o Karkas, 11te anen lete leke rromia e chariona Vasti ta te anel pi korona pe po soro, te sai dikhel o foro ta i e mai glamne llene gia sukar saia leki rromi, soke chachimaia voi saia but sukar. 12A voi ni kamla te cherel so bichalda o charo te phenen lake e eunukura. Ondaka o charo jolailo zurale. Ta pherdo joli 13dia orba e llenenchar kai llanena ande zakonura ta o liubao, soke o charo saia sikado te dikhel gala ezgode e llenenchar kai pinllarena e zakonura. 14Ta gola kai sea mai pase katar o charo sea o Karsena, o Setar, o Admata, o Tarsis, o Meres, o Marsena ta o Memukan, efta llene glamne ande Persia ta Media kai sai avena angla o charo, ta saia len but glamno rado ande charoina. 15Ta o charo puchla len:
E charoina Vasti ni cherda so bichaldem te phenen lake. Prema o zakono ¿So trubul te chera laia?
16Ondaka angla sa e mai glamne llene kai radina pasa o charo, o Memukan phenda e charoke:
E charoina Vasti ni dukhada samo e charo, dukhada i e llenen kai gazdarin, ta sa e llenen kai zivin ande forura katar o charo o Asuero. 17So cherda e Vasti ka llanen le sa e diskinie, ta gua ka cherel te jasaren o luibao pe rromenchar, soke ka phenen:
O charo Asuero ikharda pe rromia e charoina Vasti, a voi ni kandia le. 18E rromia katar e llene glamne kai radin ande Persia ta ande Media, ka llanen so cherda e charoina ta isto allive ka mangen te den gaia orba pe rromenchar, ta gava ka anel espurnia ta joli. 19Goleke, te mangela o charo, ka chera te asundol gava zakono e charoko, ta te achel pisime ande zakonura katar e Persia ta katar e Media, ta gia te na phagen len:
E charoina Vasti te na avel nikada ios angla o charo ta te na avel voi e charoina, ta aver diskinia mai lachi te thovelpe pe lako than.#Est 8.8; Dn 6.8. 20O zakono e charoko trubul te sikadol ande sa e forura kai vou charoil, ta gia e diskinie ka den liubao pe rromen, avena glamne o ni avena glamne.
21Gaia orba avila drago e charoke ta i e llenenge kai radina lea, ta o charo phenda te llal angle gua zakono prema so phendaia o Memukan. 22Ondaka bichalda lila kai sa e forura katar leki charoina. E lila sea pisime ande chib kai dena orba ande suako phuv ta foro katar leki charoina, ta phenela kai o rrom trubul te gazdaril ande po cher. E lila saia te aven pisime ande chib kai dena orba ande leko foro.
Currently Selected:
Ester 1: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
