2 Timoteo 2
2
Tromano ande nuzda
1Tu kai san mo chaurro, trudisao ando volipe kai si amen ando Kristo Jesus. 2So asundan kai me phendem angla but llene, phenle i tu e llenenge kai uzdi tut ande lende kai ka llanen te sikavenle averenge.
3E nuzde ta e patnia nak len sargo iek boñiko katar o Kristo Jesus. 4Ni iek boñiko kai si ande po rado ni amilpe ande aver ezgode kai inai leki buchi, soke morabi te avel drago pe gazdake. 5Isto gia, o lleno kai leko rado si te prastel te dobil averen, nasti lel po chari te na prastela prema e zakonura. 6Ta i o lleno kai radil e phuv ta mangel te lel e septelie, mai anglal morabi te radil e phuv. 7Mislisao ande so phenav chuke, soke o Del ka cherel te achare sa.
8De tut golli katar o Jesukristo kai ustilo katar o meripe ta saia katar e vicha katar o charo o David, soke gua si ande lachi viasta kai me phenav. 9Ta pala e lachi viasta me terpiu e patnia ta i o phandipe sargo iek kochkari; a o alav e Devleko inai phanglo. 10Goleke sa so nakhav, nakhaule pala e llene kai o Del esvirisarda, te sai resen i von kai o braduipe ta kai o blagosipe kai si ostade ando Kristo Jesus.
11Gava si o chachipe:
Te mulam lea, i ka zivi lea.
12Te avilam tromane ande patnia, ka ava ande leki charoina.#Mt 10.33; Lk 12.9; 1 P 5.1.
Te phendam kai ni pinllara le, i vou ka phenel kai ni pinllarel amen;
13Te na avilam lea chache, vou sa iek si chacho,
soke nasti phenel kai ni pinllarel isto vou pe.
So morabi te cherel o Timoteo
14Na muk te bristarenpe gaia ezgoda ta phen lenge angla o Del kai morabi te na janpe, soke gola orbe ni lacharen niso ta murin e llenen kai asunen len. 15Trudisao te ave angla o Del iek lleno kai mol le chachimaia kai radil ta inai dosalo katar ni iek ezgoda lallaimaki, kai sikavel chachimaia e orba katar o chachipe. 16Na amisao ande orbe kai inai Devlikane, soke e llene kai den gola orbe suako drom jasaon ios mai but ando bilachipe 17ta lengo sikadipe bariol sargo iek muka. Gua si so cherel o Imeneo ta o Fileto, 18von jasaile katar o chachipe ta phenen kai o llundipe e mulengo ia avilape, ta golea murin nesave llenengo pachape. 19A o Del dia amen po alav kai si zuralo, ta kote phenel gia:#Nm 16.5; Jn 10.14; 1 Kor 8.3.
O Gazda pinllarel golen kai si leke, ta Sa e llene kai phenen e Gazdako anav morabi te durion katar o bilachipe.
20Ande iek baro cher inai samo ezgode sunakune ta rupune, si i ezgode kastune ta gliboke. Nesave si iekhe llivesenge a aver si suako lliveseke. 21O lleno kai mukel o bilachipe ka avel sargo iek ezgoda blagosime kai mol la but ta kai trubul e Devle te sai cherel varesavi ezgoda lachi.
22Duriu katar e bilache ezgode kai cheren e terne kai si ande chi doba, ta rode o chachipe, o pachape, o volipe ta e pas sa e llenenchar kai phenen o anav e Gazdako iekhe liea chisto. 23Na thov sama e orbenge kai ni pomozin tut, soke samo cheren e llenen te marenpe. 24Ta iek sluga e Gazdako nasti avel ande chingar, morabi te avel posteno saurrenchar. Morabi te llanel te sikavel, morabi te avel esmiro e llenenchar 25ta te ortol postenimaia e llenen kai ni pachan, ta o Del sai te cherel te keimpe ta te pinllaren o chachipe, 26te llungadon ta te nasen katar o kojaipe kai phangla len o llavolo te cherel lendar so vou kamel.
Currently Selected:
2 Timoteo 2: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
