2 Relles 6
6
E bari ezgoda Devlikani katar o tover
1Iek llive e poraukura phende e Eliseoke:
Dik, o cher kai amen zivi tuia si but minono. 2Muk amen te lla ando Jordan te la suako iek amendar iek kas te sai vazda iek cher te zivi.
O Eliseo phenda lenge:
Llan.
3Ta iek katar e poraukura phenda e Eliseoke:
Me moliv man chuke te lla amenchar.
Ta o Eliseo phenda leke:
Ako, ka llav tumenchar.
4Ta o Eliseo llelo lenchar ando Jordan, kote thodepe te chinen kasta. 5Kana chinena e kasta o tover katar iek profeta pelotar ando pai, ta urkisarda:
¡Tesko mange kovachi! ¡O tover ni saia murno!
6Ta o profeta e Devleko puchla le:
¿Kai pelotar?
Ta o profeta sikada leke kai pelotar o tover. Ondaka o Eliseo chinda kotor kas, chudia le ando pai ta o tover likisto ta achilo upral po pai.
7O Eliseo phenda leke:
Le le, ta o profeta lia o tover.
O Eliseo ta e siriura
8O charo katar e Siria marelape e Israelea, ta puchla pe boñikonen ta phenda lenge kai saia te thovel po pero. 9Ondaka o Eliseo bichalda te phenen e charoke katar o Israel te na nakhel pe gola thana soke e siriura saia te inzaren pe chare kotar. 10Ta o charo katar o Israel bichalda e boñikonen te llan pe gola thana kai phendaia leke o profeta. Gia cherda le but droma te sai arakhelpe katar e siriura.
11O charo katar e Siria ni llanela so ka cherel, goleke ikharda e gazden katar e boñikura ta phenda lenge:
¡Phenen mange ko si amendar kai pukhavel kai charo e Israeleko so si te chera!
12Iek katar e boñikura phenda:
Glamno charo, niko amendar ni pukhavel. O Eliseo kai si profeta ando Israel, vou phenel e charoke katar o Israel sa so tu phene ta i che alava mai gurudine kai phene ande chi soba.
13Ondaka o charo katar e Siria phenda:
Roden te dikhen kaitalo te phandav le.
Ta kana phende leke kai o Eliseo si ando Dotan, 14bichalda boñikonen kai llan ande bordona ta pe gra. Ta but boñikura avile orachaia ando Dotan ta thodepe truial katar o foro. 15Thiarinako ustilo o sluga katar o Eliseo, ta kana likisto avri ta dikhla e boñikura, e bordona ta e llene pe gra kai sea truial katar o foro, llelo kai o Eliseo ta phenda leke:
¿So ka chera akana?
16Ta o Eliseo phenda leke:
Na dara soke mai but si gola kai si amenchar neko gola kai si lenchar.
17Ondaka o Eliseo molisailo e Devleke gia:
Me moliv man chuke Devla te putare leke akha te sai dikhel. Ondaka o Del putarda e akha katar o sluga te dikhel kai o burdo saia pherdo llene kai llan pe gra ta bordona iagake, ta sea truial katar o Eliseo.
18Kana e siriura fuliena te marenpe, o Eliseo molisailo e Devleke gia:
Cher te achen korre sa gala llene.
Ondaka o Del korrada len gia sar mangla le o Eliseo. 19Ta o Eliseo phenda lenge:
Gava inai o drom ta inai o foro kai tumen roden. Llan pala ma, me ka inllarav tumen kai o lleno kai roden.
Ta inllarda len ande Samaria. 20Ta kana avile ande Samaria, o Eliseo molisailo e Devleke gia:
Devla, putar lenge akha te sai dikhen. Ondaka von dikhle kai sea ande Samaria. 21Kana o charo katar o Israel dikhla len, puchla e Eliseo:
¿Ioi dade, mundarav len?
22A o Eliseo phenda leke:
Na, na mundar len. ¿Mundarea e llenen kai phanglan kana marea tut che jarniea ta che arkoia? Thou lenge marrno ta pai, mapalal irisar len kai lengo gazda.
23Ondaka cherde lenge baro jape, a von jale ta pile. Mapalal o charo mukla len te llantar ta von lleletar kai po gazda. Ta sar kotar e siriura mukle te marenpe e israelitonenchar.
O Eliseo ta e Samaria
24Mapalal katar gale ezgode o Ben adar chidia sa pe boñikonen te marelpe e foroia katar e Samaria. Ta llele ta truisarde e foro. 25Ta saia ande Samaria bari bok soke e boñikura sea truial katar o foro. Gia bari saia e bok kai iek soro magarcheko, mola ojtovardes tolaria rupune. O starto litro katar e pogastia e guluboki, mola panch tolaria rupune.
26Iek llive o charo katar o Israel phirela po zido, ta iek diskinia urkindo phenda leke:
¡Glamno charo pomozisar man!
27A o charo phenda lake:
Te na pomozil tut o Del, ¿sar ka pomoziv tut me? ¿Katar ka ikanav lliu o mol te dav tut? 28Ta o charo phenda lake:
¿So si chuke?
Voi phenda leke:
Gaia diskinia phenda mange te dav me chaurre te ja le allive, ta kai thiara ka ja lake chaurre. 29Amen chiradam me chaurre ta jalam le. A thiarinako me phendem lake te anel pire chaurre te ja le, a voi guruda le.#Dt 28.57.
30Kana o charo asunda so phenela e diskinia, pharrada pe patave, ta nakhlo gia po zido, ta o foro dikhla kai leke patave sea zalosne. 31Ta o charo urkindo phenda:
¡O Del te dukhavel man zurale te na chinava allive o soro e Eliseoko chavo e Safateko!
32O Eliseo saia ande po cher besindo e phurenchar. Ta o charo bichalda iekhe llene lete. A mai anglal te avel gua lleno lete o Eliseo phenda e phurenge:
Dikhen sar gava lleno chavo katar iek lleno kai mundarel, bichalda te chinen mo soro. Kana ka avel o bichaldo phanden o udar ta na muken le te del andre. Soke palal pala le asundol o phiripe katar leko gazda.
33Kana o Eliseo dela orba e phurenchar avilo o bichaldo, ta phenda:
E Devletar avel gaia bari patnia, ¿so ios sai aduricharav letar?
Currently Selected:
2 Relles 6: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
