2 Relles 10
10
O Jeu zatril sa e familia katar o Ajab
1E Ajabe sea eftavardes chave ande Samaria. Goleke o Jeu bichalda lila e gazdenge kai sea ando Jezreel, e puranenge ta e llenenge kai sikavena e chaurren katar o Ajab kai sea ande Samaria. Ta ande lila phenela gia:
2Pasa tumende si e chave katar o charo, lenge gra, lenge bordona, lenge boñikura ta ezgode marimake. Goleke kana ka avel tumende gava lil, 3ikharen o mai lacho ta zuralo katar leke chave te thoven le pe leke dadeko trono. Ta maren tumen pala e familia katar tumaro gazda.
4Iek bari dar peli pe lende ta phende:
Te si kai dui charura nasti dobisarde le, ¿sar ka dobi le amen?
5Ondaka o sluga katar o cher e charoko, o gazda katar o foro, e phure ta e llene kai sikavena e chaurren katar o Ajab, bichalde te phenen e Jeueke:
Amen sam che sluge ta ka chera sogo ka phene amenge, a ni ka thova nika te charoil. Cher sogo mangea.
6O Jeu pale bichalda lenge iek lil kai phenela gia:
Te sen me sluge ta mangen te kanden man, len e sore katar e chave tumare gazdake, ta thiara isto ande gava saiato aven te dikhen man ando Jezreel. E eftavardes chave e charoke sea e llenenchar kai bariarde len, 7goleke kana avilo o lil, chinde e sore katar e eftavardes chaven e charoke. Mapalal thode lenge sore ande kotariche ta bichalde len ando Jezreel. 8Kana o bichaldo avilo kai o Jeu phenda leke:
Ande e sore katar e chave e charoke.
O Jeu phenda:
Thoven len pe dui umpe po udar e foroko. Muken len kote llik thiara.
9Thiarinako o Jeu likisto angla o foro ta phenda:
Tumen ni sen dosale. Me sem kai mislisailo te mundarel me gazda ta mundardem le. ¿A ko mundarda gale llenen? 10Llanen tumen kai sa so phenda o Del katar e familia e Ajabeki ka cherdol. Isto o Del cherda so phendaia katar o Elias leko sluga.#1 R 21.21,29.
11O Jeu mundarda ando Jezreel sa e familia katar o Ajab kai achilea ando Jezreel. Sa leke mai preche llenen, ta sa leke poponen. Niko ni achilo llundo.#Os 1.4.
12Mapalal o Jeu llelo karing e Samaria ta e dromea avilo kai iek cher kai chinen e bal katar e bakre, 13ta kote malada e phlalen katar o Okosias, o charo katar o Juda, ta puchla len:
¿Ko sen tumen? Von phende leke:
Amen sam phlal katar o Okosias ta avilam te dikha e chaven e charoke ta e charoinake.
14Ondaka o Jeu phenda:
Phanden len. Ta e llene katar o Jeu phangle len ta chinde lengi korr pasa iek bunari katar o cher kai chinen e bal katar e bakre. Sea saranda ta dui murusa, ta ni mukle ni iekhe llundo.
15Kana o Jeu llelotar kotar, malada e Jonadabe chavo katar o Rekab, ta kana puchla le sar san, phenda leke:
¿Tu misli mandar lachimaia gia sar me misliv tutar? Ta o Jonadab phenda:
Gia si. O Jeu phenda:
Te si gia de man cho va. O Jonadab dia le po va ta o Jeu phenda leke te likel lea pe leko bordon, 16ta phenda leke:
Aide manchar ta ka dikhe gachin voliv e Devle. Ta inllarda le pe po bordon. 17Ta kana avilo ande Samaria, o Jeu mundarda sa e llenen kai sea katar e familia e Ajabeki kai achilea ande Samaria. Mundarda saurren sar phendaia o Del e Eliaseke.
O Jeu zatril e Baale
18Mapalal o Jeu chidia sa e foro ta phenda lenge:
O Ajab ni blagosisarda but e Baale, a me ka blagosiv le mai but. 19Goleke ikharen sa e porauken, sa e llenen kai blagosin le ta sa e poponen katar o Baal. Te aven sa, soke me ka cherav iek baro kurbano e Baaleke. A o lleno kai ni ka avel, ka merel. A o Jeu kojavela te sai mundarel e llenen kai blagosina e Baale, 20goleke phenda te chinaven iek llive te aven pe slava e Baaleki. 21O Jeu bichalda llenen pe sa e phuv katar o Israel te ikharen sa golen kai pachana ando Baal. Ta sa avile, ta o cher e Baaleko pherdilo llene. 22Ondaka o Jeu phenda e slugake kai arakhela e patave te del kai sa e llene patave molimake. Ta o sluga cherda so phenda leke o Jeu. 23Ondaka o Jeu ta o Jonadab die ando cher katar o Baal, ta o Jeu phenda e llenenge kai pachana ando Baal:
Dikhen te na avel maskar tumende ni iek kai blagosil e Devle, te aven samo gola kai pachan ando Baal.
24Ta e llene kai pachana ando Baal thodepe te den kurbanura e Baaleke. Ondaka o Jeu thoda truial katar o cher e Baaleko ojtovardes boñikonen, ta phenda lenge:
O lleno kai ka mukel te nasel iekhe llene katar gala kai thodem ande tumare va, ka pochinel le pe zivotoia.
25Ta kana cherde o kurbano phabardo, phenda e boñikonenge kai arakhena ta e gazdenge:
¡Den andre ta mundaren saurren! ¡Te na nasel ni iek lendar! Ta e boñikura katar o Jeu die andre, mundarde saurren ta chudie len kotar. Mapalal die ando than santo katar o cher e Baaleko, 26ta ikande e estatue kai blagosina len ta phabarde len. 27Phagle e estatua katar o Baal, ta perade o cher e Baaleko ta cherde len iek than kai chuden e pogastia llik akana.
28Gia o Jeu zatrisarda katar o Israel e Baale. 29A o Jeu cherda isto gua bilachipe kai cherela o Jeroboam chavo e Nabateko kai cherda te cherel o bilachipe o Israel, soke o Jeu blagosisarda e guruven sunakune kai sea ando Betel ta ando Dan.#1 R 12.28-30.
30O Del phenda e Jeueke:
Cherdan so si orta angla me akha, soke cherdan e familiake katar o Ajab sa so phendem. Goleke star porodura katar che chave ka besen po trono e Israeleko.
31A o Jeu ni guruda sa pe liea o zakono e Gazdako o Del e Israeleko, ta ni mukla o bilachipe katar o Jeroboam kai cherda e Israele te cherel o bilachipe.
32Ande gua vreme o Del cherda te avel mai minoni e phuv katar o Israel, ta o Jazael dobisarda e israelen pe suako rig, 33katar o Jordan katar likel o kham, sa e phuv katar o Galaad, o Gad, o Ruben ta Manases. Katar e phuv o Aroer kai si pasa o paiorro o Arnon llik o Galaad ta o Basan.
34Sa so cherda o Jeu si pisime ando lil katar e ezgode kai cherde e charura katar o Israel. 35Ta kana mulo o Jeu, prajosarde le ande Samaria ta pe leko than charoisarda leko chavo o Joakaz. 36O Jeu charoisarda po Israel bis ta ojto burs ande Samaria.
Currently Selected:
2 Relles 10: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
