1 Samuel 10
10
O Saul charo katar o Israel
1Ondaka o Samuel lia iek taso zeitino ta thoda o zeitino po soro e Sauleko, chumidia le ta phenda leke:
O Del thoda tut gazda po foro Israel. 2Allive kana ka llatar ka malave duie llenen pasa o limori katar e Rakel kai achel ando Selsa, ande phuv katar o Benjamin. Von ka phenen chuke kai malade e magarche kai jasaile ta kai cho dad akana ni brigilpe pala e magarche, soke akana brigilpe pala tumende ta puchel so sai cherel pala tu. 3Ta kana ka lla angle ta ka ave kai o kas katar o Tabor, kote ka dikhe trin llene kai llan ando Betel te blagosin e Devle. Iek lendar inllarel trin busne, o gua inllarel trin marrne, a o gua inllarel iek morchi mol, 4von ka puchen tut sar san, ta ka den tut dui marrne kai tu ka le lendar. 5Mapalal ka ave ando foro kai ikharen le Burdo e Devleko, kote kai si o cher katar e boñikura katar e filisteura. Kana ka de ando foro ka dikhe nesave poraukura kai aven katar o cher e molimako, ta angla lende llan llene kai basalen o salterio, o pandero, e tuturuga ta e arpa, a e poraukura poraukin. 6Ondaka o duo e Devleko ka avel pe tu but zurale ta ka porauki lenchar, ta ka cherdo aver lleno. 7Ta kana ka nakhen sa gala ezgode, cher sogo misli tu, soke o Del si tuia. 8Mapalal ka lla angla ma ando o Gilgal, ta me ka llav tute te dav kurbanura phabarde e Devleke, ta te dav ofrende pala e pas. Tu achi kote efta llive lligo ni ka avav tute, ta me ka phenav chuke so morabi te chere.
9Ta samo llelotar o Samuel, o Del pharruda o lio e Sauleko, ta cherdila sa so phenda o Samuel. 10Kana o Saul ta leko sluga avile po burdo, avile nesave poraukura ta o duo e Devleko avilo po Saul. Ondaka o Saul thodape te poraukil gia sar cherena le e poraukura. 11Ta e llene kai pinllarena e Saule dikhle kai vou profetisila e profetonenchar ta phenena iek avereke: ¿So si e chaurreke katar o Kis? ¿I o Saul si profeta?
12Ta aver lleno puchla:
¿Ko si lengo dad? Goleke sar kotar phenen: ¿I o Saul si profeta maskar lende?
13Ta kana o Saul mukla te poraukil, avilo po than vazdino. 14Ondaka iek kako e Sauleko puchla e Saule ta leke sluga:
¿Kai llelen?
A o Saul phenda leke:
Llelam te roda e magarche kai jasaile, ta sar ni maladam len llelam te dikha e Samuele.
15Ta e Sauleko kako puchla le:
¿A so phenda tumenge o Samuel? Phen le mange, me moliv man chuke.
16O Saul phenda pe kakoke:
O Samuel phenda amenge kai malade e magarche kai jasaile. A e orba katar e charoina kai sikada le o Samuel, ni phenda leke niso.
17Mapalal o Samuel ikharda e foro te blagosin e Devle ande Mizpa, 18ta phenda lenge:
Gia phenel o Del e Israeleko:
Me ikandem tumen katar e phuv katar o Ejipto, ta braduisardem tumen katar ejipsiura ta i katar sa e forura kai patisarde tumen. 19Ta akana tumen muken e Devle kai braduisarda tumen katar e brige bare. Tumen phenen kai mangen iek charo te sai gazdaril pe tumende. Goleke aven angla o Del sa tumare viche, ta sa tumare familie.
20Ta o Samuel chidia sa e viche katar o Israel, ta ikharde e vicha katar o Benjamin. 21Ta o Samuel phenda te aven sa e llene katar e vicha katar o Benjamin, ta maskar sa e familie katar gaia vicha, ikharde e familia katar o Matri. Ta katar gaia familia ikharde e Saule chavo katar o Kis, a e Saule ni malade le. 22Ondaka puchle e Devle kai saia o Saul. Ta o Del phenda kai o Saul saia gurudino maskar e ezgode kai anena. 23Ondaka prastie lete ta ikande le kotar. Kana o Saul saia maskar lende, dikhola mai baro neko sa e llene. 24Ta o Samuel phenda sa e foroke:
¿Dikhen tumen ka esvirisarda o Del te avel tumaro charo? ¡Niko ando foro inai sargo vou!
Ta o foro urkisarda.
¡Blagosime te avel o charo!
25O Samuel sikada e foroke e zakonura katar e charoina, pisisarda len pe iek lil ta guruda len angla o Del. 26Mapalal o Samuel phenda saurrenge te llantar chere. I o Saul llelotar kai po cher ando Gabaa, ta llele lea llene tromane kai o Del pharrudaia lengo lio. 27A sea llene bilache kai phende gia:
¿Gava ka braduil amen?
Ta die orba bilachi letar ta ni die le liubao.
Currently Selected:
1 Samuel 10: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
