1 Pedro 5
5
E orba golenge kai gazdarin ande khanlliri
1Akana mangav te phenav golenge kai gazdarin ande tumari khanlliri kai me sem sargo tumen ta i kai dikhlem e patnia kai nakhlo o Kristo. Kana vou ka avel pale ka avav lea ande leko baripe. 2Arakhen e bakren kai o Del dia tumende, arakhen len chache liea, na samo soke si te arakhen len pala e love, arakhen e bakren e Devleke chachimaia.#Jn 21.15-17. 3Na sargo kana gazdarin pe llene kai o Del dia tumende, so morabi te cheren si te aven lache lenchar, ta gia von ka sikon tumendar. 4Ta gia kana ka avel o Chobano kai si o Gazda mai baro, ka del tumen e korona blagosimaki kai nikada ni ka merel.#Ebr 13.20.
E orba sa e khanllirake
5Isto gia tumen e terne morabi te kanden golen kai gazdarin ande khanlliri ta te kanden iek avere postenimaia, ta na te istardon soke:#Pr 3.34; Stg 4.6.
E Devleke inai drago e llene kai istardon,
a pomozil e llenen kai lengo lio si kovlo.
6Goleke morabi te aven proste angla o Del soke sen tala leko va, ta vou ka del tumen o baripe kana ka avel o vreme.#Mt 23.12; Lk 14.11; 18.14; Stg 4.10. 7Muken ande Devleke va sa tumare brige, soke vou arakhel tumen.#Sal 55.22; Mt 6.25-34.
8Arakhen tumen ta thoven sama soke o llavolo llal sargo iek liono divome kai rodel so te jal. 9Ta terpin leke zurale ando pachape soke tumen llanen kai ande sa e phuvia si but phlal kai nakhen patnia isto sargo tumen. 10A kana tumen ka nakhen gaia patnia nesavo vreme o Del ka cherel tumen orta ta zurale te na kovlion ta gia suako llive ka avel tumen pachape. Isto o Del kai ande po baro volipe ikharda amen e Jesukristoia te ava i amen ande leki dragostia ostade. 11Leke te avel e zor ostade. Gia te avelpe.
12O Silvano kai mange si iek phlal chacho pomozisarda man te pisiv tumenge gava lil te sai sikon. Me phenav kai sa so dia tumen o Del si soke volil tumen but. ¡Goleke achen zurale ande gava volipe!#Ech 15.22,40.
13E khanlliri kai si ande Babilonia, kai o Del esvirisarda ta kai i tumen esvirisarda, bichalel tumenge salami ta i mo chaurro o Markos.#Ech 12.12,25; 13.13; 15.37-39; Kol 4.10; Flm 24. 14Chumiden tumen iek avere volimaia.
Te avel tumen pas sa tumen kai sen e Kristoke.
Currently Selected:
1 Pedro 5: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
