1 Relles 7
7
Aver chera kai vazdia o Salomon
1Mapalal o Salomon vazdia po cher kai getosarda le ande desutrin burs. 2Ta i vazdia o cher kai ikharena le vos katar o Libano kai sea le saranda ta panch pole lungimatar, bis ta dui pole bulimatar ta desutrin pole vazdino. Ta saia thodo pe star fisie direkura kastune katar o sedro kai pe lende sea kasta thule katar o sedro. 3Gala kasta sea saranda ta panch. Suako fisia saia la desupanch direkura cherde katar o sedro. 4Sea trin sivke ande penllerave, suako penllerava angla aver. 5Sa e udara ta e penllerave sea len star riga. Ta sa sea iek angla aver ande trin sivke. 6Ta i cherda e soba kai ikharena la e soba katar e direkura, kai sea la bis ta dui pole ando lungipe, ta desutrin ta dopas pole ando bulipe. Ta angla gaia soba saia aver kai sea la direkura ta e kotora kastune upral. 7Ta i cherda e soba te chinen e kris, ta marda la upral llik tele ande kotora kastune katar o sedro.
8O cher kai zivila o Salomon saia le iek bar palal ta iek soba vazdini sargo o cher. Ta o cher kai vazdia e cheake katar o Faraon, kai saia leki rromi, saia le iek soba sargo e soba kaia saia palal katar o cher e Salomonko.#1 R 3.1. 9Sa e chera kai vazdia o Salomon sea cherde ande sukar barra, chinde prema e soba, angla, palal. 10E barra kai saia telal sea bare ta but sukar. Sea len star ta dopas pole, ta averen trin pole ta sovardes sentimetrura. 11Upral sea barra sukar chinde prema o cher, ta kotora kastune katar o sedro. 12Truial katar e bar sea trin sivke ande sukar barra, ta iek sivka ande kotora kastune katar o sedro, ta i e bar kai saia andre, ta e barkatar o cher e Devleko.
O Salomon thovel e Jirame te radil
2 Kr 2.13-14; 3.15-17
13Ta o Salomon ikharda e Jirame te avel katar o Tiro. 14O Jiram saia o chavo katar iek phivli ande vicha e Benjamineki ta iek lleno katar o Tiro kai radila ando tuch. O Jiram saia but bizai ta llanela sa o rado ande ezgode tuchne. Goleke avilo angla o charo o Salomon ta cherda sa po rado. 15Bilada dui direkura tuchne kai sea len ojto pole vazdine, ta truial lendar saia iek thav kai sea len panch ta dopas pole. 16Ta cherda dui ezgode tuchne kai dikhon sukar. Gala ezgode sea len dui pole ta bis ta panch sentimetrura llik upre, ta thoda len upral pe direkura. 17Ta i cherda dui mreze kai dikhon sargo lanchura te sai thoven len upral pe direkura, efta ando suako direko. 18Ta cherda dui sivke ta pe lende phabaia truial katar e mreza te sai ucharel e ezgode tuchne kai sea upral pe suako direko. 19E ezgode sukar kai sea upral pe direkura ando udar, ta kai dikhona sargo lulunlla sea len dui pole. 20Upral katar suako direko sea dui stotine phabaia pe lende ande dui sivke, ta truial pe lende saia e mreza. 21Gala direkura vazdia len po udar katar o cher e Devleko. Ta kana vazdia o direko pe rig e chachi, todha leko anav Jakin, a o direko kai vazdia pe rig stingo, thoda leko anav Boaz. 22Ta upral pe direkura cherda liriura. Ta gia getosarda o rado katar e direkura.
E ezgode katar o cher
2 Kr 4.1—5.1
23Mapalal o Jiram cherda iek baro lelleno paieko tuchno. O lelleno saia sargo iek kolo, ta sea le star ta dopas pole llik upre. Truial letar saia iek thav kai sea le desutrin ta dopas pole. 24Truial telal katar o kurlo, cherda dui ezgode sukar kai dikhona sargo duduma, ande suako iek sea des ande suako saranda ta panch sentimetrura kai e lellenoia sea biladine isto ande iek than. 25Ta o lelleno saia thodo upral pe desudui guruva. Trin lendar dikhena karing o norte, trin karing perel o kham, trin karing o sur, ta trin karing likel o kham. Lenge porrne palune sea thode telal, ta o lelleno saia thodo pe lende. 26E pasuare katar o lelleno sea len trin naia sentimetro ando bulipe. Avrial dikhola sargo lulunllin, ta andre resena pe lete saranda ta star milie litrura pai.
27Ta i cherda des thana tuchne kai sea telal tala o lelleno, suako iek sea le iek pola ta ojtovardes sentimetrura ando lungipe ta ando bulipe, ta iek pola ta tranda sentimetrura llik upre. 28E porrne sea cherde gia. Sea len kotora kastune kai sea istarde maskar o kurlo. 29Ta gola kai sea istarde po kurlo, sea slike kai dikhona sargo lionura, guruva, ta kerubinura. Upral po kurlo e lionura ta e guruva, sea ezgode sukar kai dikhona sargo lulunlla. 30Suako porrno saia le star tochkura tuchne kai i o chilo saia tuchno. Ta saia le suako star riga telal repise tuchne lacharde ande ezgode sukar sargo lulunlla. 31O mui e lellenoko saia andre ande iek bar kai le sea dui cheperkura llik upre. O mui e lellenoko saia sargo kolo, ta i pe lete sae slike ande star riga, na sargo kolo. O porrno kai saia thodo o mui e lellenoko sea le trin cheperkura ta dopas. 32E star tochkura sea telal tala e kotora kastune, ta e tochkura sea thode pe direkura. E tochkura sea len trin cheperkura ta dopas. 33Ta e tochkura sea sargo e tochkura katar e bordona. O chilo katar o tochko, e ziche ta e kubura, sa sea tuchne. 34E star repise katar e star riga katar suako porrno cherena samo iek ezgoda. 35Upral katar e porrne saia iek ezgoda sargo kolo kai sea le bis ta dui sentimetrura ta dopas, ta upral katar e porrne sea lake alkave, ta e kasta kai likena isto latar. 36Ta o Jiram cherda kerubinura, lionura, ta palmere pe kasta ta pe alkave prema o baripe katar suako iek, ta truial cherda aver ezgode lacharde sukar. 37Gia cherda e des porrne, bilade iek sargo aver. Lengo baripe ta sar dikhona, iek sargo aver.
38Ta i cherda des lellenura tuchne. Suako lelleno sea le ojto stotine ta ojtovardes litrura, ta suako iek sea le iek pola ta ojtovardes sentimetrura. Ta thoda e lellenura upral pe porrne.#Ek 30.17-21. 39Ta thoda panch porrne pe rig e chachi katar o cher, ta ogola panch pe rig e stingo. O lelleno baro thoda le pe rig e chachi katar o cher, pe rig sur katar perel o kham.
40O Jiram cherda e kavie, e pale ta e tasura. Gia getosarda po rado kai cherda e Salomonoke pala o cher e Devleko. 41Dui pulsura ta e ganchura sargo kolura kai sea pe lende. E dui mreziche kai ucharena e ganchura sargo kolura, kai sea upral pe pulsura. 42Star stotine granade pala e dui mreze, dui sivke katar e granade ande suako mreza te sai ucharen e kapitelura sargo kolura kai sea upral pe direkura, 43e des porrne, ta e des lellenura kai sea pe lende, 44o lelleno baro e paieke, ta e desudui guruva kai sea telal, 45e kavie, e palete, e tasura, ta sa e ezgode kai o Jiram cherda e Salomonoke, pala o cher e Devleko sea tuchne.
46Ta o charo bilada len ande bari umal katar o Jordan, pe chisai, maskar o Sukot ta o Saretan. 47Gachin sea e ezgode tuchne kai o Salomon ni cherda te phariaven len.
48Ta o Salomon phenda te cheren e ezgode kai sea ando cher e Devleko:
O altar sunakuno, o stali sunakuno kai pe late thovena o marrno chinado e Devleke,#Ek 25.23-30; 30.1-4. 49e panch kandelabrura sunakune pe chachi, ta e panch kandelabrura po stingo angla o than santisimo. E lulunlla, e lampare ta e kliastura kai sea pe lende, sa sea sunakune.#Ek 25.31-40. 50E vasura, e kanlle, e tasura, e bare rroia ta e brasesura minone te phabaren o taimano sa sea sunakune but sukar. E bisagre katar e udara kai sea ando than santisimo, katar e udara andral katar o cher, ta katar e udara e chereke, sa sea sunakune.
51Ta kana getosarde te cheren sa o rado kai o Salomon bichaldaia te cheren ando cher e Devleko, o Salomon anda sa e ezgode sunakune ta rupune kai leko dad o David diaia e Devleke, ta thoda len ando cher e Devleko.#2 S 8.11; 1 Kr 18.11.
Currently Selected:
1 Relles 7: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
