1 Relles 19

O Elias nasel ando Joreb

1O Ajab phenda e Jezabeleke sa so cherdaia o Elias, ta sar e jarnienchar mundarda e profetanen katar o Baal.

2Ondaka e Jezabel bichalda llenen te phenen e Eliaseke:

¡Te dukhaven man murne dela te na cherava tuia thiara so cherdan tu e profetonenge!

3Kana o Elias dikhla kai saia ande bari nuzda llelotar ando Berseba kai si ando Juda te na mundaren le, ta mukla kote pe sluga. 4Ta llelotar po pusto ta phirda sorro llive. Ta beslo telal katar iek enebro ta mangela te merel ta phenda:

¡Dosta, mundar man Devla! Me ni sem mai lacho neko me dada.

5Ta thodape te sovel telal katar o enebro. Ondaka iek suecho e Devleko dodisarda le, ta phenda leke:

Uste ta ja.

6Ta o Elias dikhla pasa po seran iek marrno chirado pe angara ta iek taso pai. Jala, pila ta thodape te sovel pale. 7Pale o duito drom avilo o suecho e Devleko ta dodisarda le, ta phenda leke:

Uste ta ja, soke baro drom si te phire.

8Ustilo, jala ta pila. Ta o jape dia le zor te phirel saranda llive ta saranda racha llik kai o Joreb, o burdo e Devleko. 9Kana avilo, dia andre maskar iek pechina. Ta o Del dia lea orba, ta phenda leke:

¿So chere kate, Elias?

10Ta vou phenda:

Me sem but joliariko pala tu Devla kai si tut sa e zor soke e chave e Israeleke mukle tut, perade che altarura ta mundarde che profetanen. Samo me achilen ta roden man te mundaren man.#Ro 11.3.

11Ta o Del phenda leke:

Like avri ta achi pe porrne angla ma, po burdo.

Ta o Del nakhla kotar, ta iek bari balav phurdela gia zurale kai phagela e burdura ta phagela e barra, a o Del ni saia ande balav. Mapalal dermosaili e phuv, a o Del ni saia ando dermope. 12Mapalal katar o dermope avili iag, a o Del ni saia ande iag. Mapalal katar e iag, asundilo iek sol poloke. 13Ta kana asunda le o Elias, ucharda po mui e gertachea ta likisto avri katar e pechina. Ta iek avazi phenda leke:

¿So chere kate Elias?

14Ta vou phenda:

Me sem but joliariko pala tute Devla kai si tut sa e zor, soke e chave e Israeleke mukle tut, perade che altarura, ta mundarde che profetanen. Samo me achilem ta roden man te mundaren man.

15Ta o Del phenda leke:

Irisao po drom katar avilan po pusto, ta lla ando Damasko. Kana ka ave thov zeitino po Jazael te avel o charo katar e Siria.#2 R 8.7-13. 16E Jeue chavo katar o Nimsi, ka thove le te charoil ando Israel. Ta e Eliseo chavo katar o Safat, katar o foro Abel Mejola, ka thove le te avel profeta pe cho than.#2 R 9.1-6. 17Ta o lleno kai ka nasel katar o jarni e Jazaeleko, o Jeu ka mundarel le. Ta o lleno kai ka nasel katar o jarni e Jeueko, o Eliseo ka mundarel le. 18A me ka cherav te achen ando Israel efta milie llene kai ni die changenchar angla o Baal ta ni chumidie le.#Ro 11.4.

O Del ikharel e Eliseo

19O Elias llelotar kotar ta malada e Eliseo chavo katar o Safat, kai radila e phuv bistastare guruvenchar phangle po dui, ta vou inllarela e dui mai palune. Ta kana nakhlo o Elias, thoda po gertachi po Eliseo. 20Ondaka o Eliseo mukla e guruven ta prastindo avilo kai o Elias, ta phenda leke:

Muk man te chumidav me dade ta me da, ta ka llav pala tu. Ta o Elias phenda leke:

Lla ta irisao, ¿so cherdem chuke me?

21O Eliseo llelo ta lia duie guruven, mundarda len, chinda len pe kotora, ta e kastea kai o putaren e phuv cherda iag, chirada o mas, ta dia le e foroke te jan. Mapalal llelotar pala o Elias.

Currently Selected:

1 Relles 19: BACHRO

Highlight

Copy

Compare